Čamu lidar Armienii sumuje pad Ziemfiru i Łedzi Hahu? Što z novym vobrazam Pašyniana
Łysy mužčyna siarednich hadoŭ siadzić i słuchaje Ziemfiru, armianski šanson i narodnyja pieśni, Adel, Džona Lenana, francuzski i ruski rep, hrupu DDT, baročnuju muzyku i cyhanski ramans Vysockaha. Na hetych videa jon žmurycca ŭ soniečnych promniach, zaviazvaje halštuk, kładzie žoŭtuju ružu ŭ nahrudnuju kišeniu pinžaka abo drukuje na kampjutary. Ale čaściej za ŭsio hladzić pierad saboj — to z uśmieškaj, to zadumienna, a to i žurbotna.
Hety mužčyna — premjer-ministr Armienii Nikoł Pašynian. U červieni 2026 hoda ŭ krainie projduć parłamienckija vybary, i napiaredadni vybarčaj kampanii palityk staŭ mianiać svoj publičny vobraz, piša Bi-bi-si.
Ciapier da vykryvalnych tyrad suprać apanientaŭ dadalisia videa, na jakich jon moŭčki słuchaje muzyku.
«Drennyja časy zakančvajucca. Možna pierastać haravać i bajacca i pačać žyć dalej. I radavacca žyćciu», — tak interpretuje novy styl armianskaha lidara palitołah Mikaeł Zalan, u minułym deputat ad kirujučaha błoka Pašyniana.
Amierykanskaja pijar-stratehija ci čystaje natchnieńnie?
Muzyčnyja videa — sposab Pašyniana pažadać dobraj ranicy svaim padpisčykam i vykazać svaju luboŭ da ich. Prynamsi, tak jon tłumačyć heta sam — u podpisach da rolikaŭ, a taksama pakazvajučy rukami «sercajka».
Siensacyjaj siarod postsavieckaj moładzi stała videa, dzie palityk siadzić z sumnym vyrazam tvaru pad pieśniu Ziemfiry «PMMŁ». Jano vyjšła ŭ kastryčniku i z tych časoŭ nabrała bolš za 16 młn prahladaŭ u instahramie. Tady tysiačy karystalnikaŭ vykładvali ŭłasnyja parodyi ŭ tyktoku, a biznesy vykarystoŭvali miem dla rekłamy. I kali ŭ siarednim videa Pašyniana nabirajuć kala 100 tysiač prahladaŭ, to ŭ rolikaŭ z muzykaj ich časta bolš za miljon.
Na staronku Pašyniana ŭ instahramie padpisalisia ludzi, nie źviazanyja z Armienijaj. Videa pad pieśniu kazachskaj śpiavački Aua Rai, zroblenaje premjeram padčas vizitu ŭ Astanu, aśviatlałasia ŭ miascovych ŚMI ledź nie bolš, čym sam vizit.
Pajezdki Pašyniana ŭ Rasiju taksama byli nahodaj prademanstravać vielmi eklektyčny muzyčny hust. Naprykład, z Maskvy jon vitaŭ svaich padpisčykaŭ vyhladam na budynak FSB na Łubiancy i pieśniaj «Biełyja ružy» hurta «Łaskavy maj». A niekalki dzion tamu, prylacieŭšy ŭ Sankt-Pieciarburh, jon słuchaŭ «Dačakajsia» hurta Uma2rman.
Ale kamu pryjšła ŭ hałavu ideja hetych rolikaŭ i chto vybiraje muzyku dla ich?
U listapadzie rasijski markietołah Jahor Bałkonski pierakazaŭ dakład amierykanskaha pijarščyka na profilnaj kanfierencyi. U im nibyta havaryłasia, što za dziŭnymi videa Pašyniana staić ńju-jorkskaja kampanija Edelman — adno z samych vialikich pijar-ahienctvaŭ u śviecie.
Hetaja historyja raźlaciełasia pa armianskim miedyja-poli, i mnohija ŭ Armienii ŭpeŭnienyja, što Edelman kansultuje premjer-ministra.
Adnak u Edelman kateharyčna admaŭlajuć hetuju viersiju. Kampanija nie pracuje na premjer-ministra Armienii i nie źviazana ź jaho sacsietkami, skazaŭ pradstaŭnik u adkaz na zapyt Bi-bi-si.
«Ja nie viedaju, ci pracuje hetaja kampanija z uradam Armienii. Ja sudžu tolki pa słovach śpikiera i niekatorych słajdach, jakija milhali na ekranie», — adkazaŭ Jahor Bałkonski na pytańnie Bi-bi-si.
Viersiju pra ŭdzieł amierykanskaj kampanii abvierhła i pres-sakratar premjer-ministra Nazieli Bahdasaran. Ideja zdymać videa pad muzyku naležyć samomu Pašynianu, i jon asabista vybiraje muzyku dla ich, skazała jana ŭ kamientary Bi-bi-si.
«U raspracoŭcy stratehii premjer-ministra ŭ sacsietkach nie zadziejničany nijakija pijar-kampanii i kansultanty. Usia adpaviednaja praca pravodzicca miedyjakamandaj ofisa premjer-ministra», — dadała Bahdasaran.
