Śviet sustreŭ Rastvo: pieršaje kaladnaje nabaženstva papy Lva, a Tramp pravieryŭ, što Santa sapraŭdy dobry
U noč na čaćvier chryścijanie va ŭsim śviecie sustrakali Rastvo pa hryharyjanskim i novajulijanskim kalendary. U hetym hodzie svaju pieršuju kaladnuju słužbu ŭ Vatykanie pravioŭ vybrany ŭ mai Papa Leŭ XIV.
Paśla spynieńnia vajny ŭ siektary Haza kaladnaja słužba adbyłasia ŭ Viflejemie, dzie, jak vierać chryścijanie, naradziŭsia Isus. U horadzie, raźmieščanym u Paleścinskaj aŭtanomii, na Zachodnim bierazie raki Ijardan, upieršyniu za dva hady prajšli cyrymonii z udziełam vialikaj kolkaści ludziej, piša Bi-bi-si.
Paśla napadu CHAMAS na Izrail 7 kastryčnika 2023 hoda i vajny ŭ siektary Haza, jakaja rušyła ŭśled za im, masavyja mierapryjemstvy ŭ Viflejemie nie pravodzilisia ź mierkavańniaŭ biaśpieki.
Kaladnuju słužbu ŭ sabory Śviatoha Piatra ŭ Vatykanie ŭpieršyniu pravioŭ Papa Leŭ.
Raniej kiraŭnik Rymskaj Katalickaj carkvy zaklikaŭ z nahody Kaladaŭ «ŭstalavać va ŭsim śviecie mir na 24 hadziny», adnak jaho zaklik nie byŭ pačuty. Na hetym tydni pantyfik kazaŭ, što jaho «vielmi zasmuciła» admova Rasii ad kaladnaha pieramirja na vajnie va Ukrainie (u Maskvie śćviardžali, što chočuć sapraŭdnaha miru i nie majuć namieru davać Kijevu čas dla pieraŭzbrajeńnia).
Padčas słužby Leŭ kazaŭ pra Kalady jak pra śviata «viery, dabračynnaści i nadziei» i krytykavaŭ «skažonuju ekanomiku», jakaja «pahražaje staŭleńniu da ludziej jak da zvyčajnaha tavaru».
U kaladnuju noč va Ukrainie, jak zvyčajna, hučać sireny pavietranaj tryvohi. Pavietranyja siły USU paviedamili, što ŭ napramku Kijeva ruchajucca bieśpiłotniki-kamikadze.
Da hetaha va ŭkrainskich cerkvach adbylisia kaladnyja słužby. Ukraina ŭžo treci hod śviatkuje Kalady 25 śniežnia.
Tym časam na froncie Kalady śviatkujuć sotni tysiač ukraincaŭ, jakija vajujuć u składzie USU.
Tym časam prezident ZŠA Donald Tramp sustreŭ Kalady ŭ svajoj rezidencyi Mar-a-Łaha ŭ Fłarydzie. U sieradu ŭviečary jon razam sa svajoj žonkaj pa tradycyi prymaŭ zvanki dziaciej, jakija cikavilisia miescaznachodžańniem Santa-Kłaŭsa.
Za pieramiaščeńniem Santy pa płaniecie, jak zvyčajna, sočyć Kamandavańnie pavietrana-kaśmičnaj abarony Paŭnočnaj Amieryki (NORAD). Supracoŭniki kamandavańnia dakładvajuć pra heta prezidentu, jaki, u svaju čarhu, infarmuje dziaciej.
Adnak u hetym hodzie Tramp zajaviŭ, što pierš, čym prapuścić Santu ŭ ZŠA, ułady spačatku pravieryli jaho na dobranadziejnaść.
«Santa — vielmi dobry čałaviek, — skazaŭ Tramp adnamu ź dziaciej, jakija telefanavali. — My chacieli pierakanacca, što jon nie byŭ ukaranionym. Što my nie ŭkaraniajem u krainu drennaha Santu. Tak što my ŭstanavili, što Santa dobry».
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy18
Kamientary