Biełaruski kładaŭščyk sa svastykaj na plačy lačyŭsia ad ałkahalizmu ŭ Sibiry i pajšoŭ vajavać za Rasiju, a zastaŭsia biez vypłat i pracy
42‑hadovy biełarus Pavieł Čujaškoŭ prajšoŭ šlach ad hruzčyka ŭ Minsku i fihuranta pratakołaŭ za pjanki ŭ Breście da šturmavika rasijskaj bryhady «Čornyja husary». U 2022 hodzie jon pisaŭ list Uładzimiru Pucinu z prośbaj adpravić jaho na vajnu i damovicca ź Minskam, kab jaho nie sudzili ŭ Biełarusi za najmictva. Praz čatyry hady paśla pačatku poŭnamaštabnaha ŭvarvańnia mužčyna, jaki maryŭ pra «impierskaje adradžeńnie» i filtracyjnyja łahiery dla biełarusaŭ, zastaŭsia ŭ Irkuckaj vobłaści paranienym, zvolnienym z vojska i biez «vieteranskich» hrošaj.
Paŭłu Čujaškovu 42 hady. U čatach jon nazyvaŭ siabie «niedavučanym historykam», bo skončyŭ dva kursy histaryčnaha fakulteta Bresckaha dziaržaŭnaha ŭniviersiteta, vylecieŭ i trapiŭ na słužbu ŭ pamiežnyja vojski. Mužčyna pisaŭ pra svajo burnaje junactva i pryznavaŭsia, što raniej byŭ futbolnym chulihanam «Dynama Brest», a z 14 hadoŭ nosić na plačy svastyku.
Pa źviestkach «Biełpoł», u Biełarusi ŭ Čujaškova nie zadałosia: u 2005—2006 hadach jon pracavaŭ u «Alutechu», u 2009‑m byŭ hruzčykam», a ŭ 2011—2012 hadach uładkoŭvaŭsia kładaŭščykom. Pieryjady pracy pastajanna čarhavalisia ź biespracoŭjem.
Da 2016—2017 hadoŭ mužčyna asieŭ u Breście, dzie rehularna traplaŭ u milicejskija zvodki praz ałkahol. Na jahonym rachunku niekalki administracyjnych pratakołaŭ za pjanki, strata vajennaha bileta «pry niavyśvietlenych abstavinach», a adnojčy kala bresckaj kaviarni «Bistro» na vulicy Puškinskaj u jaho skrali kurtku, majki i mabilny telefon.
U sacsietkach Čujaškoŭ tranślavaŭ radykalnyja prarasijskija i praŭładnyja pohlady. Padčas pratestaŭ «darmajedaŭ» u 2017 hodzie jon pisaŭ:
«Milicyja prybiraje śmiećcie z hałoŭnych vulic stalicy. Upieršyniu škaduju, što nie pajšoŭ paśla armii słužyć u miantoŭku. Voś to b śviata było siońnia».
U 2020 hodzie jon radavaŭsia žorstkim razhonam mirnych maršaŭ i zatrymańniam, kpiŭ z pravaabarončaha centra «Viasna» i publikavaŭ impierskija ściahi z razvažańniami pra nacyjanalizm:
«Ruski — heta kali myśleńnie ŭ ciabie, chaj i padkorkavaje — Impierskaje. Słava Rasii. Słava tryadzinamu słavianskamu rodu».
Dalejšaja historyja viadomaja ź jahonych paviedamleńniaŭ u telehramie.
Praz chraničny ałkahalizm pieršy šlub Čujaškova razvaliŭsia. Jon sam zhadvaŭ u čatach, što pakul piŭ, vynosiŭ ź siamji hrošy, «kolki dazvalali».
Kala 2019—2020 hadoŭ biełarus asieŭ u Irkuckaj vobłaści Rasii (žyŭ u Irkucku i horadzie Šelechavie), dzie trapiŭ u reabilitacyjny centr dla zaležnych. Paśla kursa lačeńnia jon zastaŭsia pracavać u hetym ža centry kansultantam i śpiecyjalistam pa sacyjalnaj pracy na nievialiki zarobak. U Sibiry jon ažaniŭsia druhi raz — z žančynaj, jakaja taksama prachodziła prahramu reabilitacyi, a ŭ 2020 hodzie ŭ pary naradziŭsia syn, jakomu dali niezvyčajnaje imia — Jaŭpacij.
Z 2021 da 2023 hoda Čujaškoŭ pracavaŭ u irkuckaj «Handlovaj kampanii Viaršynia», adkul jeździŭ na vachty na poŭnač Rasii kładaŭščykom.
Na adnoj z prac paśla jaho vyjavili niastaču na dziasiatki tysiač dalaraŭ, a na inšaj vachcie jon chvaliŭsia, što znajšoŭ sabie na składzie achviaru-ŭźbieka, jakoha ckavaŭ, karystajučysia słužbovym stanoviščam. Paralelna rasijskija sudovyja prystavy rehularna zavodzili na jaho vykanaŭčyja vytvorčaści za daŭhi.
