Adzinaccać hadoŭ Łukašenka raźvivaje harady-spadarožniki. Pakul atrymlivajecca nie vielmi
U mai 2014 hoda Łukašenka padpisaŭ ukaz ab raźvićci haradoŭ-spadarožnikaŭ. Status spadarožnika Minska tady atrymali šeść haradoŭ. Jany pavinny byli adciahnuć na siabie nasielnictva Minska, jakoje imkliva raście. Atrymałasia, miakka kažučy, nie ŭsio, piša «Płan B».
Hetaj viasnoj ź inśpiekcyjaj čarhovaha miehaprajekta Łukašenki pajechała pieršaja namieśnik kiraŭnika Administracyi Natalla Piatkievič.
Piatkievič nazvała aŭtaram idei haradoŭ-spadarožnikaŭ Łukašenku i adznačyła, što ideja — «cudoŭnaja i kompleksnaja». A Smalavičy, kudy jana zajechała ŭ paniadziełak, — amal idealnym horadam-spadarožnikam.
«Pierad hetym my naviedali Skidziel i Žabinku. Smalavičy — heta amal idealny prykład. Nasamreč dzieści stanovicca vielmi kryŭdna, što razhojdvajemsia pavolna. Dziesiać hadoŭ prajšło, i, kali b pačali spačatku, užo było b zusim inakš. Ale pačali pozna. Niedzie jość abjektyŭnyja pryčyny, niedzie, na žal, subjektyŭnyja. U adnym z haradoŭ pryvodzili prykład, kali prajektnyja raboty viaducca praktyčna amal piać hadoŭ. Heta, viadoma, nienarmalna», — pryznała čynoŭnica.
Sam Łukašenka pačaŭ prasoŭvać ideju hadoŭ piatnaccać tamu. Ale sprava nie kleiłasia. «Z 2012 hoda sprava nie prasunułasia dalej za adzin zdadzieny dom u Smalavičach. Jano i nie ssuniecca, kali Dziaržaŭnaja prahrama pa vynasie vytvorčych abjektaŭ pravalena, — narakaŭ jon u 2018-m. — A pieranos zapłanavanych 12 pradpryjemstvaŭ (naprykład, «Biełaruskija špalery», abutkovaja fabryka «Łuč», Minski zavod aciaplalnaha abstalavańnia i inšyja) pryciahnuŭ by ŭ rehijony pracoŭnuju siłu».
Ale mianiać prapisku pradpryjemstvy nie śpiašalisia, prajekty zaciahvalisia, a to i sabatavalisia. Z prykmietnych «pieranosaŭ» možna adznačyć začynieny aeraport Minsk-1, na miescy jakoha «Dana» buduje «Minsk-Śviet», i ptuškafabryku imia Krupskaj, (za placoŭku braŭsia «Trajpł», ale ŭ vyniku žyły kompleks «Levada» tut pabudavała inšaja kampanij — «Ajran»).
Pakul pustavata
Tak što pracoŭnych miescaŭ u haradach-spadarožnikach, navat idealnych, akazałasia niašmat.
Na pracu bolšaści treba jeździć u Minsk. Ale vyśvietliłasia, što chutkija i niedarahija transpartnyja znosiny z haradami-spadarožnikami raźvita niedastatkova. Prynamsi, čerhi na maršrutku na Smalavičy tak i stajać u Minsku, kala mietro «Uschod».
«Z čyhunkaj ničoha novaha: haradskaja elektryčka vielmi redkaja plus treba pierasadžvacca na miascovy aŭtobus, kab dabracca da novabudoŭlaŭ — karaciej, tut niazručna było i budzie», — adznačyŭ dniami błohier Dzianis Blišč.
Praŭda, minułaj vosieńniu pra transpart pryhadaŭ i Łukašenka. I prapanavaŭ pabudavać chutkasnyja darohi dla ciahnikoŭ u harady-spadarožniki Minska.
Pavodle jaho acenak, heta nie zojmie šmat času, i nie patrabuje vialikich finansavych układańniaŭ. Čamu hetaha nie ŭdałosia zrabić za dziesiać hadoŭ realizacyi prahramy haradoŭ-spadarožnikaŭ, Łukašenka nie ŭdakładniŭ.
Siońnia Piatkievič pryznała, što navat Smalavičy rastuć bolš pavolna, čym płanavałasia.
«Zadača była pryraści da 50 tysiač čałaviek, pakul jość 23 tysiačy. Jość namiotki pryraści da 27 tysiač, ale zadaču pa 50 tysiačach Smalavičy nie vykanali», — skazała jana.
50 tysiač — heta płan da 2035 hoda. Pakul, miarkujučy pa fota i błohieraŭ, i dziaržžurnalistaŭ, u horadzie całkam pustynna.
Pry hetym narod praciahvaje skardzicca na deficyt daktaroŭ, nastaŭnikaŭ, trenieraŭ, hipiermarkietaŭ i inšych radaściej žyćcia. Piatkievič ža, nie ŭdajučysia ŭ padrabiaznaści, zapeŭniła, što z dastupnaściu mieddapamohi i kvalifikacyjaj u Smalavičach usio vielmi dobra. Z astatnim, uvohule, — taksama.
Vyhladała čynoŭnica vydatna, žurnalisty «Našaj Nivy» źviarnuli ŭvahu na jaje luksavy ramień Hermes.
Ciapier čytajuć
«Skazali, što ludzi ź vizami typu C nie zmohuć pierasiačy miažu». Na litoŭskich prapusknych punktach zdaryŭsia kałaps5
Kamientary