Biełarus akazaŭ supraciŭ palicejskim u Francyi. Ciapier sud abaviazaŭ jaho zapłacić im amal 1000 jeŭra
Sud u Eks-an-Pravans razhledzieŭ cyvilnyja patrabavańni dvuch palicejskich da biełarusa, asudžanaha za supraciŭ. Na pasiadžeńnie jon nie źjaviŭsia.
Sudovy trybunał francuzskaha horada Eks-an-Pravans 15 kastryčnika 2026 hoda abaviazaŭ biełarusa zapłacić dvum palicejskim ahułam kala $1090 (972 jeŭra). Hetyja hrošy iduć na pakryćcio ich vydatkaŭ na advakata. Takoje rašeńnie apublikavana ŭ bazie sudovych rašeńniaŭ Francyi.
Pavodle dakumienta, jašče 11 červienia 2024 hoda karny sud Eks-an-Pravans pryznaŭ mužčynu vinavatym u supracivie dvum palicejskim padčas vykanańnia imi słužbovych abaviazkaŭ. Što mienavita adbyłosia i za što palicyja sprabavała jaho zatrymać, u rašeńni nie apisana. Jakoje pakarańnie atrymaŭ biełarus, z dakumienta taksama nieviadoma.
Abodva palicejskija ŭstupili ŭ spravu jak hramadzianskija istcy. Sud tady pryznačyŭ im miedycynskuju ekśpiertyzu i abaviazaŭ asudžanaha zapłacić kožnamu pa 900 jeŭra sudovych vydatkaŭ.
A voś razhlad ich patrabavańniaŭ ab kampiensacyi sud vynies na asobnaje pasiadžeńnie.
Ekśpiertyzy byli praviedzienyja. Škodu palicejskim kampiensavała CIVI — dziaržaŭnaja kamisija, jakaja vypłačvaje kampiensacyi achviaram złačynstvaŭ. Na pasiadžeńni 17 vieraśnia 2026 hoda palicejskija prasili spahnać ź biełarusa tolki vydatki na advakata. Sud zadavoliŭ hetaje patrabavańnie i zahadaŭ vykanać rašeńnie nieadkładna, bo «z momantu padziej prajšło šmat času».
Asudžany na pasiadžeńnie nie pryjšoŭ, i pradstaŭnika ŭ jaho nie było. Pavodle rašeńnia, jon žyvie ŭ Biełarusi.
Kamientary