Administracyja Bajdena raskryła sakretnyja danyja pra dapamohu Ukrainie ŭ vytvorčaści dronaŭ

Amierykanskija čynoŭniki zajavili 16 studzienia, što jany zrabili vialikija inviestycyi, jakija dapamahli Ukrainie pačać i pašyryć vytvorčaść bieśpiłotnikaŭ. Značnaja častka amierykanskaj dapamohi ŭkrainskim vajskoŭcam, uklučajučy miljardy dalaraŭ na rakiety, sistemy supraćpavietranaj abarony, tanki, artyleryju i vučeńni, była abvieščanaja hramadskaści. Ale inšaja padtrymka ŭ značnaj stupieni zastajecca ŭ ciani.

Pa słovach amierykanskich aficyjnych asob, hetaja padtrymka ŭklučała dapamohu Ukrainie ŭ raspracoŭcy novaha pakaleńnia bieśpiłotnikaŭ, jakija, sa słoŭ amierykanskich čynoŭnikaŭ, revalucyjanizujuć sposaby viadzieńnia vajny.

Džejk Salivan, daradca pa nacyjanalnaj biaśpiecy ZŠA, skazaŭ, što hetaja padtrymka akazvaje «realny stratehičny ŭpłyŭ» na vajnu.

«My bačyli, jak BPŁA stanoviacca ŭsio bolš centralnym elemientam baraćby va Ukrainie i buduć centralnym elemientam usich budučych bajoŭ», — skazaŭ Salivan.

ZŠA vydzielili srodki na padtrymku vytvorcaŭ bieśpiłotnikaŭ i zakupku zapčastak da ich. Sa słoŭ ludziej, jakija viedajuć pra hetyja namahańni, Złučanyja Štaty taksama nakiravali va Ukrainu supracoŭnikaŭ raźviedki dla dapamohi ŭ raspracoŭcy prahramy.

U intervju na hetym tydni dyrektar CRU Uiljam Bierns uskosna zhadaŭ pra padtrymku jahonym viedamstvam prahramy bieśpiłotnikaŭ va Ukrainie.

Salivan skazaŭ, što namahańni pa vykarystańni bieśpiłotnikaŭ pačalisia paśla pieršaha kontrnastupleńnia ŭkraincaŭ vosieńniu 2022 hoda, kali stali zrazumiełyja miežy zvyčajnych mahčymaściaŭ Ukrainy.

Pa słovach Salivana, hetyja namahańni paskorylisia pry padrychtoŭcy da druhoha kontrnastupleńnia Ukrainy, jakoje akazałasia mienš paśpiachovym. Ukraina nie zavajavała stolki pazicyj, kolki chacieła, zbolšaha praz vykarystańnie Rasijaj bieśpiłotnikaŭ.

Paśla kontrnastupleńnia amierykanskija aficyjnyja asoby zajavili, što jany chutka pavialičyli padtrymku ŭkrainskim vytvorcam bieśpiłotnikaŭ, abapirajučysia na namahańni Kijeva pa raźvićci ŭłasnaj pramysłovaści. Akramia finansavaj dapamohi, administracyja Bajdena pracavała nad naładžvańniem suviaziaŭ pamiž amierykanskimi technałahičnymi kampanijami i ŭkrainskimi vytvorcami bieśpiłotnikaŭ.

Minułaj vosieńniu Pientahon vydzieliŭ 800 miljonaŭ dalaraŭ na vytvorčaść bieśpiłotnikaŭ va Ukrainie, jakija byli vykarystanyja na zakupku kampanientaŭ dla bieśpiłotnikaŭ i finansavańnie vytvorcaŭ dronaŭ.

Padčas vizitu Prezidenta Ukrainy Uładzimira Zialenskaha ŭ Bieły dom u vieraśni 2024-ha prezident ZŠA Džo Bajden zajaviŭ, što jašče 1,5 miljarda dalaraŭ budzie nakiravana na ŭkrainskuju industryju bieśpiłotnikaŭ. Amierykanskija aficyjnyja asoby zajavili 16 studzienia, što, na ich dumku, hetyja inviestycyi zrabili ŭkrainskija bieśpiłotniki bolš efektyŭnymi i śmiertanosnymi. Jany adznačyli, što ŭkrainskija marskija bieśpiłotniki źniščyli čverć Čarnamorskaha fłotu Rasii, i što bieśpiłotniki, raźmieščanyja na linii frontu, dapamahli zapavolić prasoŭvańnie Rasii na ŭschodzie Ukrainy.

Salivan skazaŭ, što imknieńnie pabudavać ukrainskuju industryju bieśpiłotnikaŭ dało» biascennyja ŭroki», jakija administracyja Bajdena pačała intehravać va ŭłasnuju abaronnuju pramysłovaść Amieryki.

Raniej dziejny kiraŭnik Pientahona Łojd Ościn i dziaržsakratar ZŠA Entani Blinkien u supolnaj kałoncy dla vydańnia The New York Times patłumačyli niebiaśpieku skaračeńnia vajskovaj dapamohi Ukrainie i zaŭčasnaha spynieńnia ahniu. A prezident Džo Bajden u svajoj raźvitalnaj pramovie zhadaŭ Ukrainu ŭ kantekście zamiežnapalityčnych dasiahnieńniaŭ i taho, jak jon «umacavaŭ NATA».

• 5
• 0
• 0
• 0
• 0
• 0
• 0
• 1