U Łatvii biełarusam chočuć zabaranić pracavać u kiravańni krytyčnaj infrastrukturaj
Papraŭki ab novych abmiežavańniach suprać hramadzian Rasii i Biełarusi padrychtavała MUS Łatvii.
Papraŭki zabaraniajuć hramadzianam Rasii i Biełarusi pracavać u strukturach kiravańnia krytyčnaj infrastrukturaj Łatvii i asabliva značnaj u jeŭrapiejskim maštabie krytyčnaj infrastrukturaj.
Krytyčnaj infrastrukturaj ličacca raźmieščanyja ŭ Łatvii abjekty, sistemy abo ich častki, važnyja dla realizacyi važnych hramadskich funkcyj, a taksama achovy zdaroŭja, zabieśpiačeńnia biaśpieki, ekanamičnaha abo sacyjalnaha dabrabytu ludziej, piša Delfi.
«U metach umacavańnia abarony važnaj dla biaśpieki Łatvijskaj dziaržavy i hramadstva krytyčnaj infrastruktury papraŭki praduhledžvajuć, što ŭładalnik krytyčnaj infrastruktury, sapraŭdny vyhadanabytčyk abo pravavy ŭładalnik pavinien być łajalny Łatvii i jaje Kanstytucyi, pry hetym jamu zabaraniajecca akazvać padtrymku, u tym liku infarmacyjnuju, asobam abo dziaržavam, pahražajučym terytaryjalnaj niepadzielnaści, suvierenitetu i niezaležnaści abo kanstytucyjnamu ładu demakratyčnych dziaržaŭ», — paviedamlaje ahienctva LETA.
Papraŭki taksama praduhledžvajuć, što Rasija abo Biełaruś, jaje hramadzianie abo jurydyčnyja asoby, zarehistravanyja ŭ Rasii abo Biełarusi, nie mohuć być uładalnikam, kiraŭnikami abo sapraŭdnym bienieficyjaram krytyčnaj infrastruktury abo asabliva značnaj u jeŭrapiejskim maštabie infrastruktury.
Hramadzianam Rasii abo Biełarusi budzie zabaroniena zajmać pasady ŭ strukturach kiravańnia krytyčnaj infrastrukturaj i asabliva značnaj u jeŭrapiejskim maštabie krytyčnaj infrastrukturaj.
Akramia taho, hramadzianie Biełarusi i Rasii nie zmohuć uładkoŭvacca na pracu abo akazvać pasłuhi ŭ krytyčnaj infrastruktury abo ŭ asabliva značnaj u jeŭrapiejskim maštabie krytyčnaj infrastruktury, kali pradastaŭleńnie pasłuh uklučaje ŭ siabie dostup da infarmacyi abo technałahičnaha abstalavańnia, značnych dla funkcyjanavańnia krytyčnaj infrastruktury.
Papraŭki praduhledžvajuć, što hramadzianie Biełarusi abo Rasii zmohuć vykonvać pracu ŭ krytyčnaj infrastruktury abo jeŭrapiejskaj krytyčnaj infrastruktury ŭ paradku vyklučeńnia tolki na padstavie asobnaha dazvołu orhana dziaržaŭnaj biaśpieki.
Zakonoprajekt jašče naležyć razhledzieć ŭradu, a zatym pryniać parłamientu.
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja26
Kamientary