U budynku, dzie raniej byŭ dziciačy sad, ciapier poŭnym chodam ramont. Pra historyju piša BGmedia.
Što adbyłosia?
Biełarus padzialiŭsia videarolikam u TikTok, u jakim raskazaŭ pra spaŭnieńnie mary mnohich darosłych — pakupku budynka, ź jakim źviazanyja ŭspaminy pieršych hadoŭ žyćcia. Pa słovach aŭtara videa, tydzień tamu jon staŭ uładalnikam budynka dziciačaha sadka, ź jakoha vypuściŭsia 30 hadoŭ tamu.
Były Arančycki dziciačy sad № 16, jaki spyniŭ pracu dva hady tamu, raźmiaščajecca ŭ adnajmiennaj vioscy Pružanskaha rajona pa adrasie vuł. Pracoŭnaja, 13. Budynak adnapaviarchovy, cahlany, byŭ uźviedzieny ŭ 1972 hodzie.
Mužčyna prademanstravaŭ padpisčykam svaje novyja ŭładańni: zbudavańnie pryjšło ŭ zaniapad, choć ścieny i dach vizualna cełyja. Terytoryja abharodžana draŭlanym płotam žoŭta-siniaha koleru. Na hałoŭnym uvachodzie naviedvalnikaŭ sustrakaje aŭtentyčnaja raźbianaja brama z vavioračkaj i eks-nazvaj dziciačaha sada «Vavierčania». Vyhladaje jana całkam achajna: byccam afarbavanaja zusim niadaŭna.
«Tut byli domiki, areli, ciapier hetaha ničoha niama. Zastaŭsia tolki budynak, pustka, voś tak jon vyhladaje», — kamientuje aŭtar.
Arančycki dziciačy sad byŭ začynieny ŭ 2023 hodzie, ustanova adukacyi «źliłasia» ź dziciačym sadam u susiednim ahraharadku Linova. U im majecca spartyŭnaja i muzyčnaja zały, basiejn, miedycynski błok, dy i budynak vyhladaje bolš cyvilna. Vidavočny minus — ciapier, kab trapić u dziciačy sad, žycharam Arančyc davodzicca pierachodzić čyhunku.
U inšych videa biełarus pakazaŭ interjer dziciačaha sadka, a dakładniej toje, što ad jaho zastałosia.
La ŭvachodu znachodzicca raspranalnia z roznakalarovymi šafkami, znajomymi mužčynu jašče ź dziciačych hadoŭ. Zachavałasia karcina z palmami, dziciačyja malunki i stend z nadpisam «Našy spravy».
Druhi pakoj zbolšaha pusty, u im dzieci hulali i prymali ježu. U vannaj i prybiralni zachavałasia savieckaja kafla. Zaraz va ŭsich pamiaškańniach idzie demantaž pakryćcia i ŭstanoŭka padłohi z padahrevam.
«Paralelna prybirajecca plitka, padłoha. Usio heta budzie razvalvacca, vynosicca i rabicca ciopłaja padłoha», — raskazvaje ŭładalnik nieruchomaści.
Niahledziačy na cikavaść hledačoŭ, svaju zadumku, što ž u rešcie rešt adkryjecca na miescy dziciačaha sadka ŭ budučyni, aŭtar videa trymaje ŭ sakrecie.
U asobnaj publikacyi biełarus pakazaŭ pamiatnuju plitu studenckaha budaŭničaha atrada «Bryhancina», urezanuju ŭ cahlany fasad. Jon dapuskaje, što za joj moža znachodzicca kapsuła času, jakija časta pakidali ŭ savieckich ustanovach adukacyi.
Što viadoma pra abjekt?
Sa źviestak Biełaruskaj univiersalnaj tavarnaj biržy vynikaje, što akramia budynka dziciačaha sadka płoščaj 313,2 kv.m, na terytoryi znachodzicca chleŭ z padvałam, dźvie letnija vierandy, płot, darožka, kanalizacyjnaja sietka, kacioł i pompa. Pradaviec — adździeł pa adukacyi Pružanskaha rajvykankama.
Ziamielny ŭčastak dazvolena vykarystoŭvać dla raźmiaščeńnia abjektaŭ pramysłovaj vytvorčaści, hramadskaha charčavańnia, akazańnia pasłuh, handlu, budaŭnictva i absłuhoŭvańnia žyłoha doma. Termin arendy — 20 hadoŭ.
Učastak vystaŭlali na prodaž niekalki razoŭ. Startavaja cana była 69 702 rubli (u sakaviku 2024 hoda). Apošni raz u listapadzie abjekt pradavali za try bazavyja vieličyni.
Mužčyna piša, što kupiŭ były dziciačy sadok u śniežni.
Ciapier čytajuć
Łukašenka: U amierykancaŭ niama nijakaha płana, jany prosta zandujuć hlebu13
Kamientary