«Heta sapraŭdnaja siensacyja». Pry raskopkach na Miency znajšli zaamorfnuju fihuru, jakoj 1000 hadoŭ
Ciapier idzie kansiervacyja draŭlanych kleciaŭ, znojdzienych na raskopkach haradzišča na Miency, raskazaŭ rasijskamu vydańniu Sputnik zahadčyk adździeła archieałohii Siarednich viakoŭ i Novaha času Instytuta historyi NAN Andrej Vajciachovič.
Usie draŭlanyja kanstrukcyi, jakija znachodzilisia ŭ asnovie vała haradzišča na Miency i pryznačanyja dla kansiervacyi, dastaŭlenyja na vytvorčuju bazu homielskaha pradpryjemstva «Trans-centr».
Pa słovach navukoŭca, śpiecyjalisty pa kansiervacyi dreva prasili nie myć draŭlanyja kanstrukcyi pierad adpraŭkaj, kab zachavać ich u cełasnaści.
«Siońnia śpiecyjalisty ŭ Homieli pačali admyvać častki draŭlanych kleciaŭ i vyjavili zaamorfnuju fihuru — heta moža być cmok abo inšaja žyvioła, u jakoj jość dziuba», — raskazaŭ Andrej Vajciachovič.
Pry hetym jon udakładniŭ, što tysiaču hadoŭ tamu, kali ŭzvodziŭsia vał haradzišča na Miency, hetaja fihura była zasypanaja ziamloj razam z kleciami i nie była bačnaja ludziam.
Archieołah źviarnuŭ uvahu, što heta śpiecyjalnaja častka kanstrukcyi, jakaja jak kruk padpirała źniešniuju ścianu kleciaŭ. Takich draŭlanych častak było vyniata niekalki.
U adkaz na pytańnie, navošta čałaviek tysiaču hadoŭ tamu moh tak staranna ŭpryhožvać raźbianym dekoram bierviano, jakoje nichto nie ŭbačyć, historyk vykazaŭ zdahadku, što heta mahło być źviazana z pahanskim ujaŭleńniem pra śviet ci heta była častka tradycyjnaha dekoru.
Akramia taho, jon źviarnuŭ asablivuju ŭvahu, što draŭlanyja zaamorfnyja fihury, jakim bolš za tysiaču hadoŭ, padobnaj zachavanaści ŭ našym rehijonie naŭrad ci možna znajści.
«Heta sapraŭdnaja siensacyja», — reziumavaŭ Andrej Vajciachovič.
Na haradziščy na Miency raźbirajuć fantastyčnaj zachavanaści hihanckija dubovyja zruby X stahodździa
Archieołahi raskazali, ci ŭdałosia adšukać na dnie Biareziny skarb Napaleona
«Takoha ŭzrostu znachodak, jakija znajšli na Miency, na terytoryi Uschodniaj Jeŭropy bolš niama» — dyrektar Instytuta historyi
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary