U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak

Kolki hrošaj Epštejn adpraviŭ u Biełaruś

U apublikavanych sudovych dakumientach «Lusterka» znajšło dva płaciežnyja daručeńni ab pieravodach hrošaj u Minsk. Abodva padpisanyja Džefry Epštejnam.

Pieršy pieravod — 14 studzienia 2013 hoda na sumu 10 tysiač dalaraŭ. Druhi — 15 kastryčnika taho samaha hoda na sumu 20 tysiač dalaraŭ.

Imia kančatkovaha atrymalnika hrošaj u apublikavanych staronkach schavanaje. Paznačany, adnak, kod banka atrymalnika, a taksama adras u Minsky Belarus pa vulicy Koriskogo. Vierahodna, havorka pra vulicu Karyckaha ŭ Minsku, raźmieščanuju niepadalok ad stancyi mietro «Partyzanskaja».

Pavialičyć

Pavialičyć

Kamu kankretna ŭ Biełarusi pieravodziŭ hrošy amierykanski finansist — napeŭna skazać ciažka. Adnak ža pavodle źviestak troch anłajn-daviednikaŭ pa paznačanym u dakumientach adrasie žyŭ čałaviek z proźviščam Šulak. Mienavita takoje proźvišča nosić biełaruska, jakuju ŚMI nazyvali siabroŭkaj Džefry Epštejna.

Pavialičyć

Što było viadoma pra biełaruskuju dziaŭčynu finansista

Karynie Šulak ciapier 36 hadoŭ. Jana vypusknica minskaj škoły i byłaja studentka BDMU. Upieršyniu jana pryjechała ŭ ZŠA ŭ 2009 hodzie, kali joj było 20 hadoŭ, paviedamlała vydańnie Daily Mail. Miarkujecca, što nieŭzabavie jana sustreła Epštejna.

U 2010 hodzie finansist vyzvaliŭsia paśla 13‑miesiačnaha źniavoleńnia ŭ turmie pa abvinavačvańni va ŭciahvańni niepaŭnaletniaj u prastytucyju. Tady «ŭsie adviarnulisia ad jaho, akramia Karyny, jakaja była pobač da apošniaha», śćviardžali krynicy Daily Mail. Jany nazyvali jaje ščyraj, dobraj, prystojnaj dziaŭčynaj, jakaja «była pa-varjacku zakachanaja ŭ jaho».

Pavialičyć

Daily Mail śćviardžała, što Epštejn apłaciŭ darahoje lačeńnie maci Karyny i dapamoh z hrašyma dla doma jaje baćkoŭ, jakija žyli ŭ Minsku.

Pačynajučy z 2013 hoda miescam rehistracyi biełaruski značyŭsia adzin ź Virhinskich astravoŭ ZŠA, jaki znachodziŭsia ŭ pryvatnaj ułasnaści Epštejna.

U kastryčniku 2013‑ha Šulak zaklučyła adnapoły šlub z pamočnicaj finansista Dženifier Kalin. Žurnalisty śćviardžali, što šlub byŭ fiktyŭnym — dla taho, kab dziaŭčyna mahła zastavacca ŭ Štatach. Praz šeść hadoŭ jon byŭ skasavany.

Pavialičyć

Jak Epštejn dapamahaŭ biełaruscy pačać praktyku ŭ ZŠA (ale niešta nie zrasłosia)

U apublikavanych ciapier dakumientach jość pierapiski, jakija tyčacca taho, što Epštejn braŭ aktyŭny ŭdzieł u karjery Karyny Šulak u ZŠA. U 2015 hodzie dziaŭčyna skončyła Tyčers kaledž u Kałumbijskim univiersitecie. Jaje śpiecyjalnaściu była stamatałohija.

U mai Epštiejn asabista daručyŭ daviedacca pra licenzavańnie stamatołahaŭ, pakolki «Karyna hatovaja pačynać». Finansist pisaŭ niepasredna da Siesil de Jonh — žonki tahačasnaha hubiernatara Virhinskich astravoŭ. Taja dasłała infarmacyju, ale praces zaciahnuŭsia.

U vieraśni finansist spytaŭ, ci varta padklučyć niejkaha Rendzi — vierahodna, upłyvovaha čynoŭnika. De Jonh aściarožna adkazała: «Rendzi nie zusim dypłamatyčny, i ja nie chaču, kab členy rady adčuli, što na ich cisnuć, kab uchvalić Karynu».

