Stała viadoma, kolki studentaŭ adličyłasia z adnaho sa staličnych univiersitetaŭ za apošnija hady. Ličba ŭražvaje

Ad pačatku 2022 hoda da vosieni 2023-ha ź Minskaha linhvistyčnaha ŭniviersiteta pa ŭłasnym žadańni adličylisia bolš za 1000 studentaŭ (dzionnaj i zavočnaj formy razam z metavikami). Heta antyrekord za sučasnuju historyju injaza, adznačyli krynicy «Našaj Nivy» ź sistemy adukacyi krainy.

Pa ich słovach, siarod dobraachvotna adličanych bolš za ŭsio studentaŭ dzionnaj formy navučańnia (kala 900 čałaviek). Taksama zabrali dakumienty bolš za 100 čałaviek z zavočnaj formy navučańnia i dziasiatak tych, chto vučycca pa metavym nakiravańni.

Za 2024 hod infarmacyi pakul niama, bo MDŁU jašče nie padavaŭ jaje ŭ Minadukacyi, kažuć krynicy.

«Častka stračanych studentaŭ, jakija pakinuli ŭniviersitet pa ŭłasnym žadańni, kampiensujecca za košt novych ustupnych kampanij i abituryjentaŭ, bo mnohija nie majuć finansavaj mahčymaści vučycca za miažoj.

Adnak usio roŭna jość niedabor, asabliva heta tyčycca zavočnikaŭ. Tak, pavodle vyznačanaj dla MDŁU dziaržaŭnaj licenzii na kolkaść studentaŭ (jana patrabuje najaŭnaść u VNU 6320 studentaŭ dzionnaj formy i 2070 zavočnikaŭ), Linhvistyčnamu na kaniec 2023 hoda nie chapała bolš za 500 studentaŭ dzionnaj formy i bolš za 1000 zavočnikaŭ», — raspaviadajuć krynicy ź sistemy adukacyi. 

Ź niedaboram studentaŭ sutykajucca i inšyja VNU krainy, što publična pryznajuć i ŭ Minadukacyi. Tak, ministr adukacyi Andrej Ivaniec na Respublikanskim piedsaviecie 27 žniŭnia raskazaŭ, što pa vynikach ustupnaj kampanii 2024 hoda biełaruskija VNU ahułam niedabrali kala 870 čałaviek. Heta vyklikała abureńnie Alaksandra Łukašenki, jaki paskardziŭsia, što siońnia abituryjentaŭ «ledź nie zahaniajuć» vučycca, a ich usio roŭna nie chapaje.

Pra niedabor studentaŭ aficyjna paviedamlałasia i ŭ papiarednija hady. Paśla ŭstupnaj kampanii 2021 hoda Minadukacyi dało spravazdaču, što ŭniviersitetam nie chapała kala 5 tysiač studentaŭ usich formaŭ navučańnia, ź ich na biudžetnyja miescy niedabrali kala 500 čałaviek (adnak paśla dadatkovych naboraŭ, pavodle viedamstva, ahulnaja kolkaść niedaboru istotna źniziłasia).

U 2022 hodzie Minadukacyi vyrašyła nie ŭźnimać temu niedaboru płatnikaŭ, adznačyŭšy, što paśla asnoŭnaha naboru nie chapała kala 400 čałaviek na biudžet (paśla dadatkovaha naboru hetaja ličba taksama źniziłasia).

Nahadajem, što ŭ 2020 hodzie padčas pratestaŭ suprać hvałtu siłavikoŭ i sfalsifikavanych vynikaŭ prezidenckich vybaraŭ u mnohich biełaruskich VNU adbyvalisia masavyja mirnyja studenckija demanstracyi i strajki. U ich taksama prymali ŭdzieł vykładčyki i inšyja supracoŭniki ŭniviersitetaŭ.

Na ŭsio heta režym Łukašenki adkazaŭ štrafami, zapałochvańniami, źbićciom, zvalnieńniami, adličeńniami i aryštami ŭniviersiteckich pratestoŭcaŭ. Naprykład, čatyry hady tamu 4 vieraśnia atrad supracoŭnikaŭ AMAP u cyvilnym biez papiaredžańnia ŭvarvaŭsia na terytoryju MDŁU i pačaŭ žorstka zatrymlivać studentaŭ, jakija pamiž zaniatkami sabralisia śpiavać u chole ŭniviersiteta pieśni i skandavali «Žyvie Biełaruś».

Na pačatak 2021 hoda było viadoma pra 131 vypadak represiŭnych adličeńniaŭ i 23 kryminalnyja spravy ŭ dačynieńni da studentaŭ roznych VNU. Dziasiatki vykładčykaŭ byli zvolnienyja.

• 14
• 1
• 3
• 3
• 3
• 2
• 6
• 0