«Hazprom» pačaŭ źnižać cisk u trubapravodzie z Urenhoja ŭ Jeŭropu. Kampanija stracić jašče 5 młrd dalaraŭ

«Hazprom» 31 śniežnia budzie prapampoŭvać pamienšany abjom hazu ŭ Jeŭropu praz Ukrainu — apošni dzień pierad zakančeńniem pahadnieńnia, jakoje zabiaśpiečvała pastaŭki hazu na praciahu amal troch hadoŭ vajny.

Pastaŭki, chutčej za ŭsio, całkam spyniacca 1 studzienia paśla zakančeńnia piacihadovaha tranzitnaha pahadnieńnia pamiž Rasijaj i Ukrainaj, piša Reuters.

Uładzimir Pucin zajaviŭ 26 śniežnia, što ŭ hetym hodzie ŭžo nie zastałosia času dla padpisańnia novaha pahadnieńnia ab tranzicie hazu praz Ukrainu. Apošnija kupcy rasijskaha hazu, takija, jak Słavakija i Aŭstryja, užo damovilisia ab alternatyŭnych pastaŭkach, i analityki prahnazujuć minimalny ŭpłyŭ spynieńnia tranzitu rasijskaha hazu na rynak.

Cana na virtualnaj handlovaj placoŭcy Title Transfer Facility u Niderłandach, jakaja słužyć etałonam dla jeŭrapiejskich cen na pryrodny haz, u aŭtorak da pałovy dnia padniałasia niaznačna — da 48,85 jeŭra za miehavat-hadzinu.

Spynieńnie pastavak hazu budzie mieć značna bolšaje hieapalityčnaje značeńnie.

Z 2022 hoda, paśla ŭvarvańnia Rasii va Ukrainu, Maskva straciła svaju daminujučuju dolu ŭ pastaŭkach hazu krainam Jeŭrapiejskaha sajuza, sastupiŭšy pazicyi takim kankurentam, jak ZŠA, Katar i Narviehija. Heta adbyłosia na fonie namahańniaŭ ES pa skaračeńni zaležnaści ad rasijskaha hazu.

Kaliści najbujniejšy ŭ śviecie eksparcior hazu, padkantrolny dziaržavie «Hazprom» zafiksavaŭ stratu pamieram 7 miljardaŭ dołaraŭ tolki za 2023 hod — pieršyja hadavyja straty z 1999 hoda.

Dla Jeŭropy strata tannych rasijskich pastavak hazu spryjała značnamu ekanamičnamu spadu, rezkamu rostu inflacyi i paharšeńniu kryzisu koštu žyćcia.

Krainy ES chutka znajšli alternatyŭnyja krynicy enierhii, choć strata rasijskaha hazu pahłybiła doŭhaterminovyja aściarohi nakont źnižeńnia hłabalnaj kankurentazdolnaści Jeŭrasajuza, asabliva ŭ dačynieńni da budučyni niamieckaj pramysłovaści. Ale Jeŭropa nie mieła vybaru: jana nie mahła dazvolić, kab Rasija šantažavała jaje pastaŭkami ci niepastaŭkami hazu.

SSSR i Rasija na praciahu paŭstahodździa asvojvali značnuju dolu na jeŭrapiejskim hazavym rynku, jakaja na piku dasiahała 35%, ale vajna va Ukrainie praktyčna źniščyła hety biźnies dla «Hazprama».

Bolšaść rasijskich hazavych maršrutaŭ u Jeŭropu zakrytyja, uklučajučy hazapravod «Jamał — Jeŭropa» praź Biełaruś i «Paŭnočny patok» pa dnie Bałtyjskaha mora, jaki byŭ padarvany ŭ 2022 hodzie.

Pabudavany ŭ saviecki čas hazapravod praz Ukrainu dastaŭlaŭ haz ź Sibiry praz horad Sudža — ciapier jon znachodzicca pad kantrolem ukrainskich vojskaŭ — u Kurskaj vobłaści Rasii. Zatym haz pastupaje praz Ukrainu ŭ Słavakiju, dzie hazapravod dzielicca na adhalinavańni, jakija viaduć u Čechiju i Aŭstryju.

Kijeŭ admoviŭsia vieści pieramovy ab novym tranzitnym pahadnieńni. Ukraina admovicca ad kala 800 miljonaŭ dołaraŭ štohadovych tranzitnych zboraŭ z Rasii, tady jak «Hazprom» stracić kala 5 miljardaŭ dołaraŭ ad prodažaŭ hazu ŭ Jeŭropu praz Ukrainu.

Zaviaršeńnie tranzitnaha pahadnieńnia naŭrad ci vykliča paŭtareńnie skoku cen na haz u ES, jaki naziraŭsia ŭ 2022 hodzie, pakolki abjomy pastavak adnosna nievialikija.

U 2023 hodzie Rasija pastaviła praz Ukrainu kala 15 miljardaŭ kubamietraŭ hazu — heta ŭsiaho 8% ad pikavych abjomaŭ pastavak rasijskaha hazu ŭ Jeŭropu pa roznych maršrutach u 2018—2019 hadach.

«Hazprom» zajaviŭ, što ŭ aŭtorak adpravić 37,2 miljona kubamietraŭ hazu ŭ paraŭnańni z 42,4 miljona kubamietraŭ u paniadziełak.

Spynieńnie pastavak praz Ukrainu stanie surjoznym udaram dla Małdovy — krainy, jakaja kaliści była častkaj Savieckaha Sajuzu. Vienhryja praciahnie atrymlivać rasijski haz z poŭdnia praz hazapravod «Turecki patok» pa dnie Čornaha mora, chacia raniej jana była zacikaŭlenaja ŭ zachavańni ŭkrainskaha maršrutu.

• 12
• 1
• 1
• 1
• 0
• 0
• 0
• 0