Paśla čarhovaha ałkaholnaha zryvu na vachcie ŭ krasaviku 2022 hoda Čujaškoŭ vyrašyŭ adpravicca na vajnu suprać Ukrainy. Jon nakiravaŭ aficyjny zvarot u administracyju Uładzimira Pucina:
«Vitaju, tavaryš hałoŭny Vajennakamandujučy. Ja hramadzianin Respubliki Biełaruś. Uličvajučy situacyju, nie baču dla siabie mahčymaści zastavacca ŭbaku ad kanfliktu, prašu vyrašyć pytańnie na ŭzroŭni vašych uładnych struktur — pajechać u rajon praviadzieńnia SVA US RF i nie adkazvać pa artykule KK RB za najmictva. Dośviedu bajavych dziejańniaŭ nie maju, adnak abiacaju vučycca staranna hetaj navucy. Raźličvaju na vašu dapamohu».
Kantrakt ź Ministerstvam abarony RF Čujaškoŭ padpisaŭ u krasaviku 2024 hoda, trapiŭšy ŭ 15‑iu asobnuju hvardziejskuju motastrałkovuju bryhadu z Samary, viadomuju jak «Čornyja husary». Jon vajavaŭ na aŭdziejeŭskim i pakroŭskim napramkach: spačatku šturmavaŭ pazicyi, a paźniej staŭ staršym hrupy evakuacyi.
«Radyjo Svaboda» nazyvała «Čornych husaraŭ» samaj kryvavaj bryhadaj vajny — straty tam kałasalnyja. Z adnaho tolki Pavołžža tam zahinuła bolš za 4 tysiačy čałaviek. Ale Čujaškovu paščaściła vyžyć.
Uletku 2024 hoda — praź niekalki miesiacaŭ paśla trapleńnia na front — za try mietry ad jaho vybuchnuŭ dron-kamikadze: biełarusu pasiekła ruki i cieła askiepkami, ale evakuacyi ŭ špital daviałosia čakać 16 dzion, bo miescaŭ dla paranienych nie chapała.
U Z-čatach jon zaklikaŭ «dacisnuć usiu poskudź, jakaja ŭ RB jašče zastałasia», a biełaruskich emihrantaŭ prapanoŭvaŭ adpraŭlać u «śpiecyjalna abstalavanyja filtracyjnyja miescy ź vielmi surjoznym adsievam». «Ukantakcie» jon u toj ža čas pisaŭ: «Demilitaryzacyja da Lvova (Hdańska)».
U Irkucku jon dałučyŭsia da ruskaj nacyjanalistyčnaj supołki «Paŭnočny čałaviek», pisaŭ danosy ŭ Śledčy kamitet Rasii, z zamiłavańniem raskazvaŭ pra sustretych u Šelechavie nacy-skinchiedaŭ ź biełymi šnurkami ŭ biercach i maryŭ, jak paśla viartańnia z frontu vieterany buduć prymotvać hranaty da FPV-dronaŭ i zapuskać ich u natoŭpy mihrantaŭ na rasijskich vulicach, «kab hladzieć farš».
Adnak rasijskaja dziaržava adździačyła biełaruskamu najmitu pa-svojmu.
U vieraśni 2025 hoda Čujaškoŭ aburaŭsia ŭ vajskovym čacie, što paśla amal dvuch hadoŭ na pieradavoj i ranieńniaŭ jon tak i nie atrymaŭ rasijskaha pašparta i naležnych hrošaj: «1,9 na froncie, adziny dakumient RF — heta vajeńnik. Mnie navat vieteranskija nie płaciać — bo zamiežnik. Ech…».
U kancy 2025 hoda jon raźmiaściŭ reziume na sajcie pošuku pracy ŭ Irkucku, spadziejučysia ŭładkavacca kładaŭščykom, a ŭ žniŭni 2026‑ha paviedamiŭ byłym tavaryšam pa słužbie, što zvolnieny z šerahaŭ rasijskaj armii i biespaśpiachova šukaje pracu ŭ Irkuckaj vobłaści, bo navokał «dzič niejkaja ŭsiudy».
«Naša Niva» — bastyjon biełaruščyny
PADTRYMAĆBiełaruski recydyvist, jaki nidzie nie pracavaŭ, akramia kałonij, pajšoŭ vajavać za Rasiju. Ciapier u pałonie
Biełarus, jaki staŭ rasijskim najomnikam, viarnuŭsia ŭ Słuck — biez uvahi z boku siłavikoŭ. Zaklikaje inšych nie pamirać za Rasiju
Były biełaruski palitviazień daŭ svajo tłumačeńnie tamu, što pajšoŭ vajavać za Pucina
Ciapier čytajuć
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju88
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju8
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary