Bondarava radujecca, što kahości zatrymali za nacysckuju simvoliku. A ŭ samoj…
Pahladzieli, jaki zabaronieny kantent možna adšukać u kanale danosčycy.
Volha Bondarava znoŭ paradavałasia, što kahości zatrymali za raspaŭsiud zabaronienaj simvoliki.
Hetym razam nahodaj stała zatrymańnie ŭ Rasii salista hurta «Karozija mietału» padčas abłavy na kancercie. Pryčynaj zatrymańnia stała publičnaja demanstracyja nacysckaj simvoliki — na futbołkach udzielnikaŭ hurta znajšli «kałaŭrat», jaki, pavodle rašeńnia suda, «padobny da svastyki da stupieni źmiašeńnia i ŭ takoj jakaści padlahaje identyfikacyi jak znak, jaki reabilituje i hieraizuje nacyzm».
Danosčyca padchapiła hetuju temu, maŭlaŭ, «čornaje sonca» (inšaja nazva «kałaŭrata») da dabra nie daviadzie. A «nieanacystu», jak jana nazvała salista hurta, zatrymańnie pa tym ža abvinavačvańni niekalki hadoŭ tamu «nie pajšło na karyść».
Toje, što toj ža nieanacyscki simvał prysutničaŭ na našyŭkach rasijskich śpiecnazaŭcaŭ, jakija zatrymlivali padazravanych u ździajśnieńni teraktu ŭ Krokus Sici Chole, i šyroka vykarystoŭvajecca vahnieraŭcami, jana byccam i nie zaŭvažyła.
Nie padtrymała Bondarava i svaju viciebskuju kalehu, prarasijskuju aktyvistku Elviru Mirsalimavu. Stalinistku Mirsalimavu sudzili za reabilitacyju nacyzmu, jakuju sud pabačyŭ u dopisach sa ściaham USU sa svastykaj, histaryčnych fota ź bieł-čyrvona-biełym ściaham i partretam Hitlera i inšych, jakija supravadžalisia antyfašysckimi dopisami.
Viadomyja taksama vypadki, kali ludziej sudzili za savieckija antyfašysckija płakaty, dzie na karykaturnych vyjavach nacysckich lidaraŭ prysutničała svastyka.
Zdavałasia b, tut prarasijskija aktyvisty musili b abjadnacca, bo padobnyja dopisy možna znajści ŭ kožnaha ź ich. Ale Volha Bondarava zaniała inšuju pazicyju, byccam jana niedatykalnaja i takoje nie moža adbycca ź joju, a tamu nie śpiašajecca čyścić svoj telehram. A čyścić jość ad čaho.
U telehram-kanale Bondaravaj za apošni čas možna adšukać adrazu niekalki dopisaŭ z demanstracyjaj nacysckaj simvoliki.
U adnym z repostaŭ pad artykuł Bondaravu padviała rodnaja kamunistyčnaja partyja. U svaim dopisie kamunisty pakazali zdabytyja va Ukrainie rasijskimi akupantami «trafiei», siarod jakich pakłali padušku z našytaj na jaje svastykaj.
U nastupnym dopisie Bondarava zmahałasia z kaladnymi vaśmikancovymi zorkami, patrabujučy ich zamianić na savieckija. U zorkach jana pabačyła nie tolki simvoliku NATA, ale i simvoliku AUJE (aryštancki ŭkład adziny) — tatuiroŭku łahiernych aŭtarytetaŭ, zładziejaŭ u zakonie, jakim jana nanosicca pad klučycu. Danosčyca prademanstravała ŭsio bahaćcie aŭješnaj simvoliki. Na adnu z apublikavanych joju zorak sa značeńniem «śmierć kamunistam» naniesieny dźvie sparavanyja runy «zih» — emblema nacysckaha SS.
U svoj kanał Bondrava pierapościła z prarasijskaha resursa i ściah Ukrainy sa svastykaj — vidać, toj ža, za fotazdymak ź jakim sudzili raniej Mirsalimavu. Pry hetym repost jana zrabiła praź niekalki dzion paśla taho, jak viciebskaja stalinistka raspaviała za što kankretna jaje pryciahnuli da adkaznaści. Voś dzie sapraŭdy «ŭrok, jaki nie pajšoŭ na karyść».
Heta tolki niekalki prykładaŭ ź mienavita nacysckaj simvolikaj, jakija źjavilisia na kanale Volhi Bondaravaj za apošnija paŭhoda. Ale zabaronienaj simvoliki tam kudy bolš. Naprykład, danosčyca zaciraje na skrynšotach nazvy i łahatypy biełaruskich resursaŭ, pryznanych režymam Łukašenki ekstremisckimi, ale pry hetym aktyŭna repościć dopisy rasijskich kanałaŭ, jakija hetaha nie robiać.
«Naša Niva» — bastyjon biełaruščyny
PADTRYMAĆPrarasijskaja aktyvistka Mirsalimava atrymała hihancki štraf — za «adzinočny pikiet z BČB»
«Nazyvali palityčnaj prastytutkaj». Stalinistka Mirsalimava raskazała pra dva dni za kratami
Žyhimont i Bondarava źvinavacili Tura ŭ ideałahičnaj dyviersii
Homielski pravakatar Kakojta spytaŭ u administracyi Łukašenki ab zakonnaści tatuiroŭki z Pahoniaj. Paśla hetaha ŭ jaho pačalisia prablemy
Kamientary