Pajšoŭ z žyćcia 32-hadovy Maksim Čarniaŭski — zasnavalnik supołki «Nadakučyŭ nam hety Łukašenka» pačatku 2010-ch
Chłopiec ciažkaha losu, jakoha sprabavaŭ zavierbavać KDB, źjechaŭ ź Biełarusi, a ŭ Polščy pastupova adyšoŭ ad žurnalistyki i palityki. Maksim adčuŭ siabie žančynaj, ale ŭrešcie ažaniŭsia i staŭ baćkam dvajniat. Prablemy ŭ siamji pryviali da suicydu.
Kolišni biełaruski apazicyjny aktyvist Maksim Čarniaŭski pajšoŭ z žyćcia na fonie siamiejnych prablem. Pra heta «Našaj Nivie» raskazali jaho siabry. Trahiedyja adbyłasia niekalki dzion tamu.
«Daruj, Boža. Ja vielmi lublu maich dačušak. Ruža i Lila — vy majo ščaście i moj sens žyćcia. Ja biez vas nie mahu. A jany zabirajuć… Prabačcie mnie. Ja vielmi vas lublu i zaŭsiody budu lubić. Vaš tata. Budźcie krychu dabrejšymi, kali łaska. Hetamu śvietu tak nie chapaje dabryni…» — napisaŭ Maksim Čarniaŭski ŭviečary 14 sakavika, paśla čaho pierastaŭ vychodzić na suviaź.
Čarniaŭski staŭ viadomy ŭ 2011 hodzie paśla taho, jak źliŭ kadebešnika, jaki sprabavaŭ jaho vierbavać, apubličyŭšy aŭdyja pieramovaŭ z supracoŭnikam orhanaŭ i jaho zdymak. Paśla hetaha ŭčynku Maksimu, na toj momant studentu žurfaka BDU, administrataru supołki «Nadakučyŭ nam hety Łukašenka» i stvaralniku sajta Gonzo.by, pryjšłosia źjechać ź Biełarusi.
Jon pasialiŭsia ŭ Polščy, praciahnuŭ tam adukacyju. Čarniaŭski raskazvaŭ «Našaj Nivie», što niejki čas pracavaŭ maderataram u ruskamoŭnym siehmiencie sacsietak. Za miažoj jon taksama pieravučyŭsia na ajcišnika i apošnim časam byŭ uładkavany ŭ polskaj strachavoj kampanii. Taksama Maksim cikaviŭsia dyzajnam čałavieka i astrałohijaj. Jak śpikier pavinien byŭ vystupać na čarhovym tematyčnym fiestyvali «Šamana» hetym letam.
Pa słovach chłopca, paśla pieršaha niaŭdałaha šlubu jon adčuŭ siabie žančynaj i źbiraŭsia źmianiać poł. Prajšoŭ usie psichałahičnyja testy, pačaŭ płanavać apieracyju, adnak pieradumaŭ, kali sustreŭsia z budučaj druhoj žonkaj. U pary naradzilisia bliźniaty.
Kali vy ŭ Biełarusi i adčuvajecie siabie psichałahična drenna, pamiatajcie, što ŭ krainie kruhłasutkava pracuje respublikanskaja telefonnaja «haračaja linija» pa akazańni psichałahičnaj dapamohi. «Telefon davieru» dla darosłych: 8 (017) 352-44-44, 8 (017) 304-43-70.
«Telefon davieru» dla dziaciej i padletkaŭ: 8 (017) 263-03-03.
U emihracyi raim źviartacca ŭ profilnyja arhanizacyi pa miescy žycharstva. Adzin z varyjantaŭ — słužba «Adno akno».
Ciapier čytajuć
Dzie naradzilisia viadomyja biełarusy? Bolš za dziesiać tysiač asob sabrali na adnoj karcie4
Kamientary