Uładzimira Kara-Murzu etapavali z Omskaj kałonii ŭ nieviadomym kirunku
Rasijski palityk adbyvaje 25-hadovy termin nibyta za «zdradu dziaržavie».
Rasijskaha palityka Uładzimira Kara-Murzu, jaki adbyvaje źniavoleńnie ŭ Omskaj kałonii № 6, etapavali ŭ nieviadomym kirunku, paviedamlaje «Mieduza».
Chamoŭnicki sud Maskvy 13 červienia pavinien byŭ razhledzieć skarhu Kara-Murzy na biaździejnaść Śledčaha kamiteta ŭ suviazi z zajavami palityka ab dvuch zamachach na jaho zabojstva. U sudzie słuchačam i advakatu Maryi Ejsmant paviedamili, što pasiadžeńnie nie adbudziecca, pakolki Kara-Murzy niama ŭ Omskaj VK-6.
Uładzimir Kara-Murza pieražyŭ dva atručeńni ŭ mai 2015 hoda i lutym 2017 hoda. Rasśledavańnie Bellingcat i The Insider pakazała, što za zamachami stajała hrupa supracoŭnikaŭ FSB, jakaja, jak miarkujecca, arhanizavała atručeńnie Alaksieja Navalnaha.
Kara-Murza źviartaŭsia ŭ Śledčy kamitet z prośbaj zavieści kryminalnuju spravu pa artykule ab zamachu na zabojstva, ale hetaha nie adbyłosia. Paśla vychadu rasśledavańnia jon padaŭ jašče adnu zajavu, a paźniej źviarnuŭsia ŭ sud u suviazi ź biaździejnaściu SK. U kancy maja 2024 hoda Masharsud adchiliŭ apielacyjnuju skarhu palityka na rašeńnie Zamaskvareckaha suda, jaki pryznaŭ admovu SK u zaviadzieńni spravy zakonnaj.
U krasaviku 2023 hoda Kara-Murzu prysudzili da 25 hadoŭ pazbaŭleńnia voli ŭ kałonii strohaha režymu, pryznaŭšy vinavatym pa artykule ab dziaržaŭnaj zdradzie, supracoŭnictvie z «niepažadanaj» arhanizacyjaj i raspaŭsiudzie «fejkaŭ» pra vojska.
Nahadajem, što etap Alaksieja Navalnaha z kałonii va Uładzimirskaj vobłaści ŭ kałoniju za Palarnym kołam skončyŭsia śmierciu palityka.
Kamientary