Pamiatajecie viciebskaha turemnaha błohiera, jakoha čarhovy raz adpravili za kraty? Jamu pašancavała z apielacyjaj
Błohier Viktar Jeŭšykaŭ zmoh raskrucicca na tym, što raspaviadaŭ pra svoj šaścihadovy dośvied žyćcia za kratami. U studzieni 2025 hoda jaho znoŭ asudzili. Ale ciapier žonka Viktara padzialiłasia z padpisčykami ščaślivaj navinoj: padadzienaja apielacyja spracavała.
Viktar Jeŭšykaŭ admataŭ nie mienš za 6 hadoŭ u biełaruskich kałonijach (va ŭzroście 18 da 25 hadoŭ). U adnym ź videa mužčyna tłumačyŭ, što jon — nie hramadzianin Biełarusi, a asoba biez hramadzianstva, ale maje ŭ Biełaruski dazvoł na žycharstva.
Pakarańnie ŭ jaho było pa artykule ab raspaŭsiudzie narkotykaŭ. Paśla vyzvaleńnia jon pasialiŭsia ŭ Viciebsku. Pakolki maładość mužčyny pryjšłasia na turemny pieryjad, jon dobra zasvoiŭ pobyt za kratami i staŭ raskazvać pra jaho ŭ sacsietkach.
Ciapier na akaŭnt Jeŭšykava ŭ tyktoku padpisana bolš za 45 tysiač čałaviek, u instahramie — bolš za 18 tysiač. Kala 3 tysiač padpisčykaŭ maje jaho kanał u telehramie i kala 2 tysiač kanał na YouTube. Ale časova ŭsie sacyjalnyja sietki błohiera viadzie jaho žonka, bo Viktar znoŭ trapiŭ za kraty.
U lutym 2025 hoda viciebski sud prysudziŭ Viktaru dva z pałovaj hady kałonii (prakuror prasiŭ na hod bolš). Dakładny artykuł, pa jakim sudzili błohiera, nieviadomy, ale raniej jon raspaviadaŭ pra toje, čamu jaho zatrymali ŭ žniŭni 2024 hoda. Pa słovach mužčyny, adzin z susiedziaŭ patelefanavaŭ u milicyju i paskardziŭsia, što ŭ kvatery źvierchu narkatyčny pryton. U inšym videa Viktar dadaŭ, što niepryjemnaja situacyja adbyłasia praz marychuanu.
Žonka błohiera raspaviała padpisčykam, što 2 maja razhledzieli apielacyju Viktara, i ŭ vyniku źmienšyli termin na paŭhoda.
— A chto nie vieryŭ, kazaŭ, što dadaduć… Mazhoŭ vam niachaj dadaduć, ludzi… My trapili pad hety minimalny pracent, kali źmianšajuć termin. Značyć, los na našym baku!
Nieviadoma, ci paśpieŭ błohier pahasić sudzimaść za papiarednija turemnyja pryhody. Kali jana skončyłasia, to jaho, chutčej za ŭsio, budzie čakać jašče i amnistyja na hod. Sioleta jana raspaŭsiudžvajecca i na narkatyčnyja terminy — ale nie dla recydyvistaŭ.
Kamientary