Naviednica sabačaha kafe ŭ Minsku zastałasia krajnie niezadavolenaj i raskazała, jakija ŭ jaje pretenzii
Dog friendly kaviarnia na vuł. Śviardłova adkryłasia kala čatyroch miesiacaŭ tamu. U sacyjalnych sietkach supracoŭniki prapanujuć zajści ŭ kafe, kab paznajomicca z čaroŭnymi sabakami, a taksama pierakusić. «Zdavałasia b, idealny varyjant, kab pasiadzieć ź siabrami ci siamjoj u vychodny dzień, ale ŭ realnaści akazałasia, što kancepcyja kaviarni z žyviołami patrabuje detalovaj dapracoŭki», — piša vydańnie «Minsk-Naviny».
«U sacsietkach supracoŭniki zapeŭnivajuć, što vyhuł sabak adbyvajecca ŭvieś čas. Vyrašyli pravieryć: zašli ŭ kafe, uziali desiert z napojem i panazirali. Za čatyry hadziny puchnatych rabotnikaŭ z pamiaškańnia nie vyvodzili ni razu, a chadzić u prybiralniu im davodziłasia pobač z haściami i ježaj. Adzin z sabak i zusim pamačyŭsia na ŭvachodny dyvanok. Inšy vyrašyŭ prahulacca sam i ŭciok u adčynienyja dźviery, u vyniku čaho kasir zmušany byŭ pierapynić pracu i łavić uciekača», — raspaviadaje vydańnie.
Z dehustacyjaj desiertu taksama ŭsio pajšło nie pa płanie: adzin z čatyrochnohich skinuŭ šklanačku ź biskvitam sa stała na padłohu i zadavoleny prystupiŭ da trapiezy.
«Desiert ad jaho my adsunuli, ale jon praciahnuŭ palavańnie: novaj «achviaraj» stała dziaŭčyna za stolikam nasuprać. Pra toje, što adbyłosia, raspaviali kasiru: jana adreahavała na heta jak na niešta vielmi štodzionnaje. Zamiest tłumačeńniaŭ i prabačeńniaŭ pryvabiła sabaku łasunkam u słužbovy pakoj i zakryła na čas kasmataha parušalnika», — praciahvaaje vydańnie.
Karespandentka źviazałasia z uładalnicaj kaviarni.
— Isnuje vyrazny rehłamient: supracoŭniki pavinny vyhulvać hadavancaŭ kožnuju hadzinu-dźvie. Mahčyma, u toj dzień kahości z pracaŭnikoŭ nie było na źmienie, ale heta nie admianiaje fakt, što treba być bolš uvažlivymi. Što da charčavańnia, zaraz dresirujem sabak, kab jany nie krali ježu sa stała. U budučyni abaviazkova znajdu čałavieka, jaki pakłapocicca pra ich naležnym čynam, - prakamientavała situacyju haspadynia ŭstanovy.
Staršynia Asacyjacyi zoaabarončych arhanizacyj Aksana Davydzienka raskazała, što haspadaram lepš abmiažoŭvać znosiny hadavancaŭ sa starońnimi ludźmi.
Pavodle jaje słoŭ, desierty nie pavinny ŭvachodzić u racyjon sabak, a šakaład dla ich i zusim śmiarotna niebiaśpiečny: takoje charčavańnie moža pryvieści da samych roznych nastupstvaŭ, ad atłuścieńnia da prablem z sercam. U adkaznaść uładalnika ŭvachodzić i vyhuł sabak.
— Zoaabaroncy zaŭsiody vystupajuć za biaśpieku žyvioł. Zvyčajna paśla takich zvarotaŭ my źviazvajemsia z uładalnikam abjekta i prosim zabiaśpiečyć naležnyja ŭmovy dla znachodžańnia žyvioł. Kali nie vypraŭlajucca — prymajem miery, ale zvyčajna da nas prysłuchoŭvajucca i zusim spyniajuć załučać u svoj biznes žyvioł. Abaviazkova abmiarkujem sprečnyja momanty z kiraŭnictvam ustanovy, - skazała Davydzienka.
U staličnym Centry hihijeny i epidemijałohii zaŭvažyli, što kiraŭnictvam kaviarni pavinna być vydzielena adkaznaja asoba, jakaja budzie sačyć za sabakami i nie ŭdzielničać u abaračeńni charčovaj pradukcyi, - dadaŭ namieśnik hałoŭnaha ŭrača centra Siarhiej Kazyrevič.
Takija miery isnujuć, pakolki sabaki mohuć być pieranosčykami parazitarnych chvarob, dermatoksikozaŭ i šerahu inšych infiekcyj, kažuć śpiecyjalisty.
Kamientary
U Vas by atrymalasia, ja vašyja kamientary čytaju i razumnieju, i razumnieju, i baču, što ū vas atrymalasia b ! Praūdu kažu...