«Samaha pryvabnaha sadžaješ napierad, i ŭsio biez paleva». Jak i za kolki pieravoziać u Jeŭropu nielehalnych mihrantaŭ ź biełaruskaj miažy

Mihranty štodnia šturmujuć miažu

Dakładnaja kolkaść ludziej, jakija nielehalna pierasiakajuć miažu Biełarusi i Jeŭrasajuza, nieviadomaja. Pahraničnyja słužby susiednich krain fiksujuć tolki kolkaść vypadkaŭ admovy va ŭjeździe ŭ ES. Heta značyć, što ŭ statystyku traplajuć tyja, chto nie zdoleŭ pierasiekčy miažu niezaŭvažna.

I takich vypadkaŭ ciapier za sutki Polšča, Litva i Łatvija, razam uziatyja, fiksujuć ad niekalkich dziasiatkaŭ da niekalkich socień. Voś statystyka advolnaha dnia — 14 kastryčnika. Łatvijskija słužby zafiksavali 77 vypadkaŭ sprob nielehalnaha pierasiačeńnia miažy, polskija — 40 (dniom raniej —35), a litoŭskija — 0.

Pavialičyć

Najbolš spakojnaj situacyja ź mihrantami vyhladaje na biełaruska-litoŭskaj miažy. U niekatoryja dni litoŭskija pahraničniki nie fiksujuć nivodnaj sproby nielehalna pierasiekčy miažu.

Na miažy z Polščaj situacyja zvyčajna davoli napružanaja. Tak, naprykład, z 3 pa 5 kastryčnika na polska-biełaruskaj miažy zafiksavana 300 sprob nielehalnaha pierasiačeńnia.

Adnak dla mihrantaŭ trapić ź Biełarusi ŭ Polšču, Łatviju abo Litvu — heta nie kančatkovaja meta, pakolki ich cikaviać nie hetyja krainy Jeŭrasajuza, a Hiermanija.

Sieści ŭ aŭtobus abo na ciahnik jany nie mohuć, pakolki trapili ŭ ES nielehalna. Dla pieravozki takich pasažyraŭ arhanizatary šukajuć kiroŭcaŭ katehoryi V na ŭłasnych abo arendnych aŭto.

Abjavy raźmiaščajuć u čatach i na sajtach pa pošuku pracy. Pracadaŭcy abiacajuć kiroŭcam ad 1500 dalaraŭ za rejs.

Pavialičyć

Šyrokaja hieahrafija

Profil adnaho z takich zakazčykaŭ zarehistravany na sajcie 5 kastryčnika 2024 hoda, ciapier ź jaho raźmieščana až 50 vakansij. Kraina znachodžańnia «pracadaŭcy» — Charvatyja, a numar telefona — turecki. Suviaź idzie praz WhatsApp abo Telegram.

Hieahrafija krain, dzie patrebnyja pieravozčyki, davoli šyrokaja. Aproč Polščy, Litvy, Łatvii, u abjavach jość Estonija, taksama Charvatyja, Sierbija i navat Biełaruś.

«Naša Niva» adhuknułasia na prapanovu pad vyhladam čałavieka, zacikaŭlenaha ŭ takoj pracy.

Pieršaje, što ŭdakładniajuć, — heta miescaznachodžańnie patencyjnaha kiroŭcy i na jakich numarach aŭto.

Pa lehiendzie kiroŭca znachodzicca ŭ Litvie i maje mašynu na litoŭskaj rehistracyi, ale pry hetym časta byvaje ŭ Polščy.

«My pieravozim pasažyraŭ u Łatvii, Litvie i Polščy. Apłata za kožnaha pasažyra 200—700 dalaraŭ u zaležnaści ad adlehłaści», — adkazaŭ nam u telehramie čałaviek, padpisany jak Murat.

Jak vyśvietliłasia, na vybar isnuje adrazu niekalki maršrutaŭ. Samy karotki pralahaje pa terytoryi Łatvii z pryhraničnaha haradka Dahda, ad jakoha kala 20 km da Biełarusi, da Ryhi.

Za hety karotki maršrut, jaki nie praduhledžvaje pierasiačeńniaŭ miažy, za čałavieka płaciać pa 200 dalaraŭ.

Samy vysoki taryf — za pieravozku z Ryhi da polskaha horada Hubin, što na samaj miažy z Hiermanijaj. Praciahłaść maršrutu — kala 1150 km. Za dastaŭku adnaho pasažyra abiacajuć 650—700 dalaraŭ.

Admietna, što punkty adboru ŭ Litvie nie prapanoŭvalisia. Mahčyma, heta źviazana z tym, što asnoŭny patok mihrantaŭ ciapier idzie praź biełaruska-łatvijskuju i biełaruska-polskuju miažu.

Jechać — stroha pa abaznačanych kropkach

Inšy varyjant maršrutu — Suvałki-Hubin. Heta značyć, što jašče adzin chab ź nielehalnymi mihrantami znachodzicca niedzie ŭ Suvałkach. Staŭka — 350—400 dalaraŭ za čałavieka. Mihrantaŭ treba zabrać u Polščy i dastavić ich da miažy z Hiermanijaj.

Mienavita polski horad Hubin i źjaŭlajecca kančatkovaj kropkaj, kudy treba dastaŭlać mihrantaŭ, jakija nielehalna traplajuć ź Biełarusi ŭ ES.

Pavialičyć

Horad, jak vidać na fota, padzieleny rakoj, pa jakoj i prachodzić miaža pamiž Polščaj i Hiermanijaj. Dla mihrantaŭ, jak patłumačyŭ Murat, hałoŭnaje — apynucca na terytoryi Hiermanii. Ale praz most z polskaha Hubina ŭ niamiecki Hubien jany nibyta dabirajucca ŭžo asobna.

