«Niekatoryja klijenty znajšli alternatyvu novym dalaram». Kasirka banka adkazała na pytańni, jakija ŭźnikajuć pry abmienie valuty

Navošta ŭsim novyja dalary?

Z 1 lutaha 2024 hoda ŭstupili ŭ siłu novyja praviły pryjomu valuty z paškodžańniami, ale klijenty bankaŭ pieryjadyčna skardziacca na toje, što nie ŭsie dalary lohka zdać u abmieńnik. Adna z častych pryčyn — ćvil praź niapravilnaje zachoŭvańnia. Na vyhlad banknota moža vyhladać całkam zvyčajna, ale kali jaje praśviečvaje kasir, to akazvajecca, što takuju valutu nie prymuć.

U pačatku hetaha hoda biełarusy pačali abmiarkoŭvać roźnicu pamiž novymi i starymi dalarami. Va ŭsich apytanych bankach tłumačyli: staryja dalary prymajuć biez abmiežavańniaŭ, hałoŭnaje, kab nie było istotnych paškodžańniaŭ. A voś za miažoj, u niekatorych krainach mohuć być abmiežavańni pa abmienie starych dalaraŭ — tady lepš uziać z saboj valutnuju kartku (i jašče ŭ Biełarusi papoŭnić jaje starymi dalarami).

Jašče bolš kryŭdna, kali valutu, nabytuju litaralna niadaŭna, ale ŭ inšym biełaruskim banku (a časam navat u tym ža samym), užo nie chočuć prymać i znachodziać tam paškodžańni.

«Letaś ja źniała z rachunku ŭ adździaleńni banka (navat nie ŭ kasie) davoli bujnuju sumu hrošaj. Tak atrymałasia, što hrošy nie spatrebilisia, lažali doma, i niadaŭna ja znoŭ sabrałasia pakłaści ich na rachunak, — raskazvaje čytačka Kaciaryna. — Ale toj ža samy bank nie pryniaŭ kupiury, bo na ich bolš za try vyjavy i/abo ich pamier bolšy za santymietr i jość niejkija ciomnyja plamy na praśviet. A kasirka jašče i dziviłasia: «Jak vam naohuł takoje vydali?»

Pakolki kupiury dahetul zachoŭvalisia ŭ papiarovych upakoŭkach ź piačatkaj banka, sumnievaŭ u ich pachodžańni ŭ mianie niama. Viadoma, ja nie pierahladała ŭsie kupiury ŭ pačku, ja ž zakazvała ich u adździaleńni bujnoha banka! Dy raniej ja i nie viedała ŭsich kryteryjaŭ «nieprydatnaści» kupiur.

Pracent «drennych» kupiur akazaŭsia kala 70% (niadrennaja atrymlivajecca kamisija banka, jaki zachoŭvaŭ maje hrošy). I mnie vydali ich jašče da źmiakčeńnia patrabavańniaŭ da valuty, heta značyć pracent drennych kupiur na momant vydačy mnie byŭ jašče vyšejšy».

Kaciaryna kaža, što napisała pretenziju ŭ bank. Tam adkazali, što vydajuć tolki kupiury, jakija adpaviadajuć usim patrabavańniam, a klijent moža pravieryć ich pry atrymańni.

«Hetaja historyja tyčyłasia kupiur novaha ŭzoru. U kupiur staroha ŭzoru była inšaja prablema — ćvil. Možna było b śpisać heta na niapravilnaje zachoŭvańnie, ale z kupiurami ź inšych bankaŭ usio dobra.

Tak, za miažoj ich prymajuć biez prablem, ale nie va ŭsich jość mahčymaść pajechać tudy, dy i śpiecyjalna dziela hetaha nie pajedzieš, darahavata vyjdzie. Nibyta niekatoryja našy banki zhodnyja pryniać, ale z kamisijaj 5-10%. U vyniku zachoŭvaješ hrošy ŭ banku i za heta atrymlivaješ kuču prablem i vydatkaŭ pry ich abmienie. Tak što budźcie ŭvažlivyja, kali kuplajecie/zdymajecie valutu».

Mnohija vyrašajuć pytańnie z abmienam valuty pachodam u roznyja banki.

