Maryja Kaleśnikava zapisała kaladny zvarot na piaci movach VIDEA
Byłaja palitźniavolenaja Maryja Kaleśnikava, jakaja była vyzvalenaja z-za krataŭ 13 śniežnia, a ciapier znachodzicca ŭ Hiermanii, zapisała kaladny zvarot. U im jana na roznych movach padziakavała ŭsim tym, chto ŭsie hetyja hady jaje padtrymlivaŭ i spryčyniŭsia da jaje i inšych palitviaźniaŭ vyzvaleńnia z-za krataŭ.
Kaleśnikava havoryć, što raniej nikoli nie vieryła ŭ cudy, ale toje, što adbyłosia dva tydni tamu, prymusiła jaje źmianić svaju pazicyju. Tolki niadaŭna jana, hledziačy ŭ zornaje nieba, zahadvała žadańnie być za kaladnym stałom sa svaimi blizkimi — i voś hetaje žadańnie niespadziavana ździejśniłasia.
Adnak ža toje, što tak adbyłosia — nie vypadkovaść, za hetym stajali ludzi. Kaleśnikava vykazała padziaku «kožnamu, chto zrabiŭ krok nasustrač, chto pamoh, chto padtrymaŭ i nie skazaŭ «heta niemahčyma». Asabliva jana adznačyła svaju siastru Taćcianu Chomič, baćku Alaksandra Kaleśnikava i ŭsich inšych členaŭ siamji.
Taksama Kaleśnikava padziakavała daktaram i tym, chto prymaŭ rašeńnie pra jaje vyratavańnie ŭ toj čas, kali padčas znachodžańnia ŭ turmie joj patrebna była apieracyja. Skazała jana dziakuj i ŭsim tym, chto ŭsie piać hadoŭ, «niahledziačy na strach pakarańnia znachodziŭ u sabie mužnaść uśmichacca i padstaŭlać plačo».
Znajšlisia słovy padziaki i dla «kamandy mary», jakaja zachavała «kaštoŭnaści i duch, kali heta było asabliva ciažka».
Słovy padziaki prezidentu ZŠA Donaldu Trampu Maryja Kaleśnikava vykazała na anhlijskaj movie. Taksama jana padziakavała inšym palitykam, jakija prymali rašeńni — z ZŠA, Ukrainy, Polščy, Litvy, Hiermanii i Biełarusi.
«Osoblivo choču podiakuvati Ukrajinii ta jiji ludiam. U čas vijni pid obstriłami vi prijniali nas — biłorusiv, źvilnienich z tiuriem, jak ridnich. Vi otočili nas turbotoju i tiepłom. Moje siercie z vami», — pa-ŭkrainsku skazała častku svajoj pramovy Kaleśnikava.
Padziaka była taksama vykazanaja siabram pa ŭsim śviecie za listy, padtrymku i luboŭ. Asabliva byli adznačanyja ludzi mastactva z usiaho śvietu, a da niamieckich siabroŭ Kaleśnikava źviarnułasia pa-niamiecku.
Naprykancy pramovy jana pierajšła na biełaruskuju movu:
«Biełarusy! Usie hetyja hady nas sprabavali raźjadnać turmami i miežami, stracham i vymušanaj razłukaj, maŭčańniem. Ja vieru, što nastanie dzień, kali nivodzin čałaviek nie budzie za kratami za svaje pierakanańni, słovy ci mary. Ja vieru, što my vierniemsia dadomu mocnymi, z zachavanymi luboŭju i hodnaściu. Tymi, chto viedaje canu svabody».
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary
Na biełaruskim radyjo...