Vyhladaje, što Vens choča padrychtavać kapitulacyju Ukrainy — WSJ

Sustreča pamiž Donaldam Trampam i Uładzimiram Zialenskim pačałasia davoli spakojna. Ale paśla vyliłasia ŭ svarku. Čamu vice-prezident Džej Dzi Vens pasprabavaŭ spravakavać publičnuju svarku? The Wall Street Journal razvažaje ŭ redakcyjnaj kałoncy pra piatničnuju sustreču.

«Vens aktyŭna piša ŭ svaim akaŭncie na X.com, i heta vyhladaje jak sproba padrychtavać hlebu dla kapitulacyi Ukrainy. Niadaŭna jon nazvaŭ žorstkuju ahresiju Pucina prosta etničnym kanfliktam. Vens raźnios Zialenskaha, nibyta heta było dzicia, jakoje spaźniłasia da viačery», — piša vydańnie.

Zialenski zrabiŭ by razumniej, kali b źmiakčyŭ napružańnie, znoŭ padziakavaŭšy ZŠA i vykazaŭšy pavahu Trampu, ličyć vydańnie. «Vielmi mała sensu sprabavać vypraŭlać histaryčnyja fakty pierad Trampam, kali ŭ toj ža čas prosiš u jaho dapamohi».

«Ale, jak i ŭ samoj vajnie, Zialenski nie byŭ inicyjataram hetaj pierapałki ŭ Avalnym kabiniecie. Ci pavinien jon byŭ prosta tryvać praciahłaje publičnaje prynižeńnie ŭkrainskaha naroda, jaki ŭžo try hady viadzie vajnu za vyžyvańnie?» — zadajecca pytańniem WSJ.

Intares ZŠA va Ukrainie zaklučajecca ŭ tym, kab spynić impierski prajekt Pucina pa adnaŭleńni stračanaj savieckaj impieryi bieź nieabchodnaści amierykanskim sałdatam rabić choć adzin streł. Hety bazavy intares nie źmianiŭsia, ale ciapier jaho składaniej budzie dasiahnuć.

«Pieradača Ukrainy Pucinu była b katastrofaj dla hetaj krainy i Jeŭropy, ale heta była b i palityčnaja katastrofa dla samoha Trampa. Prezident ZŠA nie moža prosta adyści ad hetaha kanfliktu, jak by jamu taho ni chaciełasia. Ukraina maje dastatkova ŭzbrajeńnia, kab pratrymacca prykładna da leta. Ale ŭ tym vyhladzie, jak ciapier idzie vajna, Pucin nie bačyć nijakaj pryčyny iści na jakija-niebudź sastupki, bo jaho vojski praciahvajuć pavolna i kryvava prasoŭvacca napierad na ŭschodzie Ukrainy», — adznačaje WSJ.

Piatničnaje vidovišča nie prymusić Pucina spynić nastup — chutčej naadvarot.

«Prezident Tramp, niesumnienna, adčuvaje razdražnieńnie ad taho, što jamu davodzicca zajmacca vajnoj, jakuju, jak jon ličyć, jon moh by praduchilić, kali b pieramoh u 2020 hodzie. Ale prezidenty pavinny pracavać z tym śvietam, jaki im dastaŭsia. Mir va Ukrainie ŭsio jašče možna vyratavać, ale dla hetaha Tramp i Zialenski pavinny sumiesna pracavać nad pahadnieńniem, ź jakim zmohuć žyć ukraincy.

Tramp nie choča być prezidentam, jaki pakinuŭ Ukrainu Pucinu z usim krovapralićciem i škodaj dla amierykanskich intaresaŭ, što z hetaha vynikli b. Vensu taksama nie spadabajecca bałatavacca ŭ prezidenty ŭ takim śviecie», — padsumoŭvaje vydańnie.

• 8
• 2
• 1
• 22
• 1
• 2
• 5
• 1