«Heta nie hłupstva, heta nianaviść». U Francyi pratestoŭcy padpalili ratušu XIX stahodździa VIDEA
Padčas biesparadkaŭ u francuzskim Limožy zaharełasia histaryčnaja ratuša: abvaliłasia vieža, dach upaŭ na nižnija pavierchi. Miascovyja ŭłady nazyvajuć pažar katastrofaj dla kulturnaj spadčyny.
Sotni ludziej hladzieli, jak ahoń źniščaje budynak, adkryty ŭ 1883 hodzie. Adny złavalisia, inšyja stajali ŭ rospačy. Supracoŭnica meryi płakała ŭ abdymkach pradstaŭnicy haradskoj ułady, pieradaje AFP.
Pažar pačaŭsia ŭviečary 17 kastryčnika paśla demanstracyi, u jakoj, pavodle acenki prefiekta, udzielničali kala piaci tysiač čałaviek. Prykładna a 17‑j hadzinie ludzi ŭ maskach raźbili vokny ratušy, pranikli ŭnutr i padpalili budynak. Pierad hetym kala jaho spalili aŭtamabil municypalnaj palicyi.
Ahoń raspaŭsiudziŭsia pa adnym z kryłaŭ i dabraŭsia da draŭlanych kanstrukcyj dachu. Pažarnyja sprabavali nie dapuścić, kab połymia achapiła ŭvieś budynak, ale vieža nad dacham abvaliłasia. Tušeńnie ŭskładniaŭ viecier.
«Dach abvaliŭsia na nižnija pavierchi, za vyklučeńniem zachodniaha kryła, a dźvie traciny fasada ŭžo źnikli», — zajaviŭ uviečary prefiekt departamienta Vierchniaja Vjena Morys Barat.
U momant padpału ŭnutry znachodzilisia supracoŭniki meryi, deputaty i municypalnyja palicejskija. Ludzi paśpieli vybracca, kali napadniki ŭvarvalisia ŭ budynak i pahražali ich zabić.
«Heta nie hłupstva, heta nianaviść», — skazaŭ uzrušany mer na pres-kanfierencyi. Jon nazvaŭ napad prajavaj nianaviści da instytutaŭ i ŭsiaho, što ŭvasablaje ŭładu.
Pavodle prefiekta, u hvałcie ŭdzielničali niekalki sotniaŭ čałaviek. Paśla ratušy napadniki atakavali prefiekturu, a ŭ centry horada pačałosia rabavańnie kram. Čatyry aŭtamabili nacyjanalnaj palicyi i dva municypalnaj byli spalenyja abo mocna paškodžanyja.
Ratuša Limoža była pomnikam architektury i mastactva kanca XIX stahodździa. Jaje adkryli 14 lipienia 1883 hoda, u nacyjanalnaje śviata Francyi.
Ratušu sprajektavaŭ architektar Šarl-Alfred Leklerk, jaki pracavaŭ taksama z pałacami Viersala i Tryjanona. Fasady ŭpryhožvali skulptury i vieniecyjanskija mazaiki z partretami słavutych uradžencaŭ horada. Z 1975 hoda budynak znachodzicca ŭ śpisie histaryčnych pomnikaŭ Francyi.
Pry hetym ratuša zastavałasia častkaj štodzionnaha žyćcia horada: tut pracavała municypalnaja rada, rehistravali naradžeńni, šluby i śmierci.
Kamientary