Łedzi Haha dała biaspłatny kancert u Rya-de-Žanejra dla 2 młn čałaviek
Hledačami biaspłatnaha kancerta amierykanskaj śpiavački Łedzi Hahi na plažy Kapakabana ŭ Rya-de-Žanejra stali bolš za 2 młn čałaviek, paviedamili ŭłady horada.
Samy maštabny ŭ historyi kancert Łedzi Hahi byŭ apłačany z haradskoha biudžetu. Meryja spadziajecca, što ŭ vyniku mierapryjemstva miascovaja ekanomika atrymaje dadatkovyja 100 młn dołaraŭ, piša VVS.
Kancert, jaki adbyŭsia ŭ subotu, staŭ častkaj suśvietnaha turne Łedzi Hahi paśla vychadu jaje vośmaha alboma pad nazvaj Mayhem (heta słova pierakładajecca z anhlijskaj jak «chaos» ci «poŭnaja biazładzica»). Apošni raz jana vystupała ŭ Brazilii ŭ 2012 hodzie.
«Vy mianie čakali, čakali mianie bolš za 10 hadoŭ, — skazała hledačam śpiavačka, razhortvajučy brazilski ściah. — Brazilija, ja hatova! Hatova vykłaścisia pa poŭnaj!»
Niekatoryja prychilniki Łedzi Hahi zajmali čarhu na kancert z nočy i čakali niekalki hadzin, kab patrapić na plaž. Častka hledačoŭ pryjechała na kancert ź inšych haradoŭ Brazilii.
Biaśpieku na kancercie zabiaśpiečvali 5 tysiač supracoŭnikaŭ palicyi. Ułady taksama vykarystoŭvali drony i kamiery z technałohijaj raspaznańnia asob.
Nazirać za tym, što adbyvajecca, hledačy mahli pry dapamozie niekalkich hihanckich ekranaŭ, ustanoŭlenych na plažy.
Łedzi Haha — nie pieršaja pop-zorka, jakaja praviała biaspłatny kancert na plažy Kapakabana, adnak jon staŭ adnym z samych bujnamaštabnych u historyi.
U mai 2024 hoda tut ža vystupała Madona, pavodle acenak meryi, hledačami stali 1,5 młn čałaviek.
Pa dadzienych Knihi rekordaŭ Hinesa, mienavita na plaž Kopakabana pryjšła samaja vialikaja ŭ suśvietnaj historyi aŭdytoryja biaspłatnaha kancerta: u 1994 hodu Rod Ściuart sabraŭ tam na Novy hod 3,5 młn hledačoŭ.
Kamientary
Kancert Łedzi Haha byŭ apłočany ź biudžetu.
Z takim kiraŭnictvam Brazilija nie chutka vybiarecca z halečy.
Hetyja hrošy mahli być patračanyja na adukacyju, miedycynu, navučańnie novym prafiesijam. 🤦🏻🤦🏻🤦🏻