Kiraŭnik Viciebskaj vobłaści raskazaŭ pra spabornictva ź inšymi abłaściami pa kolkaści podpisaŭ za Łukašenku
Alaksandr Subocin zajaviŭ, što kožny «choča siabie pakazać».
Staršynia Viciebskaha abłvykankama Alaksandr Subocin raskazaŭ pra spabornictvy pamiž abłaściami pa kolkaści podpisaŭ za Łukašenku.
U efiry BT jon, uśmichajučysia, adznačyŭ, što spabornictva zvyčajna zakančvajucca ŭničyju, tamu što kožnaja vobłaść imkniecca siabie pakazać.
«Tradycyjna spabornicki efiekt u abłaściach prysutničaje. Choć, u pryncypie, ličby pryblizna adnolkavyja, kali pahladzieć, plus-minus. Tamu što ŭsio roŭna kožny rehijon choča i siabie pakazać, i šmat i prychilnikaŭ našaha asnoŭnaha kandydata», — zajaviŭ Subocin.
Na samicie BRIKS u kastryčniku Łukašenka ŭ intervju «Iźviestijam» zajaviŭ, što hubiernatary mahli prypisać jamu hałasy na vybarach-2020.
«Ja navat pryznaŭsia, što … Nu dobra, tam, 82 ci kolki było pracentaŭ. U hubiernataraŭ — i ŭ vas u Rasii, i ŭ nas jość takoje spabornictva: Homielskaja vobłaść tam — 79%, nu, ja tut budu ŭsio rabić, kab było 79,5%. 80%? Nu, 80 i dźvie dziasiatyja», — skazaŭ tady Łukašenka.
Jon dapuściŭ, što hubiernatary mahli sfalsifikavać jamu 3-5% hałasoŭ.
Da zboru podpisaŭ za vyłučeńni kandydataŭ u prezidenty, akramia Łukašenki, dapuścili Aleha Hajdukieviča, Alaksandra Chižniaka, Volhu Čamadanavu, Siarhieja Bobrykava, Siarhieja Syrankova i Hannu Kanapackuju. Da 6 śniežnia im nieabchodna sabrać 100 tysiač podpisaŭ.
Pry hetym dziaržaŭnyja miascovyja ŚMI, dajučy spravazdaču pra «aktyŭnuju padpisnuju kampaniju», na ŭsialaki vypadak pakazvajuć fatahrafii praktyčna vyklučna pikietaŭ Łukašenki, zborščyki podpisaŭ za inšych pretendentaŭ u kadr traplajuć vielmi redka.
Zrešty, pretendenty i sami, nie saromiejučysia, ahitujuć za svajho nibyta kankurenta: naprykład, kamunist Syrankoŭ u sacsietkach partyi horda raskazaŭ, što pierš za ŭsio pastaviŭ podpis mienavita za Łukašenku.
Kamientary