Znajšoŭsia adzin z troch źnikłych bieź viestak biełarusaŭ, jakija vajavali va Ukrainie na baku Rasii
Hramadzianin Biełarusi Ihar Chasanaŭ, jaki vajavaŭ pa kantrakcie ŭ rasijskaj armii suprać Ukrainy i źnik bieź viestak sioleta ŭ studzieni, znachodzicca ŭ špitali ŭ akupavanaj Rasijaj Łuhanskaj vobłaści, piša «Radyjo Svaboda».
«U jaho askiepkavaje ranieńnie siaredniaj ciažkaści. Lekary kažuć, što ŭsio dobra, usio zahojvajecca. Ale nasamreč heta nie tak», — paviedamiła prajektu «Nie ždi mienia iz Ukrainy» hramadzianskaja žonka biełarusa Varvara Andrejeva.
Pavodle jaje, Ihar Chasanaŭ vyjšaŭ na suviaź praz paŭtara tydnia paśla pačatku jahonych pošukaŭ.
Varvara Andrejeva taksama ŭdakładniła, što hramadzianin Biełarusi tolki z druhoj sproby zmoh padpisać kantrakt na słužbu ŭ rasijskaj armii, bo pieršaja była niaŭdałaj — jamu admovili praz stan zdaroŭja.
«Pa stanie zdaroŭja, jašče raniej, kali jamu admovili, vajenkamat nie mieŭ prava padpisvać kantrakt, viedajučy jahony dyjahnaz. Sutnaść takaja — kantrakt skłali niezakonna. Ciapier moj muž znachodzicca ŭ špitali z askiepkavym ranieńniem, miedycynskaha dohladu za im praktyčna niama. Tempieratura vysokaja, rana nie zahojvajecca, adzin askiepak dastali, a druhi ŭsio jašče znachodzicca ŭ im», — paviedamiła žonka biełarusa.
Pavodle jaje, Ihar Chasanaŭ pisaŭ rapart ab adpačynku na imia kamandzira, ale jamu admovili. Lekary śćviardžajuć, što adrazu paśla špitala jaho znoŭ adpraviać na pieradavuju liniju. Varvara Andrejeva ciapier sprabuje šukać dapamohu, kab dabicca novaha miedycynskaha zaklučeńnia, viarnuć na terytoryju Rasii dla lačeńnia i reabilitacyi.
Dyjahnaz, praź jaki Chasanava pieršapačatkova admovili ŭ padpisańni kantraktu, Varvara Andrejeva nie nazvała.
Chasanaŭ słužyŭ u motastrałkovym padraździaleńni suchaputnych vojskaŭ Rasii, vajskovaja čaść 52033 — heta palavaja čaść, jakaja padparadkoŭvajecca vajskovaj čaści 02511, što dysłakujecca ŭ pasiołku Kamienka Leninhradskaj vobłaści. Pra jahonaje źniknieńnie stała viadoma ŭ kancy lutaha.
5 sakavika stała viadoma jašče pra dvuch biełarusaŭ, jakija źnikli bieź viestak i taksama słužyli pa kantrakcie ŭ palavych farmavańniach vajskovaj čaści 02511.
Rasijskija vajskoŭcy z čaści 02511 vajujuć va Ukrainie ad pačatku rasijskaha ŭvarvańnia ŭ Danieckuju vobłaść, jakoje adbyłosia ŭ 2014 hodzie. Aproč taho, farmavańni hetaj častki vajavali ŭ Prydniastroŭi, u Abchazii i Paŭdniovaj Asiecii, a taksama ŭdzielničali ŭ vajennaj apieracyi ŭ Siryi.
Zhodna sa statystykaj, u supołku, stvoranuju ŭ traŭni 2024 hoda dla dapamohi svajakam vajskoŭcaŭ, jakija słužyli ŭ palavych farmavańniach vajskovaj čaści 02511, napisali 34 352 paviedamleńni, u tym liku 640 — za apošni tydzień.
Ad BNF da HRU. Chto takaja Natalla Sudlankova, jakoj čechi zahadali pakinuć krainu27
Kamientary