U Pieciarburhu paśla ataki dronaŭ zahareŭsia naftavy terminał. Pad udar trapiŭ taksama data-centr «UKantakcie»
Pažary ŭźnikli ŭ čatyroch rajonach horada, častka žycharoŭ zastałasia biez elektryčnaści. Haryć most. U Pułkavie abmiežavali paloty, pasažyraŭ i supracoŭnikaŭ aeraporta adpraŭlali va ŭkryćci.
U noč na 18 kastryčnika Sankt-Pieciarburh i Leninhradskaja vobłaść zaznali masavanuju ataku bieśpiłotnikaŭ. Hubiernatar Pieciarburha Alaksandr Biahłoŭ paćvierdziŭ pažar na terytoryi Pieciarburhskaha naftavaha terminała.
Pavodle jaho, pažary taksama ŭźnikli na abjektach infrastruktury ŭ Nieŭskim, Krasnasielskim, Krasnahvardziejskim i Maskoŭskim rajonach. Biahłoŭ zajaviŭ, što «achviar niama», i papiaredziŭ pra mahčymyja pieraboi z mabilnym internetam.
Kampanija VK paćvierdziła ataku na svoj data-centr u Leninhradskaj vobłaści. Pavodle jaje zajavy, servisy praciahvajuć pracavać u zvyčajnym režymie. Adnak karystalniki skardzilisia na prablemy z dostupam da «UKantakcie».
Paviedamlajecca taksama pra traplańnie bieśpiłotnika ŭ most praz Karabielny farvatar. Most uvachodzić u skład płatnaj mahistrali «Zachodni chutkasny dyjamietr». Stupień paškodžańniaŭ pakul nieviadomaja.
Ruch na asobnych učastkach daroh u horadzie abmiežavali. Žychary šerahu rajonaŭ paviedamlali pra adklučeńni elektryčnaści.
Hubiernatar Leninhradskaj vobłaści Alaksandr Draździenka zajaviŭ pra 126 źbitych bieśpiłotnikaŭ. Paškodžańni linij elektrapieradačy vyklikali pieraboi sa śviatłom.
Pracu aeraporta Pułkava abmiežavali kala druhoj hadziny nočy. Ranicaj pasažyraŭ prasili nie pryjazdžać zahadzia: raskład rejsaŭ praciahvali karektavać.
Kamientary