Biełaruskamu baskietbołu nastojliva paraili nie mieć spraŭ ź lehiendarnym trenieram Anatolem Bujalskim
Čym siońnia žyvie trenier, raźbirałasia «Trybuna».
Anatol Bujalski — lehienda biełaruskaha baskietboła. Mienavita ź im žanočaja zbornaja dasiahnuła histaryčnych pośpiechaŭ: bronza čempijanatu Jeŭropy-2007, šostaje miesca na Alimpijadzie-2008 i čaćviortaje na čempijanacie śvietu-2010. Heta była adna z najlepšych kamand u historyi biełaruskaha sportu. Adnak sam Bujalski ŭ apošnija hady trymajecca ŭ cieniu: nie daje kamientaroŭ i intervju, i naohuł mała chto viedaje, čym siońnia zajmajecca lehiendarny trenier. Jašče niadaŭna jon pracavaŭ z dublem u minskim «Haryzoncie», ale profil treniera źnik z kłubnaha sajta. Žurnalistam udałosia vyśvietlić, što zdaryłasia.
Apošni raz u šyrokuju miedyjnuju prastoru Bujalski vychodziŭ ažno piać hadoŭ tamu. «Trybuna» ŭ vieraśni 2019-ha vyrašyła raspavieści, čym zajmajecca śpiecyjalist, i zmahła vyjści ź im na suviaź.
Trenier ad hruntoŭnaha intervju tady admoviŭsia, tamu što «luboje majo słova, dziejańnie pierakručvajecca i interpretujecca tak, što ludzi, jakija ščyra robiać mnie dabro, potym pakutujuć, tamu za lepšaje maŭčać».
Pry hetym trenier zapeŭniŭ, što jon u baskietbole bolš, čym chto inšy ŭ Biełarusi, tamu što jeździć pa śviecie, naviedvaje spartyŭnyja mierapryjemstvy, časam pravodzić majstar-kłasy za miažoj.
Paśla hetaha Bujalski kančatkova syšoŭ u cień. Ale ŭ 2021-m, jak akazałasia, viarnuŭsia da aktyŭnaj trenierskaj dziejnaści — u pačatku taho hoda staŭ adnym z trenieraŭ dubla žanočaha «Haryzontu» — «Haryzont-2-RCAP». Pryčym na sajcie BK u toj čas jon byŭ paznačany prosta jak trenier — dakładna takuju ž pasadu zajmała i Volha Matul.
Viartańnie zdaryłasia ŭ siaredzinie siezonu (idzie čempijanat pa sistemie vosień-viasna). Kamanda ŭ vyniku finišavała dziaviataj siarod dzieviaci ŭdzielnikaŭ.
Što ž potym? Bujalski praciahnuŭ pracu i, miarkujučy pa veb-archivie sajta kłuba, siezon-2021/22 pačaŭ užo ŭ roli hałoŭnaha treniera reziervistak.
Pry hetym na kamandnaj fatahrafii, zroblenaj pierad čempijanatam, Bujalskaha nie było i naohuł pra jaho pavyšeńnie sajt «Haryzonta» ničoha nie paviedamiŭ.
Tak ci inakš, śpiecyjalist byŭ hałoŭnym i ŭ tym siezonie, i ŭ dvuch nastupnych. U siezonie-2021/22 kamanda stała siomaj, u 2022/23 — apošniaj, dziaviataj, a ŭ 2023/24 — znoŭ siomaj.
Adnak ciapier na sajcie «Haryzonta» profil Bujalskaha adsutničaje. Hałoŭnym trenieram dubla značycca Volha Ziuźkova, jakaja hulała pry Bujalskim ŭ zbornaj, a ŭ pamočnikach u jaje — Hanna Nužnaja, Volha Matul i Siarhiej Moŭčan.
Ludzi, znajomyja ź situacyjaj, raspaviali nam niekatoryja abstaviny «źniknieńnia».
Pa słovach surazmoŭcaŭ, niekatory čas tamu «źvierchu» pryjšło rasparadžeńnie prybrać Bujalskaha z «Haryzontu». Takaja prośba prosta niemahčymaja biez pramoha ŭdziełu hienieralnaha sakratara fiederacyi baskietboła Anastasii Maryninaj i staršyni BFB, a ciapier jašče i łukašenkaŭskaha ministra pa zamiežnych spravach Maksima Ryžankova. Što stała pryčynaj hetamu, našyja krynicy nie viedajuć. Adnak adznačajuć, što tolki minskim kłubam rasparadžeńnie nie abmiežavałasia.
— Ludzi źvierchu danieśli i da inšych kłubaŭ i baskietbolnych ustanoŭ niehałosny zahad pra toje, kab Bujalskaha nikudy nie prymali. Pa sutnaści, jon staŭ takoj piersonaj non hrata ŭ biełaruskim baskietbole. Pry tym čym jon nie dahadziŭ mienavita ciapier, navat zrazumieć nie mahu. Za toje, što vykazvaŭsia raniej, krytykavaŭ čynoŭnikaŭ? Nu, kolki možna… — razvažaje infarmavany surazmoŭca.
Siońnia 64-hadovy Bujalski nie maje pracy, ale pa-raniejšamu źviazany z baskietbołam: naviedvaje roznyja spartyŭnyja mierapryjemstvy, daje majstar-kłasy. Jak udałosia daviedacca, na dobraachvotnych pačatkach trenuje adnu z amatarskich kamand Minska, jakaja ŭdzielničaje ŭ Nieprafiesijnaj baskietbolnaj lizie.
A pra viartańnie ŭ prafiesijny baskietboł Biełarusi, jak ličać surazmoŭcy, śpiecyjalist možna zabycca.
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary