Pryvatny samalot, jaki moh naležać Pabła Eskabaru, pieratvaryli ŭ raskošnaje žytło na Airbnb
Pryvatny reaktyŭny samalot, što raniej moh naležyć słavutamu i najbahaciejšamu narkabaronu Pabła Eskabaru, staŭ dasiažny dla pražyvańnia na papularnaj płatformie Airbnb. Voś jak abstalavany samalot znutry i kolki kaštuje adna noč (mienš, čym vy možacie padumać).
Samalot Boeing 727, jaki kaliści moh naležać (prynamsi, pavodle niekatorych źviestak) słavutamu narkabaronu Pabła Eskabaru, ciapier staŭ adnym z samych niezvyčajnych miescaŭ dla adpačynku ŭ śviecie. Na pramysłovaj terytoryi brytanskaha horada Brystal samalot byŭ pieratvorany ŭ sapraŭdny raskošny hatel i ŭžo vyklikaŭ vialikuju cikavaść turystaŭ, piša vydańnie New York Post.
41-hadovy brytanski pradprymalnik Džoni Pałmier, jaki inicyjavaŭ prajekt restaŭracyi samalota i paśla zrabiŭ jaho dasiažnym na papularnaj płatformie arendy žytła Airbnb, adznačyŭ, što zaŭsiody maryŭ vałodać pryvatnym samalotam, ale bieź nieabchodnaści na im lotać.
U 2012 hodzie, kali samalot ździejśniŭ svajo apošniaje padarožža, Pałmier ubačyŭ mahčymaść dla realizacyi svajoj mary. Jon atrymaŭ dazvoł haradskoj rady Brystala i pačaŭ šmathadovuju restaŭracyju łajniera. Usio ŭnutranaje abstalavańnie było palepšana zhodna z sučasnymi standartami jakaści, ale byŭ zachavany aŭtentyčny vyhlad aryhinalnaha interjeru 1981 hoda, kali samalot byŭ tolki pieratvorany ŭ elitny pryvatny łajnier.
«Unutry samalot uražvaje raskošnym interjeram: dva dvuchmiesnyja spalnyja pakoi z asobnymi tualetami i dušavymi kabinkami kožny, a taksama kanapami, jakija taksama možna pieratvaryć u łožki. Dapoŭniena heta ababitymi arechavym drevam ścienami, sapraŭdnaj załatoj santechnikaj, pryhožaj kuchniaj i aryhinalnaj kabinaj piłota, dzie možna zrabić unikalnyja fota. Usio heta ŭ spałučeńni z hidramasažnaj vannaj i ŭłasnaj saunaj na borcie stvaraje atmaśfieru žyćcia miljardera.
Ceny na pražyvańnie pačynajucca ad 300 dalaraŭ za noč i mohuć dasiahać da 1050 dalaraŭ u pik siezonu. Błohieram i artystam samalot moža być pradastaŭleny ŭvohule biaspłatna, kali jany, naprykład, zdymajuć u im muzyčnyja klipy ci fotasiesii dla mastackich patrebaŭ», — raspaviadaje Pałmier.
Niahledziačy na toje, što dakładnaja historyja łajniera dahetul zastajecca nieviadomaj, vakoł jaho isnuje mnostva lehiend. Pavodle adnoj ź ich, samalot niejki čas naležaŭ nienazvanamu arabskamu pryncu, pavodle inšaj — źjaŭlaŭsia ŭłasnaściu narkamafii, a niekatoryja navat śćviardžajuć, što jaho moh vykarystoŭvać sam Pabła Eskabar.
«Mnie ŭsio roŭna, chto byŭ jahonym uładalnikam u minułym. Hałoŭnaje, što ciapier jon prynosić ludziam pazityŭnyja emocyi.
Hetym miescam cikaviacca nie tolki turysty, ale i tyja, chto šukaje niezvyčajnyja ŭražańni, kab adčuć kantrast pamiž žyćciom zvyčajnaha čałavieka i miljardera. Ty žyvieš u hetaj fantazii niekalki dzion, a potym viartaješsia ŭ realny śviet, i hety kantrast moža być sapraŭdy karysny dla ludziej», — padahulniŭ brytanski pradprymalnik Džoni Pałmier.
Ciapier čytajuć
Biełaruskuju movu na CT vybiraje ŭsio mienšaja dola vypusknikoŭ škoł. Kali 20 hadoŭ tamu jaje zdavała amal pałova, ciapier — tolki kožny šosty7
Kamientary
...
sauna ŭ łajniery? kali b lotaŭ z saunaj, cikava było b