Biełaruski letnik u Krakavie pad pahrozaj: arhanizatary prosiać dapamohi
Biełaruski fiestyval Letucień, jaki štohod źbiraje tysiačy biełarusaŭ i siabroŭ Biełarusi z roznych krain u Krakavie, apynuŭsia pad pahrozaj. Arhanizatary prosiać nabyć simvaličny kvitok i padtrymać fiestyval.
Letnik uźnik u 2020 hodzie jak nievialikaje siabroŭskaje śviata biełarusaŭ u Polščy, ale ŭžo praź niekalki hadoŭ pieratvaryŭsia ŭ maštabny fiestyval z muzykaj, kirmašom, tancami, sieminarami, siamiejnymi aktyŭnaściami i atmaśfieraj sapraŭdnaha zhurtavańnia.
U 2024 hodzie Letnik sabraŭ bolš za 5000 haściej ź Biełarusi, Polščy, Litvy, Niamieččyny, Niderłandaŭ, Čechii dy inšych krain.
«My z samaha pačatku ładzim Piknik svaimi siłami, biez hanararaŭ, biez bujnych sponsaraŭ. Časta prosta na entuzijaźmie. Ale biez padtrymki supolnaści dalej nie paciahniem», — kažuć arhanizatary.
Biudžet Piknika ŭ 2024 hodzie skłaŭ 100 tysiač złotych (25 tysiač jeŭra). Častku hetaj sumy — kala 40% — udałosia sabrać praz danaty ad udzielnikaŭ. Ciapier arhanizatary ŭžo majuć 20 tysiač złotych z padatkovych pieraličeńniaŭ, ale hetaha niedastatkova.
Kab fiestyval adbyŭsia ŭ 2025 hodzie, arhanizataram nieabchodna sabrać nie mienš za 70% biudžetu da 1 červienia — heta kala 73 tysiač złotych, abo kala 18 tysiač jeŭra.
Jak možna dapamahčy:
Padtrymać danatam: arhanizatary zaklikajuć kožnaha, chto choča dałučycca da śviata, «nabyć» simvaličny kvitok — pieraličyć lubuju pasilnuju sumu.
Padzialicca infarmacyjaj pra fiestyval u sacsietkach i ź siabrami.
Prapanavać partniorstva: kali vy pradstaŭlajecie biznes, vy možacie padtrymać Letnik i stać partnioram padziei. Dla hetaha treba napisać na [[email protected]](mailto:[email protected]).
Fiestyval zapłanavany na 26 lipienia. U prahramie tradycyjna buduć muzyčnyja vystupy, siamiejnyja łakacyi, mastactva, kirmaš, adukacyjnyja placoŭki i šmat miesca dla siabroŭskich sustreč pad kronami drevaŭ.
«Śviata nie adbudziecca biez vas. Kali robim — to razam», — kažuć arhanizatary.
Padtrymać možna tut.
Ciapier čytajuć
Stała viadoma, što ciapier adbyvajecca z palitviaźniem Jurasiom Ziankovičam, jakoha vyzvalili pa prośbie ZŠA17
Kamientary