Amazon pačała vyvodzić na arbitu internet-spadarožniki — kankurenty Starlink
Kampanija Amazon zapuściła ŭ kosmas pieršuju hrupu internet-spadarožnikaŭ u miežach prajekta Kuiper, jaki źjaŭlajecca pramym kankurentam sistemy spadarožnikavaha internetu Starlink Iłona Maska, piša Bi-bi-si.
Rakieta-nośbit Atlas V kampanii United Launch Alliance (ULA), jakaja startavała z kasmadroma na mysie Kanavierał u Fłarydzie ŭ paniadziełak u 19:00 pa miascovym časie (23:00 pa Hrynvičy), vyvieła na arbitu 27 spadarožnikaŭ.
Na praciahu bližejšych hadoŭ Amazon płanuje zapuścić 3236 spadarožnikaŭ na nizkuju vakołziamnuju arbitu, jakija buduć znachodzicca na vyšyni 590, 610 i 630 km i pracavać u źviazcy z 12 naziemnymi stancyjami.
Sistema budzie zabiaśpiečvać šyrokapałosny dostup u internet da 400 miehabit u siekundu (z mahčymaściu pavieličeńnia da 1 Hbit/s i bolš).
«Project Kuiper — heta nizkaarbitalnaja spadarožnikavaja sietka Amazon. Jaje zadača — dapamahčy pieraadoleć ličbavy razryŭ i dać chutki i dastupny šyrokapałosny dostup u internet supolnaściam, jakija nie achopleny abo niedastatkova achopleny tradycyjnymi technałohijami suviazi», — pisała Amazon u 2023 hodzie, pradstaŭlajučy pratatypy abanienckich terminałaŭ. Tady ž, u kastryčniku 2023 hoda, na arbitu byli vyviedzieny testavyja spadarožniki KuiperSat-1 i KuiperSat-2. Zapusk pieršaj hrupy z 27 spadarožnikaŭ płanavaŭsia na pačatku krasavika, ale byŭ adkładzieny z-za drennaha nadvorja.
Z zapuskam spadarožnikaŭ Amazon aficyjna ŭstupiła ŭ honku nie tolki sa Starlink, ale i ź inšymi apieratarami spadarožnikavaha internetu.
SpaceX zapuściła pieršuju partyju spadarožnikaŭ u 2019 hodzie — ciapier na arbicie znachodzicca bolš za 6750 aparataŭ, jakija absłuhoŭvajuć bolš za 5 młn čałaviek pa ŭsim śviecie.
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary