Hady iduć, a ceny rastuć. Jak u Biełarusi padaraželi narodnyja aŭtamabili
Pahladzieli, jak za apošnija hady źmianilisia ceny na papularnyja ŭ biełarusaŭ mašyny.
VW Passat — badaj, samaja papularnaja madel u biełarusaŭ. Samymi narodnymi z narodnych ličacca aŭtamabili čaćviortaha pakaleńnia. Biełarusy ceniać Passat B4 za prastatu, nadziejnaść, ekanamičnaść. Univiersały iduć asabniakom, bo, aproč prastornaha bahažnika, žychary pryhraničča ceniać bak na 100 litraŭ.
Hetym letam siaredniaja cana na 30-hadovyja VW Passat B4 składaje 2 557 dalaraŭ. U sakaviku 2022 hoda za Passat 1994 hoda vypusku ŭ siarednim prasili 1920 dalaraŭ — atrymlivajecca plus $637 (33%) da cany za dva hady.
Pavodle danych av.by, anałahičnyja siarednija ceny na Passat 1994 hoda vypusku naziralisia ŭ 2016 hodzie.
Aproč VW Passat B4 padraśli ceny i na narodnuju Audi A6 u kuzavie S4.
Ciapier za aŭtamabili 1996 hoda vypusku ŭ siarednim prosiać $4 489. U sakaviku 2022 było $3 793. Biez małoha plus 700 dalaraŭ, ci 18% ad pazaletašniaj cany.
Amal na tysiaču dalaraŭ padaražeła BMW 5 sieryi 2001 hoda vypusku. Kali na pačatku viasny 2022 hoda takija aŭto ŭ siarednim kaštavali 5 332 dalary, to ŭžo letam 2024 hoda za ich prosiać pa 6 295 dalaraŭ. Heta znoŭ plus 18% ad davajennaha koštu.
Krychu mienš u pracentnym vymiareńni (+16%) vyraśli ceny na restajlinhavyja miniveny Peugeot 806 1999 hoda vypusku. Ciapier za 25-hadovy siamiejny aŭtamabil u siarednim prosiać 4 075 dalaraŭ. Viasnoj 2022 hoda, tady takija aŭto pradavali ŭ siarednim na 560 dalaraŭ tańniej, — za $3 515.
Prybavili ŭ canie i kampaktveny Opel Zafira pieršaha pakaleńnia. Aŭtamabili 2001 hoda vypusku ciapier u siarednim aceńvajuć u 4 710 dalaraŭ. Da vajny siaredni košt składaŭ $4 103. Rost — kala 600 dalaraŭ, ci 15%.
Tak doraha Opel Zafira A 2001 hoda vypusku apošni raz kaštavała naprykancy 2017 hoda.
Paśla pačatku poŭnamaštabnaha ŭvarvańnia Rasii va Ukrainu ceny pačali raści nie tolki na staryja niedarahija aŭto.
Tak, naprykład, Renault Sandero Stepway 2018 hoda vypusku ciapier u siarednim pradaŭcy aceńvajuć u 11 142 dalaraŭ. U sakaviku 2022-ha takija samyja mašyny pradavali ŭ siarednim za 9 948 dalaraŭ, što na 1200 dalaraŭ (ci na 12%) tańniej, čym ciapier.
Inšy niekali papularny ŭ Biełarusi biudžetnik rasijskaj zborki, Hyundai Accent V, taksama krychu prybaviŭ u canie.
Kali viasnoju 2022 hoda za 4-hadovyja aŭto ŭ siarednim prasili 12 382 dalary, to letam 2024 hoda va ŭžo 6-hadovym uzroście hetyja mašyny aceńvajuć u 12 929 dalaraŭ. Heta plus 4,4% da davajennaj cany.
Pryčym pikavyja ceny na Hyundai Accent V prychodzilisia na zimu 2022-2023 hoda, tady za ich prasili kala 15 tysiač dalaraŭ.
Niekatoryja inšyja biudžetniki rasijskaj vytvorčaści, jakija biełarusy davoli masava kuplali novymi, na biahučy momant kaštujuć pryblizna stolki ž, kolki i da vajny.
Tak, naprykład, Polo Sedan 2019 hoda viasnoju 2022 hoda pradavali za 11 365 dalaraŭ, a ciapier za 11 389. Toje samaje i z «Łada Viesta» — 9 779 dalaraŭ ciapier suprać 9 624 u sakaviku 2022 hoda.
Admietna, što zimoj 2022—2023 hadoŭ usie jany kaštavali daražej. Na piku za Vesta prasili amal 12 tysiač dalaraŭ, a za Polo — amal 13 tysiač.
Ciapier čytajuć
«Łukašenka taki: Nazarbajeŭ kaža, što treba sychodzić, a ja nie baču pierajemnikaŭ». Siemčanka — pra sustreču z Łukašenkam letam 2020‑ha8
Kamientary