Zamiest rynačnaha i dziaržaŭnaha Łukašenka prydumaŭ novaje cenaŭtvareńnie
Alaksandr Łukašenka znoŭ uziaŭsia za ceny. Dziaržaŭnaje strymlivańnie, padobna, stała mieć «pabočku», a rynačnyja ceny Łukašenku nie zadavalniali nikoli. Ciapier jon prydumaŭ novy varyjant. Urad terminova pracuje nad im.
Urad raspracoŭvaje formułu spraviadlivaha cenaŭtvareńnia. Pra heta Alaksandr Łukašenka zajaviŭ 30 śniežnia ŭ mietro — na adkryćci novaha ŭčastka treciaj linii Minskaha mietrapalitena.
Pa jaho słovach, u pačatku studzienia jon praviadzie naradu z uradam pa vypracoŭcy spraviadlivaha cenaŭtvareńnia.
«Nie strymlivańnie cen. Moža, navat nie rehulavańnie cen. Ale pavinna być spraviadlivaja formuła cenaŭtvareńnia ŭ Biełarusi, kab nie było tak, jak raniej: čałaviek nie paśpieŭ zarobak atrymać — užo ceny dzieści vyraśli. Hetaha być nie pavinna. Baču, što bolš-mienš narmalna. Ale pavinna spraviadlivaja być cana. Formuła spraviadlivaha cenaŭtvareńnia — pierad uradam pastaŭlena zadača», — zajaviŭ Łukašenka.
Jon dadaŭ, što da hetaha pytańnia pavinny padklučycca i staličnyja ŭłady, pakolki «Minsk zaŭsiody ŭ avanhardzie takoj pracy».
«Nie treba na vodkup usio addavać. Usio pavinna być pad kantrolem, — skazaŭ jon. — Ludzi kryŭdzicca nie pavinny. Cenaŭtvareńnie pavinna spraviadlivym być. I tak, kab biznesmieny i ludzi, jakija handlujuć i vyrablajuć, nie biehali za vami: dazvolcie nam pavysić, dazvolcie toje, dazvolcie heta. Jany sami pavinny viedać, u jakim kalidory jany dziejničajuć. Tamu razam ź biźniesam siadajcie i vypracoŭvajcie. U pieršych čysłach studzienia dałažycie».
Ciapier čytajuć
Ipešnik u Minsku pisaŭ ananimki na kankurentaŭ, u tym liku i palityčnyja. Zafiksavana 18 epizodaŭ3
Kamientary