Трамп пра вынікі размовы з Пуціным: Перамовы паміж Расіяй і Украінай пачнуцца неадкладна
Прэзідэнт ЗША Дональд Трамп у сацсетцы Truth Social напісаў сваю версію вынікаў двухгадзіннай размовы з расійскім кіраўніком Уладзімірам Пуціным.
«Толькі што завяршыў двухгадзінную размову з прэзідэнтам Расіі Уладзімірам Пуціным. Лічу, што яна прайшла вельмі добра.
Расія і Украіна неадкладна пачнуць перамовы аб спыненні агню і, што яшчэ важней, пра поўнае завяршэнне вайны. Умовы будуць узгодненыя паміж двума бакамі — як і павінна быць, бо толькі яны ведаюць падрабязнасці перамоўнага працэсу, якія недаступныя нікому іншаму. Тон і дух размовы былі выдатныя. Калі б гэта было не так, я сказаў бы пра гэта проста цяпер, а не пазней.
Расія хоча развярнуць маштабны гандаль са Злучанымі Штатамі пасля завяршэння гэтай катастрафічнай «крывавай лазні», і я падтрымліваю гэтую ідэю. Расія мае каласальныя магчымасці для стварэння працоўных месцаў і павелічэння дабрабыту. Яе патэнцыял — бязмежны. Украіна таксама можа стаць буйным бенефіцыярам гандлёвых адносін у працэсе аднаўлення сваёй краіны.
Перамовы паміж Расіяй і Украінай пачнуцца неадкладна. Я паведаміў пра гэта прэзідэнту Украіны Уладзіміру Зяленскаму, прэзідэнту Еўрапейскай камісіі Урсуле фон дэр Ляен, прэзідэнту Францыі Эмануэлю Макрону, прэм’ер-міністру Італіі Джорджы Мелоні, федэральнаму канцлеру Германіі Фрыдрыху Мерцу і прэзідэнту Фінляндыі Аляксандру Стубу падчас тэлефоннай размовы адразу пасля гутаркі з прэзідэнтам Пуціным.
Ватыкан, паводле слоў Папы Рымскага, выказаў моцную зацікаўленасць у правядзенні гэтых перамоў на сваёй тэрыторыі.
Няхай працэс пачнецца!»
Каментары