Ad revalucyjaniera da dziaržaŭnika
Pryjšoŭšy da ŭłady ŭ 2018 hodzie, Pašynian zachapiŭ rozumy žycharoŭ Armienii i ich suajčyńnikaŭ u dyjaspary, staŭšy samym papularnym lidaram krainy za stahodździe. Ale praz dva hady Armienija prajhrała ŭ Druhoj karabachskaj vajnie, a ŭ vieraśni 2023 hoda amal usie karabachskija armianie źbiehli paśla taho, jak Azierbajdžan viarnuŭ uvieś rehijon pad svoj kantrol.
Mnohim u Jerevanie i pa ŭsioj krainie zdavałasia, što kraina zajšła ŭ tupik i dalej budzie tolki horš. Ale hetym letam adbyŭsia dypłamatyčny praryŭ — razradka z Azierbajdžanam i zaćviardžeńnie tekstu mirnaj damovy. Paśla niekalkich hadoŭ biezvynikovych starańniaŭ i paražeńniaŭ jaho partyi na miascovych vybarach abvieščany Pašynianam «paradak dnia miru» pačaŭ davać płady.
Ciapier jaho zadača — zarazić aptymizmam vybarščykaŭ. Sacsietki słužać asnoŭnaj placoŭkaj dla hetaha, i ŭ hetym u jaho jość unikalny dośvied.
Pratesty 2018 hoda, jakija pryviali jaho da ŭłady, arhanizoŭvalisia praz fejsbuk. Anłajn-tranślacyi z pramovami Pašyniana hladzieli sotni tysiač čałaviek. Navat toj fakt, što jon vykarystoŭvaŭ razmoŭnuju, a nie farmalna-litaraturnuju movu televiadučych i čynoŭnikaŭ, začaroŭvaŭ hledačoŭ.
Adrazu paśla źmieny ŭłady mnohija žartavali, što Armienija ciapier kirujecca praz fejsbuk, uspaminaje Tyhran Hryharan, dyrektar «Rehijanalnaha centra demakratyi i biaśpieki» ŭ Jerevanie.
«Heta byŭ dziŭny trend — čynoŭniki, uklučajučy premjer-ministra, viali pramyja efiry sa svaich pracoŭnych kabinietaŭ. Premjer-ministr pakazvaŭ svaju rezidencyju», — kaža Hryharan.
Ale paśla Druhoj karabachskaj vajny ŭłady stali bolš zakrytymi — časy nie spryjali viralnamu kantentu ŭ sacsietkach.
«Paśla vajny [Pašynian] staraŭsia siabie bolš strymana vieści. Jaho žonka praciahvała vieści sacsietki ŭ bolš volnym styli, i jaje mnohija za heta krytykavali. Što jana jak by nie ŭličvaje, u jakija časy žyviem, što była vajna, što było šmat achviar. Dumaju, što tamu jon staraŭsia być bolš strymanym», — kaža Mikaeł Zalan.
Ale pieryjad žałoby dla Pašyniana skončyŭsia, i pačałasia vybarčaja kampanija. Kirujučaja partyja ŭmieła vykarystoŭvaje miedyjaresursy i sacsietki dla palityčnaj baraćby, kaža Tyhran Hryharan. Pavodle jaho słoŭ, vakoł Pašyniana vyrasła «cełaja infrastruktura palityčnych błohieraŭ».
«Usie hałoŭnyja členy kirujučaj partyi vielmi aktyŭnyja ŭ sacsietkach, moładzievych sacsietkach», — kažuć Hryharan, majučy na ŭvazie instahram i ciktok.
Palitołah adznačaje, što, pa danych sacapytańniaŭ, mienš za ŭsio Pašyniana i jaho ŭrad padtrymlivaje mienavita moładź — i zaraz ułady sprabujuć bolš aktyŭna pracavać ź joj.
Ale ci dapamahli muzyčnyja videa pavysić rejtynhi armianskaha premjera?
Hryharan adznačaje, što pakul što videa Pašyniana vyklikajuć bolš entuzijazmu ŭ maładych ludziej u inšych krainach byłoha SSSR. U Armienii mianiać staŭleńnie da siabie składaniej, zhadžajecca Mikaeł Zalan, tamu što za siem hadoŭ Pašyniana va ŭładzie bolšaść užo vyznačyłasia sa svaim staŭleńniem da jaho.
«Ludzi padzialilisia na try vialikija hrupy. Jość adna, jakaja jaho padtrymlivaje. Chtości adnaznačna, chtości z ahavorkami, chtości jak najmienšaje sa zła. Druhaja hrupa — heta tyja, chto jaho nienavidzić. Usio, što jon robić, vyklikaje ŭ ich lutuju nianaviść. I, naturalna, usie hetyja videa ich jašče bolš razdražniajuć, — kaža Zalan. — Ale jość i treciaja hrupa, jakaja albo adyšła ad palityki, albo palitykaj nikoli nie cikaviłasia, albo joj usie nadakučyli. U hetaj hrupie, moža być, u jaho źjavilisia novyja paśladoŭniki, choć by jon zmoh ich uvahu pryciahnuć».
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam4
Kamientary