Zakrytaja spravazdača Minzdaroŭja paćviardžaje demahrafičnuju katastrofu
Takoj nizkaj naradžalnaści ŭ Biełarusi nie było nikoli.
Aktualnyja ličby naradžalnaści (jak i śmiarotnaści) pa ŭsioj krainie centralizavana nie publikujucca z 2020 hoda. Ale «Naša Niva» raniej zdoleła pa asobnych rehijanalnych ličbach skłaści ahulnuju karcinu. Pavodle našych padlikaŭ, kaeficyjent naradžalnaści ŭ Biełarusi ŭ 2023 hodzie skłaŭ kala 6,7-6,8.
Heta mienš, čym u Savieckim Sajuzie naradžali ŭ vajnu (ahulnasaviecki minimum byŭ zafiksavany ŭ 1943-m — 8,6 narodžanych).
Čytajcie: Demahrafičnaja katastrofa. Uzrovień naradžalnaści ŭ Biełarusi apuściŭsia nižej za vajennyja časy
Paćvierdžańnie hetamu ciapier apublikavała supołka «Biełyja chałaty», jakaja vyvučyła zakrytuju spravazdaču Ministerstva achovy zdaroŭja (jaje apublikavaŭ «Biełpoł»).
«U 2023 hodzie ŭ rodadapamožnych ustanovach respubliki i doma zarehistravana 64 089 rodaŭ (2022 h. — 69 691 rody), što na 8,0% mienš, čym u 2022 hodzie», — pišacca ŭ toj spravazdačy.
Heta značyć, što ŭ 2022 hodzie naradziłasia 69 691 dzicia, a ŭ 2023 hodzie — 64 089. Hetyja ličby mohuć niaznačna adroźnivacca ad realnych (na niekalki dziasiatkaŭ), pakolki ŭklučajuć miortvanarodžanych, a taksama naradžeńnie dvuch i bolš dziaciej, tłumačać «Biełyja chałaty».
Z hetych ličbaŭ vynikaje, što naradžalnaść u 2023 hodzie skłała 6,96 na 1000 nasielnictva. Adznačajecca, što heta samy nizki pakazčyk za ŭvieś čas nazirańniaŭ pa Biełarusi z 1955 hoda, raniej jon nie apuskaŭsia nižej za 8,9.
Mocnaje padzieńnie naradžalnaści pačałosia ŭ siaredzinie 2010-ch.
Aproč suśvietnych tendencyj padzieńnia naradžalnaści, u Biełarusi jość i łakalnyja pryčyny. Heta i praciahły ekanamičny kryzis — VUP krainy praktyčna zamior na adnym uzroŭni z 2014 hoda, a heta nie daje ŭpeŭnaści ŭ zaŭtrašnim dni, — i vymušany vyjezd vialikaj kolkaści maładoha nasielnictva, vyklikany masavymi represijami.
Ale jość adzin faktar, jaki moža akazać pazityŭny ŭpłyŭ na naradžalnaść u bližejšym časie. Adna z pryčyn ciapierašniaha abvału — recha kanca 1980-ch i 1990-ch. Nadyšoŭ čas stanavicca baćkami tym, chto naradziŭsia mienavita ŭ toj čas. A tady byŭ demahrafičny spad, vyklikany nastupstvami Čarnobyla i ekanamičnym kryzisam.
Padobnaja situacyja i ŭ Rasii. Tam miarkujuć, što kolkaść narodžanych budzie štohod skaračacca da 2026 hoda — a paśla pačnie naturalna raści. Bo baćkami stanuć ludzi, narodžanyja z 2000-ch. Ich bolš, čym pradstaŭnikoŭ papiaredniaha pakaleńnia. Tamu niejki časovy rost naradžalnaści musić być. Najchutčej, padobnaja tendencyja zafiksujecca i ŭ Biełarusi.
Kamientary