Palitźniavolenaha 55-hadovaha hramadzianina Ukrainy Juryja Bandarenku zatrymali hod tamu — 5 maja 2024 hoda. Jaho abvinavacili pavodle art. 368 Kryminalnaha kodeksa (abraza Łukašenki) i asudzili da adnaho hoda i šaści miesiacaŭ kałonii. «Viasna» daznałasia, za što mienavita asudzili ŭkrainca ŭ Biełarusi.
10 lipienia 2024 hoda ŭ sudzie Babrujskaha rajona i horada Babrujska Juryja Bandarenku asudzili pavodle č. 1 art. 368 KK (abraza Łukašenki) da adnaho hoda i šaści miesiacaŭ kałonii ahulnaha režymu. Prysud vynies sudździa Andrej Litvin. Spravu razhladali ŭ zakrytym režymie.
Pravaabaroncam «Viasny» stała viadoma, što Juryj Bandarenka rodam z Krapiŭnickaha. U jaho jość dzicia. Paśla zatrymańnia mužčynu adrazu źmiaścili pad vartu ŭ SIZA № 4 u Mahilovie.
Pavodle abvinavačvańnia, ranicaj 4 maja Bandarenka kala kramy «Tranzit» vykazaŭsia ŭ prysutnaści inšych hramadzian u nieprystojnaj formie pra Łukašenku. Zhodna viersii abvinavačvańnia, matyvam ukrainca stała «padtrymka idej sacyjalnaj nieciarpimaści da pradstaŭnikoŭ ułady Respubliki Biełaruś i adkrytaja prajava niepryjaznaści da jaje».
Adzin z prysutnych źviarnuŭsia ŭ milicyju i navat padzialiŭsia fotazdymkam mašyny, na jakoj źjechaŭ Juryj Bandarenka sa svaim tavaryšam. Na nastupny dzień ukrainca zatrymali pa abvinavačvańni ŭ abrazie Łukašenki.
Na sudzie Bandarenka pryznaŭ vinu. Na pasiadžeńni dapytali śviedku, jaki i danios na ŭkrainca.
Pry hetym Juryja asudzili faktyčna tolki na padstavie danosu. U jakaści dokazaŭ nibyta jahonaj vinavataści stali źviestki, padadzienyja babrujcam-danosčykam, zapis jahonaha telefonnaha zvanka ŭ milicyju, videazapis z kramy «Tranzit», jaki paćviardžaje tolki znachodžańnie Juryja Bandarenki kala hetaj kramy, i fotavyjava mašyny Bandarenki, na jakoj jon źjechaŭ, z telefona danosčyka.
Aŭdyjozapisaŭ i videazapisaŭ, jakija b paćviardžali vykazvańnie ŭkraincam abrazaŭ, u materyjałach spravy niama.
Kamientary