Łukašenka padpisaŭ praŭki ŭ Kodeks ab adukacyi. Što mianiajecca?

U paviedamleńni pres-słužby Łukašenki śćviardžajecca, što źmieny nakiravanyja na «pavyšeńnie efiektyŭnaści, jakaści i dastupnaści adukacyi, pašyreńnie dziaržaŭnaj abarony navučencaŭ, maładych śpiecyjalistaŭ i sacyjalna nieabaronienych katehoryj dziaciej i moładzi, a taksama na ŭzmacnieńnie adkaznaści subjektaŭ adukacyjnych adnosin».

Asnoŭnyja źmieny, jakija ŭvodziacca:

• Maładomu śpiecyjalistu, jakoha zvolnili ŭ suviazi z pryzyvam u vojska, ale nie nakiravali na słužbu, harantujecca jahonaja raniejšaja pasada na pracy.
• Miascovyja orhany ŭłady buduć mieć prava arhanizoŭvać biaspłatnuju pieravozku navučencaŭ u miežach bujnych nasielenych punktaŭ, kali ŭstanovy adukacyi znachodziacca daloka. Taksama miascovyja orhany mohuć arhanizoŭvać padvoz navučencaŭ na spartyŭnyja, adukacyjnyja i inšyja mierapryjemstvy. Siońnia taki padvoz isnuje tolki ŭ vioskach.
• U staršakłaśnikaŭ škoł, raźmieščanych u ahraharadkach i ŭ vioskach, budzie mahčymaść zasvoić prahramu padrychtoŭki kiroŭcaŭ miechaničnych transpartnych srodkaŭ (aŭtamabilaŭ) i samachodnych mašyn (naprykład, traktaroŭ).
• Kali niejkaja arhanizacyja nakiravała čałavieka vučycca pa metavym zapycie, a paśla skasavała damovu z maładym śpiecyjalistam ci nie vykanała jaje ŭmovy, to jaje abaviažuć viarnuć dziaržavie srodki, vydatkavanyja na navučańnie.
• Urad budzie mieć paŭnamoctvy vyznačać vypadki pieraraźmierkavańnia i pieranakiravańnia na pracu maładych śpiecyjalistaŭ, jakija pracujuć pa raźmierkavańni. Naprykład, ich pieranakiravańnie ŭ MUS, Śledčy kamitet ci Mytny kamitet. Heta značyć, kali čałaviek zachoča sa svajoj pracy pa raźmierkavańni pierajści ŭ MUS, urad budzie vyznačać, pry jakich umovach heta mahčyma.
• Indyvidualnyja pradprymalniki bolš nie zmohuć realizoŭvać prahramy daškolnaj i śpiecyjalnaj adukacyi. Heta značyć, IP nie buduć adkryvać pryvatnyja ŭstanovy dla dziaciej daškolnaha ŭzrostu i zajmacca adukacyjaj dziaciej ź psichafizičnymi asablivaściami. Hetaja miera zakranie małakamplektnyja dziciačyja sadki. Uletku hetaha hoda biełaruskija ŭłady nie praciahnuli licenzii bolšaści pryvatnych dziciačych sadkoŭ.
• Atrymać prezidenckuju stypiendyju možna budzie i pry navučańni na płatnym adździaleńni.
• Taksama dakumient praduhledžvaje abaviazkovy aficyjny styl adzieńnia dla navučencaŭ, šerah ilhot dla dziaciej-sirot i dziaciej ź invalidnaściu i mahčymaść hrantaŭ dla abituryjentaŭ z-za miažy, kab padrychtavacca da pastupleńnia (heta novaŭviadzieńnie zakranie moładź z krain Azii, Afryki i Łacinskaj Amieryki).

U lik piedahahičnych rabotnikaŭ uklučyli pryjomnych baćkoŭ i baćkoŭ-vychavalnikaŭ — «u metach pavyšeńnia ich statusu».

Akramia hetaha, novy dakumient uvodzić novy vid sacyjalna-piedahahičnaj ustanovy — dziciačy dom pry manastyry.

• 0
• 1
• 0
• 1
• 0
• 0
• 6
• 0