Nieviadomyja źniščyli kryžy i stendy ŭ «viciebskich Kurapatach» niedaloka ad vioski Chajsy ŭ Viciebskim rajonie. Pra heta raspavioŭ stvaralnik inicyjatyvy «Chajsy — viciebskija Kurapaty» Jan Dziaržaŭcaŭ sa spasyłkaj na siabroŭ inicyjatyŭnaj hrupy, zaŭvažyŭ reformby.org.
Pavodle słoŭ Dziaržaŭcava, źniščany ŭsie 8 mietaličnych pakazalnikaŭ, jakija viali da mahił achviar kamunistyčnaha teroru, «reštki jakich byli raskapany pošukavikami 52-ha pošukavaha bataljona, a zatym čynoŭniki zahadali pachavać 172 čałavieki ŭ brackaj mahile kala stancyi Łośvida pad vyhladam» achviaraŭ nacystaŭ.
Akramia taho, źniščany 26 kryžoŭ razam z tabličkami, jakija raskazvali pra rasstreły ŭ časie stalinskaha teroru.
Dziaržaŭcaŭ adznačaje, što mietaličnyja ramki ad stendaŭ i tabličak pry hetym zastalisia cełymi, a sami stendy z płastyka raźbity i źnikli.
Dziaržaŭcaŭ taksama raskazaŭ, što ŭ toj dzień paśla ahladu miescaŭ rasstrełaŭ siabry pryjšli da miemaryjała z tryma kryžami i zanialisia prapołkaj pustaziella.
Tym časam da adnaho ź ich padyšli mužčyna i žančyna i spytali, što što jon tut robić i chto jaho siudy pasłaŭ. Mužčyna sfatahrafavaŭ jaho na telefon, paśla čaho sa spadarožnicaj pajšli ŭ bok vioski.
Prykładna praz paŭhadziny vałanciory pačuli huk mašyny, jakaja padjechała i spyniłasia kala miemaryjała, i z hučnahavarycielaŭ ludzi pačali kryčać, kab tyja vychodzili ź lesu. Hučali pahrozy, što ŭ advarotnym vypadku jany pojduć šukać ich i, kali znojduć, to «mała nie zdasca».
«Siabry schavalisia ŭ lesie, i viadoma ź lesu nie vyjšli, ale adzin siabra sfatahrafavaŭ mašynu zdalok, na fota nie vielmi bačna marku, ale heta nie važna, hałoŭnaje, što, mabyć, pa sihnale hetych mužčyny i žančyny siłaviki pryjechali zatrymać i pakarać siabroŭ inicyjatyvy «Chajsy», — miarkuje jon.
Chajsy nazyvajuć «Viciebskimi Kurapatami». U 2015 hodzie na hetym miescy znajšli pareštki ludziej, rasstralanych u hetaj miascovaści ŭ 1937-1938 hadach. Aktyvisty stvaryli tut miemaryjał pamiaci, ustanavili niekalki kryžoŭ i infarmacyjny stend.
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii13
Kamientary