«Skažu taksama dla statystyki: kuplałasia kvatera, za valutu. U Śbiery na biaśpiečnym raźliku z $65 000 zabrakavali $1500 plus nie zachacieli brać jašče $500 na abmien. U vyniku $2000, jakija nie pryniali ŭ Śbiery, uviečary ja abmianiaŭ u Alfie i MTB $1800, zastałosia dźvie kupiury — adna staroha ŭzoru ź plamami, inšaja novaja, ale jość piačatki», — raskazvaje čytač na forumie «Anłajniera».

Prablemaj moža stać i samastojnaje vydaleńnie ćvili dy niepažadanych nadpisaŭ. U Internecie hetyja ekśpierymienty zakančvajucca «paśpiachovym pośpiecham», ale da adekvatnaści takich mietadaŭ jość pytańni.

«Niadaŭna była ŭ banku, rabiła apieracyju na vialikuju sumu, i kala 25 kupiur pa $100 nie pryniali. Skazali, što jany navat inšaha koleru, bolš śvietłyja — značyć, była ćvil, jakuju sprabavali vyvodzić, — raskazała jašče adna čytačka. — Usie staryja, ale siarod ich apynulisia i dźvie novyja z takoj ža historyjaj».

Prajšło niekalki tydniaŭ, siamja abyšła siem abmieńnikaŭ roznych bankaŭ.

«Nidzie tak i nie pryniali, kazali, što jość ślady ŭździejańnia chimii i vilhaci. Daviałosia mianiać u Technabanku z kamisijaj».

«Niekatoryja dalary staroha ŭzoru zachavalisia lepš, čym novyja»

Alina (imia źmienienaje na prośbu surazmoŭcy) u bankaŭskaj sistemie ŭžo niekalki hadoŭ, ciapier dziaŭčyna pracuje ŭ abmieńniku ŭ centry Minska i mianiaje dalary.

Tendencyja apošnich miesiacaŭ, kaža kasirka, takaja, što ludzi zamiest «dobry dzień» adrazu prosiać «sinija» kupiury, heta značyć novaha ŭzoru.

«Vosiem ź dziesiaci klijentaŭ, jakija pryjšli pa dalary, prosiać novyja kupiury. Hady z dva tamu navat pytańnia takoha nie było, brać «sinija» dalary ci «biełyja», usim było absalutna ŭsio adno. Tolki apošnim časam pačali pytacca pra novyja. Čamu takaja cikavaść? Klijenty kažuć, što ŭ Rasii jość składanaści z tym, kab abmianiać staryja dalary. Na fonie hetaha niekatoryja dumajuć, što i ŭ nas ich vyvieduć z abaračeńnia».

Alina paŭtaraje toje ž samaje, što aficyjna zajaŭlajuć biełaruskija banki: abmiežavańniaŭ pa pryjomie dalaraŭ staroha ŭzoru z-za hoda ich vypusku niama, važnyja stan banknoty i adsutnaść značnych paškodžańniaŭ.

— Ci jość u kasiraŭ instrukcyi, kali jany pavinny vydać novyja dalary, a kali staryja?

— Nie, u nas nidzie nie prapisana, jakimi kupiurami i jakimi naminałami my pavinny vydavać hrošy. Tearetyčna klijent moža zakazać patrebnyja jamu kupiury, jakija navat jašče nie byli ŭ abaračeńni, ale heta kali havorka idzie mienavita pra biełaruskija rubli. Takaja pasłuha jość — z majho vopytu, jaje redka chtości prosić, navat nie viedaju, dla jakich met, kali ščyra.

— Ci isnujuć łajfchaki, jak atrymać peŭnyja dalaravyja kupiury? Kali dla hetaha treba prychodzić u abmieńnik — da adkryćcia, kali pryviazuć hrošy z banka, ci viečaram, kali ich zdaduć ludzi?

— Chutčej u kancy ci ŭ siaredzinie dnia. Tamu što ŭ bolšaści bankaŭ, nakolki ja viedaju, ranicaj ciapier naohuł nie vydajuć «sinija». Jany źjaŭlajucca ŭžo na abarocie — što za dzień prynieśli, toje kasir i pradaje.

Nielha skazać, što dalary novaha ŭzoru źnikli, ich usio hetak ža zdajuć ludzi. Prosta ŭ nas pierastali vydavać ich u kasu ranicaj.

