«Takoha ŭzrostu znachodak, jakija znajšli na Miency, na terytoryi Uschodniaj Jeŭropy bolš niama» — dyrektar Instytuta historyi
Instytut historyi NAN Biełarusi padpisaŭ damovu ź Biełaruskim dziaržaŭnym technałahičnym univiersitetam, kab toj akazvaŭ dapamohu ŭ zachavańni draŭlanych kanstrukcyj, znojdzienych padčas raskopak na race Miency pad Minskam, paviedamiła ahienctva «Minsk-Naviny». Navošta heta treba, raskazaŭ dyrektar Instytuta historyi Vadzim Łakiza.
«Uzrost draŭlanych kanstrukcyj — kleciaŭ u asnovie vała staražytnaha haradzišča — vyznačany pa radyjevuhlarodnym datavańni i dendrachranałahičnych analizach. U ramkach padpisanaj damovy ab navukovym supracoŭnictvie my abmierkavali šlachi i rašeńni pa kansiervacyi i zachavańni dla naščadkaŭ hetych znachodak», — paviedamiŭ Łakiza.
Pavodle jaho, takich i takoha ŭzrostu znachodak, jakija znajšli ŭ archieałahičnym kompleksie ŭ vioscy Haradzišča Minskaha rajona, dzie, miarkujučy pa ŭsim, raźmiaščaŭsia staražytny Miensk, na terytoryi Uschodniaj Jeŭropy siońnia bolš niama.
Łakiza dadaŭ, što ŭ krasaviku płanujecca prystupić da čarhovaha etapu daśledavańniaŭ draŭlanych kleciaŭ, dubovych zrubaŭ. Jakraz ich kansiervacyja i budzie praviedziena pry dapamozie kaleh z BDTU. Pa słovach dyrektara Instytuta historyi, heta materyjalnaja spadčyna pralažała 1 tys. hadoŭ, i jašče, maŭlaŭ, na stolki ž jaje ŭdasca zachavać dla nastupnych pakaleńniaŭ dziakujučy sučasnym mietadam:
«Dumaju, jašče tysiaču hadoŭ pralažyć. I našy praprapraŭnuki z zadavalnieńniem naviedajuć archieałahičny kompleks na race Miency, pierakanajucca ŭ hłybini i ŭnikalnaści našaj historyi».
Pavodle słoŭ rektara BDTU Ihara Vojtava, jaki padpisaŭ damovu ad imia ŭniviersiteta, za amal stohadovuju historyju VNU jaho supracoŭniki napracavali šmat technałohij, źviazanych mienavita z zachavańniem dreva, jaho stanam. Va ŭniviersitecie jość ksiłateka, dzie sabranyja i sistematyzavanyja etałonnyja ŭzory draŭniny. Niekatorym ź ich užo niekalki miljonaŭ hadoŭ.
Što tyčyccva draŭlanych abjektaŭ na Miency, to jany taksama vielmi staryja, a zachavalisia ŭ tym liku nibyta i pa pryčynie dobraj hienietyki draŭniny.
Ciapier čytajuć
«Dumajecie, ja hety pašpart doma nie šukała?» Volha Siamaška prakamientavała situacyju z dakumientam prykryćcia svajho muža9
Kamientary