Tramp pra vyniki razmovy z Pucinym: Pieramovy pamiž Rasijaj i Ukrainaj pačnucca nieadkładna
Prezident ZŠA Donald Tramp u sacsietcy Truth Social napisaŭ svaju viersiju vynikaŭ dvuchhadzinnaj razmovy z rasijskim kiraŭnikom Uładzimiram Pucinym.
«Tolki što zaviaršyŭ dvuchhadzinnuju razmovu z prezidentam Rasii Uładzimiram Pucinym. Liču, što jana prajšła vielmi dobra.
Rasija i Ukraina nieadkładna pačnuć pieramovy ab spynieńni ahniu i, što jašče važniej, pra poŭnaje zaviaršeńnie vajny. Umovy buduć uzhodnienyja pamiž dvuma bakami — jak i pavinna być, bo tolki jany viedajuć padrabiaznaści pieramoŭnaha pracesu, jakija niedastupnyja nikomu inšamu. Ton i duch razmovy byli vydatnyja. Kali b heta było nie tak, ja skazaŭ by pra heta prosta ciapier, a nie paźniej.
Rasija choča raźviarnuć maštabny handal sa Złučanymi Štatami paśla zaviaršeńnia hetaj katastrafičnaj «kryvavaj łaźni», i ja padtrymlivaju hetuju ideju. Rasija maje kałasalnyja mahčymaści dla stvareńnia pracoŭnych miescaŭ i pavieličeńnia dabrabytu. Jaje patencyjał — biaźmiežny. Ukraina taksama moža stać bujnym bienieficyjaram handlovych adnosin u pracesie adnaŭleńnia svajoj krainy.
Pieramovy pamiž Rasijaj i Ukrainaj pačnucca nieadkładna. Ja paviedamiŭ pra heta prezidentu Ukrainy Uładzimiru Zialenskamu, prezidentu Jeŭrapiejskaj kamisii Ursule fon der Lajen, prezidentu Francyi Emanuelu Makronu, premjer-ministru Italii Džordžy Miełoni, fiederalnamu kancleru Hiermanii Frydrychu Miercu i prezidentu Finlandyi Alaksandru Stubu padčas telefonnaj razmovy adrazu paśla hutarki z prezidentam Pucinym.
Vatykan, pavodle słoŭ Papy Rymskaha, vykazaŭ mocnuju zacikaŭlenaść u praviadzieńni hetych pieramoŭ na svajoj terytoryi.
Niachaj praces pačniecca!»
Kamientary