Darečy, kasir nie moža pradać valutu sam sabie, pakul jon znachodzicca na pracoŭnym miescy. Tak što navat pry žadańni jon nie zmoža vykupić novyja dalary, kali jany źjaŭlajucca ŭ kasie.

— Kasir nie maje prava być i pakupnikom, i pradaŭcom adnačasova. My absłuhoŭvajemsia absalutna hetak ža sama, jak i ŭsie astatnija klijenty.

— A kali padyści da susiedniaha akienca i paprasić kalehu vydać «sinija» dalary?

— Kali ŭ nas u kasie niama novych dalaraŭ, navat dla kaleh my ich nijak nie namalujem.

Na fonie cikavaści da novych dalaraŭ ludzi stali čaściej prasić i novyja jeŭra, zaŭvažaje kasirka. Pad starymi razumiejuć pieršuju sieryju banknot 2002 hoda vypusku, pad novymi — druhuju sieryju, jakaja drukujecca z 2013-ha.

«Apošnim časam jeŭra ŭsio bolš i bolš pačynaje karystacca popytam. Zvyčajna kali ludzi daviedvajucca, što ŭ kasie jość tolki staryja dalary, to prosiać chacia b jeŭra. I jeŭrapiejskuju valutu ŭžo taksama pačynajuć prasić mienavita novaha ŭzoru».

Alina kaža, što razam z kuplaj jeŭra niekatoryja klijenty znajšli dla siabie inšuju alternatyvu «sinim» sotkam: ludzi patrabujuć, kali niama novych dalaraŭ, vydavać sumu drobnymi kupiurami. Z-za hetaha časta ŭźnikaje prablema, što nie chapaje drobnych naminałaŭ dla zdačy. Naprykład, čałaviek choča abmianiać tolki $70 z sotni, a ŭ kasie niama dla jaho rešty.

— Ci stała kasiram składaniej pracavać u hetych umovach?

— Kali ciaham dnia kožnyja piać chvilin kažaš klijentu, što «sinich» dalaraŭ niama, heta nadakučvaje, tak. Na samaj spravie, klijentam nie varta pieražyvać: «biełyja» dalary ŭsio hetak ža ŭ chadu, i časam jany navat u lepšym stanie, čym «sinija».

— Čytačy pieryjadyčna skardziacca: kupili dalary ŭ adnym banku, u inšym ich užo nie chočuć brać — z-za ćvili abo pa inšaj pryčynie.

— Takoha kryteryju, što kupiury ź ćvillu nie prymajucca, niama. Heta chutčej padychodzić pad kryter płaciežnaści pa plamach, tamu što ćvil, jak praviła, nie byvaje adnoj plamaj na kupiury, zvyčajna heta vielmi-vielmi šmat drobnych plam. U bankach biaruć kupiury da troch-čatyroch plam, ale na kupiury ich moža być i bolš za 20.

Adrazu varta papiaredzić: jak vyvieści ćvil abo nadpisy, kasir nie padkaža. Chtości z klijentaŭ kazaŭ nam pra apracoŭku «Damiestasam», ale tut užo na svoj strach i ryzyku. My nijakich parad nie dajom.

— Čamu ŭsio ž taki možna kupić dalary, a ŭ inšym banku ich užo nie zachočuć prymać? Padychody da acenki kupiur u bolšaści bankaŭ nibyta adnolkavyja. Heta čałaviečy faktar, jak kasir acenić kupiuru?

— Čałaviečy faktar taksama prysutničaje, tamu što ŭsie voś hetyja adcieńni plam — štuka vielmi subjektyŭnaja. Roznyja kasiry pa-roznamu mohuć na heta pahladzieć, — pryznaje pracaŭnica banka. — Znoŭ ža kasir moža być niaŭvažlivym, vypadkova vydać takuju kupiuru.

Pry hetym, kali klijent zaŭvažyŭ, što z kupiuraj niešta nie tak, jon moža paprasić kasira zamianić jaje. Ale zrabić heta treba, nie adychodziačy ad kasy. Kali viarnucca praź niejki čas, to kasir nie zmoža abmianiać kupiuru, jakaja nie zadavoliła klijenta.

• 0
• 0
• 0
• 4
• 1
• 0
• 1
• 0