Niezrazumieła, ci dapamoh Rendzi, ale ŭ listapadzie Šulak atrymała nieabchodnyja dla pracy dakumienty. Dziaŭčyna pierasłała ich Epštejnu, a toj — jašče niekalkim adrasatam z karotkim kamientarom «nastupny barjer».

Pavialičyć

Skrynšoty pierapiski z rasśledavańnia pa spravie Epštejna, apublikavanaha na sajcie Ministerstva justycyi ZŠA / justice.gov

Pa danych aficyjnych rejestraŭ, tady ž — u listapadzie 2015 hoda — Karyna atrymała licenzii dla pracy dantystam u amierykanskich štatach Kalifornija i Fłaryda.

Składana skazać, pracavała biełaruska pa śpiecyjalnaści ci abmiežavałasia atrymańniem dakumientaŭ. Jaje kabiniet byŭ zarehistravany pa tym ža samym adrasie, što i rezidencyja Epštejna.

Na momant publikacyi termin kalifarnijskaj licenzii Karyny ŭžo praminuŭ, fłarydskaja sapraŭdnaja, ale maje paznaku «nie praktykuje».

Na adnoj z fatahrafij z asabniaka Epštejna možna pabačyć stamatałahičnaje kresła, akružanaje maskami. ŚMI nazyvali hetaje miesca «adnym z samych dziŭnych pamiaškańniaŭ». Składana skazać, jakoj była meta pakoja i ci byvała tam Karyna.

Pavialičyć

Interjer asabniaka na vostravie Litł-Sent-Džejms, jaki raniej naležaŭ finansistu i asudžanamu seksualnamu złačyncu Džefry Epštejnu. Fota: Kamiteta pa nahladzie Pałaty pradstaŭnikoŭ u Vašynhtonie, 3 śniežnia 2025 hoda

Apošniaja razmova i miljonnaja spadčyna

U lipieni 2019 hoda Epštejna znoŭ zatrymali, hetym razam pa abvinavačvańni ŭ handli ludźmi z metaj ich seksualizavanaj ekspłuatacyi. U žniŭni taho samaha hoda jon paviesiŭsia.

Pavodle infarmacyi The New York Times, Karyna Šulak była apošnim čałaviekam, jakomu finansist telefanavaŭ pierad śmierciu. U apublikavanych materyjałach spravy zhadvajecca taja razmova. U ich schavana imia abanienta (fihuruje jak «asoba 1»), adnak paznačana, što heta była žančyna.

Sama Karyna admoviłasia razmaŭlać sa śledčymi, infarmacyju pieradaŭ jaje advakat. Toj śćviardžaŭ, što na momant zvanka jaho padabaronnaja znachodziłasia ŭ Biełarusi. Aŭtary spravazdačy nie praviarali hety momant, ale technična heta było mahčyma.

Razmova była na asabistyja temy, «takija jak knihi, muzyka i hihijena padčas źniavoleńnia», vynikaje z dakumienta. «Epštejn skazaŭ asobie 1: «Jany sprabujuć harantavać maju biaśpieku», i što jaho sprava zojmie trochi bolš času, čym jon pieršapačatkova dumaŭ. Jon skazaŭ asobie 1, što kachaje jaje, kab jana była mocnaj, i što jon nie zmoža patelefanavać joj znoŭ u najbližejšy miesiac», — cytuje dakumient apošniuju razmovu finansista.

Za dva dni da śmierci Epštejn skłaŭ tastamient, pakinuŭšy ŭsio svajo bahaćcie stvoranamu ŭ toj ža dzień trastu. Jaho kančatkovyja bienieficyjary zasakrečanyja. Pavodle infarmacyi The New York Times, Šulak uvachodzić u ich lik. Sama jana admaŭlałasia što-niebudź kamientavać žurnalistam.

Pieršapačatkova spadčyna Epštejna aceńvałasia ŭ 600 miljonaŭ dalaraŭ. Z hetaj sumy byli vypłačanyja kampiensacyi achviaram jaho złačynstvaŭ — kala 200 čałaviek atrymali prykładna 164 miljony. Jašče 105 miljonaŭ vypłačanyja ŭradu Virhinskich astravoŭ, byŭ pahašany kredyt na 30 miljonaŭ.

U studzieni 2025‑ha sumu, jakaja zastavałasia ad spadčyny, aceńvali ŭ 145 miljonaŭ dalaraŭ.

• 7
• 1
• 8
• 9
• 9
• 0
• 3
• 1