Capkała: Mnie pazvaniŭ Koŭł, i ja paraiŭ jamu nie sustrakacca ź Cichanoŭskaj
Adzin z udzielnikaŭ prezidenckaj vybarčaj kampanii 2020 hoda, a ciapier daradca Ałbanskaj inviestycyjnaj karparacyi Valeryj Capkała raskazaŭ, što rehularna sazvońvajecca ź śpiecspasłańnikam Trampa Džonam Koŭłam.
U intervju jutub-kanału The Insider Live Valeryj Capkała raskazaŭ, što ŭ chutkim časie paśla taho, jak Tramp pazvaniŭ Łukašenku, jamu pazvaniŭ Džon Koŭł.
«My ź im stelefanoŭvajemsia prykładna raz na tydzień», — śćviardžaje Capkała.
Były ŭdzielnik prezidenckaj vybarčaj kampanii 2020 hoda davodzić, što prasiŭ Koŭła «nijakim čynam hetuju temu (vyzvaleńnie palitviaźniaŭ — NN) nie vynosić u palityčny aśpiekt i nie sustrakacca ź Cichanoŭskaj».
Jak tłumačyć Capkała, jon razumieŭ, što «heta sarvie dypłamatyčnyja namahańni, jakija ŭžo pačalisia».
«Jany (Ofis Cichanoŭskaj — NN) b adnaznačna heta prypisali sabie, u masavaj śviadomaści jany b heta raspaŭsiudzili, i kali b takoje adbyłosia, to heta tut ža spyniła b praces vyzvaleńnia palitviaźniaŭ, jak heta adbyłosia niedzie prykładna ŭ 2021 hodzie», — praciahvaje Capkała.
Pa jaho słovach, tady Pavieł Łatuška zajaviŭ, što Łukašenka nibyta źbirajecca vypuścić Viktara Babaryku i adpravić jaho za miažu razam z synam i jašče šeraham palitviaźniaŭ.
«Albo jon chłusiŭ i ŭ jaho nie było nijakich danych, albo, kali ŭ jaho takija danyja byli, heta zatrymała Viktara Babaryku i inšych palitviaźniaŭ u turmie jašče na 4 hady.
Ja vydatna razumieŭ, što lubaja publičnaść u hetym pytańni i prypisvańnie sabie zasłuh da taho, jak asnoŭnyja palitviaźni buduć vyzvalenyja, moža sarvać dypłamatyčnyja namahańni. Ja pra heta Koŭłu kazaŭ», — davodzić daradca Ałbanskaj inviestycyjnaj karparacyi.
Važnym momantam Capkała nazyvaje kalektyŭnyja listy nobieleŭskich łaŭreataŭ:
«Koŭł niejak patelefanavaŭ mnie i cikaviŭsia, ci infarmujem my nobieleŭskich łaŭreataŭ pra ŭsie namahańni. Naturalna, my adrazu prainfarmavali ich, sabrali reakcyju, jany padziakavali Trampu za hetyja namahańni. Jany paprasili jaho praciahvać namahańni, kab usie palitviaźni byli vyzvalenyja».
Pavodle słoŭ Capkały, padčas čarhovaha zvanka Džon Koŭł, niedzie ŭ listapadzie 2025 hoda, paviedamiŭ jamu, što ŭ najbližejšy čas — «na nastupnym tydni ci praz tydzień» — na volu moža vyjści jašče tysiača biełaruskich palitviaźniaŭ. Capkała śćviardžaje, što nakiravaŭ hetuju infarmacyju ŭ MZS niekalkich krain.
«Ale potym my padumali pra toje, što pažadana było b zafiksavać heta na papiery. My padrychtavali prajekt pahadnieńnia, nakiravali jaho Koŭłu, jaki moh by zrabić hety praces niezvarotnym pa mienšaj miery dla tych ludziej, jakich vyzvalajuć. (…) I prykładna praz tydzień, moža, praź dzion dziesiać Koŭł atrymlivaje farmalny status [śpiecpradstaŭnika]», —
davodzić daradca Ałbanskaj inviestycyjnaj karparacyi.
«Ja ŭ jaho nie pytaŭsia, ci źviazana heta z našaj prapanovaj fiksavać damoŭlenaści, jakija zaklučajucca z Łukašenkam, na papiery, ci heta moža być było vypadkova, ale jano chranałahična vielmi cikava supała», — padsumoŭvaje były palityk.
Praŭda, 1000 palitviaźniaŭ pakul tak i nie vyjšła.
Valeryj Capkała pavinšavaŭ palitviaźniaŭ z vyzvaleńniem i namiaknuŭ, chto nasamreč dabiŭsia ich svabody
Capkała: Čamu za piać hadoŭ nivodzin z tak zvanych ofisaŭ i kabinietaŭ nie damohsia vyzvaleńnia nivodnaha palitviaźnia?
«A što my mahli ŭvohule čakać ad Łukašenki? Što jon nie budzie ździekavacca?» Cichanoŭskaja pra vyzvaleńnie palitviaźniaŭ i vysyłku ich va Ukrainu
Kamientary
Odna komanda .