Stała viadoma, kali adkryjuć Čyrvony kaścioł u Minsku

Prajšło dva miesiacy z taho času, jak aficyjna było zajaŭlena pra chutki pačatak budaŭničych rabot u zakrytym užo bolš za dva z pałovaj hady Čyrvonym kaściole (cviatoha Symona i śviatoj Aleny) u Minsku. Niekatoryja ŚMI navat paviedamlali, što ramont pačniecca ŭ sakaviku. Ale da hetaha času situacyja nijak nie źmianiłasia — u chramie pa-raniejšamu nie viaducca nijakija raboty.

Probašč parafii ŭ apošnija tydni padčas niadzielnych abjaŭ nie kranaŭ hetuju temu i ničoha nie paviedamlaŭ pra jakija-niebudź zruchi.

Ale Katolik.life znajšoŭ dakumientacyju, pavodle jakoj u chramie sapraŭdy projduć maštabnyja raboty. Jany zavieršacca nie raniej za 2027 hod. Tolki paśla hetaha možna čakać adkryćcia kaścioła.

Dyrektar dziaržpradpryjemstva «Minskaja spadčyna» zajaŭlaŭ 14 sakavika pra toje, što ramontna-adnaŭlenčyja raboty ŭ budynku chrama pačnucca paśla vyvazu parafijaj svajoj majomaści.

U parafii pryniali hetyja ŭmovy i zabrali amal usie rečy z kaścioła (navat łavy, usiu biblijateku i hruvastkija spaviadalni, niekatoryja pryjšłosia łamać). Vyvaz majomaści zaviaršyŭsia jašče da kanca sakavika.

Było zajaŭlena, što novy kompleks ramontna-adnaŭlenčych rabot uklučaje «zamienu i ramont unutranych i vonkavych inžyniernych sietak». Choć na sajcie «Minskprambuda», jaki ŭ 2017-2019 hadach pa zamovie «Minskaj spadčyny» pravodziŭ pieršuju maštabnuju rekanstrukcyju Čyrvonaha kaścioła (darečy, chram tady nie zakryvali), paznačana, što na tym etapie ŭžo była praviedziena zamiena «ŭsich inžyniernych sietak, unutranych i vonkavych kamunikacyj».

Pavialičyć

Što kankretna źbirajucca rabić ciapier, stała viadoma z dakumientacyi abvieščanaha tendaru na vybar hienpadradčyka. Heta ŭžo druhi tendar, termin jakoha zakančvajecca 15 traŭnia, a pieršy byŭ pryznany niesapraŭdnym. Zajaŭku ŭ toj raz padała tolki adna arhanizacyja — toj ža samy «Minskprambud».

Źviartaje na siabie ŭvahu, što ŭ dziaržzakupcy abjekt nie nazyvajuć kaściołam, a «budynkami № 13, № 15 pa vuł. Savieckaj» (sam chram i plabanija, dom śviatara).

Prajekt praduhledžvaje, u pryvatnaści, ramont dachu, ustalavańnie šklanoha kazyrka, vonkavych inžyniernych sietak, akonnych prajomaŭ, supraćpažarnych pieraharodak, pakryćcia padłoh, kompleks santechničnych i elektramantažnych rabot, mierapryjemstvy dla stvareńnia biezbarjernaha asiarodździa, novaje manalitnaje pierakryćcio.

Što tyčycca elektrapravodki, to «prajektam praduhledžanaja abarona razdymnymi kažuchami najaŭnych kabielnych linij». Taksama płanujecca ramont sistem aciapleńnia, vodazabieśpiačeńnia, kanalizacyi.

Ź miascovaha biudžetu Minska na novuju rekanstrukcyju pavinna być vydzielena amal 10 miljonaŭ rubloŭ. Termin rabot — 20 miesiacaŭ. Jany pavinny pačacca ŭ červieni 2025 hoda i zaviaršycca ŭ śniežni 2026 hoda, a zdača abjekta ŭ ekspłuatacyju zapłanavanaja na studzień 2027 hoda.

• 0
• 0
• 1
• 7
• 1
• 2
• 4
• 0