Biełaruskich staršakłaśnikaŭ navučać pravodzić dopyty

Kali ŭ papiaredniaj redakcyi prahrama fakultatyva pavinna była paznajomić navučencaŭ tolki z asnovami vajskovaj spravy, to ciapier u joj praduhledžany profili pa śpiecyjalnaściach cełaha šerahu siłavych viedamstvaŭ.

U novaj redakcyi prahrama raźličanaja na 69 hadzin: 35 hadzin u 10-m kłasie i 34 hadziny ŭ 11-m. Jana skaročanaja na 1 hadzinu ŭ vypusknym kłasie ŭ paraŭnańni ź dziejnaj.

Prahrama składajecca z ahulnaha modula «Nacyjanalnaja biaśpieka dziaržavy. Abarona Ajčyny — doŭh i abaviazak hramadzianina» (22 hadziny) i varyjatyŭnych modulaŭ «Vajskovaja sprava», «Budučy pamiežnik», «Budučy mytnik», «Budučy śledčy», «Budučy vyratavalnik», «Budučy achoŭnik pravaparadku» (47 hadzin).

U ramkach asnoŭnaha modula praduhledžana znajomstva vučniaŭ z vytokami i stanaŭleńniem biełaruskaj dziaržaŭnaści, hieraičnaj historyjaj krainy. Taksama buduć pravodzicca zaniatki pa tapahrafičnaj padrychtoŭcy, infarmacyjnaj biaśpiecy, miedpadrychtoŭcy, fizičnaj padrychtoŭcy.

U ramkach varyjatyŭnych modulaŭ školnikaŭ buduć znajomić sa śpiecyfikaj prachodžańnia słužby va Uzbrojenych siłach, Dziaržpahrankamitecie, Dziaržaŭnym mytnym kamitecie, Śledčym kamitecie, MNS i orhanach unutranych spraŭ.

Naprykład, modul «Budučy śledčy» praduhledžvaje zasvajeńnie navučencami praktyčnych pryjomaŭ i navykaŭ praviadzieńnia «asobnych śledčych dziejańniaŭ (dopytu, vočnaj staŭki, pradjaŭleńnia dla apaznańnia, ahladu miesca zdareńnia)», a modul «Budučy mytnik» — «duchoŭna-maralnaje vychavańnie, farmiravańnie maralna-psichałahičnaj hatoŭnaści da słužby ŭ mytnych orhanach».

Kožny varyjatyŭny modul praduhledžvaje znajomstva z narmatyŭna-pravavoj bazaj pracy ŭ siłavych viedamstvach: naprykład, budučym śledčym buduć vykładać asnovy kryminalnaha prava, a mytnikam — mytnaha zakanadaŭstva.

Praduhledžanyja zaniatki i pa fizičnaj padrychtoŭcy, strajavoj i strałkovaj padrychtoŭcy dla budučych vajskoŭcaŭ, pamiežnikaŭ i milicyjanieraŭ, pry hetym prahrama dla pamiežnikaŭ źmiaščaje i zaniatki pa mietadach vyžyvańnia ŭ ekstremalnych situacyjach.

Budučym vyratavalnikam daviadziecca paznajomicca z techničnym abstalavańniem MNS, a taksama mietadam pracy pry nadzvyčajnych situacyjach.

Treba adznačyć, što heta nie adziny fakultatyŭ, u ramkach jakoha staršakłaśniki mohuć paznajomicca ź mietodykaj viadzieńnia dopytu. U studzieni hetaha hoda Minadukacyi zaćvierdziła prahramu fakultatyva «Vajskovy pierakład» pa vučebnym pradmiecie «Anhlijskaja mova». Jana praduhledžvaje, što školniki zmohuć u vyniku «ažyćciaŭlać dvuchbakovy pierakład hutarki abo dopytu vajennapałonnaha (apytańnie miascovaha žychara)». 

• 0
• 1
• 0
• 5
• 0
• 1
• 6
• 0