«Pracadaŭca» papiaredžvaje, što jechać ź mihrantami treba budzie stroha pa abaznačanych kropkach. Napieradzie nibyta budzie jechać mašyna supravadžeńnia, jakaja sočyć za situacyjaj na darozie. Murad u svaju čarhu abiacaje być na suviazi z supravadžalnikam, tamu kali što, adrazu skaža «Stop», kali treba budzie spynicca.

Surazmoŭca zapeŭnivaje, što kali jechać stroha pa kropkach, jakija jon budzie dasyłać, to pajezdka ź vierahodnaściu 99% skončycca pośpiecham.

«Traplajucca ŭ asnoŭnym samyja «razumnyja», jakija sami ŭsio viedajuć, i amatary papić kavy na zapraŭkach», — zapeŭnivaje jon.

Instruktaž z dolaj padmanu

Ale na ŭsiaki vypadak instruktuje, jak sabie pavodzić, kali spyniać pahraničniki abo palicyja.

Hałoŭnaje, jak kaža Murad, — nie kazać, što atrymlivaješ za heta hrošy, bo ŭ takim vypadku mohuć pryciahnuć da adkaznaści, pakolki nie płaciš padatki, a značyć, niezakonna ŭzbahačaješsia.

Maŭlaŭ, prosta kažy, što mašyna maja, kaho chaču, taho i viazu, a dakumienty ŭ pasažyraŭ nie praviaraješ, bo ty ž nie palicejski. Sami mihranty nibyta taksama prainstruktavanyja, jak siabie pavodzić i što kazać.

«Kłapatlivy» pracadaŭca, kaniečnie, troški nie dahavorvaje, bo niezakonnaja pradprymalnickaja dziejnaść — heta nie toj vypadak. Padobnyja pajezdki padpadajuć užo pad kryminalnuju adkaznaść za sadziejničańnie ŭ arhanizacyi niezakonnaha pierasiačeńnia miažy, za što pahražaje da 8 hadoŭ pazbaŭleńnia voli.

Mihranty zhodnyja jechać u bahažniku

Maksimalny zarobak z rejsa moža być kali 3000 dalaraŭ, kali, naprykład, vieźci adrazu piać čałaviek z Ryhi da miažy z Hiermanijaj. Abo kala 1500-2000, kali vieźci z Suvałak da Hubina.

Murat kaža, što mihranty zvyčajna nievysokaha rostu, biez rečaŭ i biez prablem hatovyja jechać u bahažniku, kali heta nie siedan abo kupe.

«Kali bahažnik u sałonie, jany pa dva čałavieki siadajuć. Im aby dabracca da Hiermanii. U mašynie taksama ŭsie pryhinajucca, ich bačna nie budzie. Samaha pryvabnaha sadžaješ napierad, i ŭsio biez paleva», — zapeŭnivaje Murat. 

Pavialičyć

Infarmacyja pra pieravozku nielehałaŭ u bahažniku vyhladaje absalutna praŭdzivaj. Pra takija vypadki nieadnarazova paviedamlali polskija słužby. 

Admietna, što časta pieravozčykami mihrantaŭ źjaŭlajucca hramadzianie Biełarusi i Ukrainy, časam jany dziejničajuć razam.

Jak idzie raźlik?

Pa słovach Murata, raźlik za dastaŭku mihrantaŭ adbyvajecca ŭ kryptavalucie adrazu paśla zaviaršeńnia rejsa.

«Skidvajecie videa, što jany na kančatkovaj kropcy, ofis hrošy razbłakuje, i ja zrablu pieravod. Zajmaje heta ad 30 chvilin da hadziny».

Pa słovach Murata, pa zaviaršeńni rejsa možna adrazu nakiroŭvacca ŭ nastupny, pakolki, pakul niama śniehu, ludziej tak šmat, što možna jeździć choć kožny dzień. Paźniej, maŭlaŭ, taksama buduć pasažyry, ale mienš.

Jak časta łoviać pieravozčykaŭ?

Naviny pra zatrymańni pieravozčykaŭ nielehalnych mihrantaŭ, dzie fihurujuć hramadzianie Biełarusi, źjaŭlucca rehularna. Tak, u kastryčniku 2024 hoda stała viadoma pra zatrymańnie hrupy z 11 čałaviek, jakija arhanizoŭvali dastaŭku mihrantaŭ. Złačynnaja sietka składałasia z hramadzian Polščy, a taksama hramadzian Ukrainy, Biełarusi, Rasii i Hruzii, jakija pražyvajuć u Polščy i inšych jeŭrapiejskich krainach. Apošnija časta vystupali ŭ roli kiroŭcaŭ, pakolki za svaje pasłuhi jany zvyčajna biaruć mienš, čym hramadzianie ES.

Pryčym zaŭvažany biełarusy ŭ pieravozcy mihrantaŭ nie tolki ŭ blizkich da nas krainach. Tak, u pačatku hoda stała viadoma pra sud nad tryma biełarusami ŭ Charvatyi. Pavodle materyjałaŭ spravy, nielehalnych mihrantaŭ abvinavačanyja dastaŭlali z Charvatyi da miažy sa Słavienijaj i Italijaj.

Usiaho z pačatku mihracyjnaha kryzisu, arhanizavanaha režymam Łukašenki ź leta 2021 hoda, u Litvu, Polšču i Łatviju nie puścili bolš za 198 tysiač nielehalnych mihrantaŭ. Bolšaść ź ich sprabavali trapić u Jeŭrasajuz pra Polšču — amal 135 tysiač čałaviek.

• 1
• 0
• 0
• 2
• 0
• 0
• 5
• 0