Da vieteranaŭ śpiecnaza Paŭličenki pryjazdžaŭ niezvyčajny hość: biełarus, ale musulmanin
Na čarhovyja zaniatki pa taktyčnaj padrychtoŭcy dobraachvotnickaha atrada Asacyjacyi vieteranaŭ śpiecnaza MUS, jakim kiruje sumnaviadomy adstaŭny pałkoŭnik Dźmitryj Paŭličenka, u pačatku červienia pryjazdžaŭ niezvyčajny hość, zaŭvažyŭ Mayday.team.
Nibyta «z metaj abmienu dośviedam» Minsk naviedaŭ staršynia Rady krapavych bieretaŭ vajskoŭcaŭ zapasu Karelii, uradženiec biełaruskaj stalicy Siarhiej Dziatko. Adnak u Karelii jon viadomy pad inšym imiem — Dziatko Said Abduł Aziz (Siarhiej) Alaksandravič. Jon staršynia Duchoŭnaha ŭpraŭleńnia musulman Respubliki Karelija (Karelski Muchtasibat).
Dźmitryj Paŭličenka, viadomy jak kamandzir łukašenkaŭskich «eskadronaŭ śmierci» jašče 1990-ch hadoŭ, pradstaviŭ hościa jak vieterana, jaki prachodziŭ słužbu ŭ jašče savieckich padraździaleńniach pa baraćbie z teraryzmam, udzielnika 11 bajavych apieracyj, u tym liku va Uźbiekistanie, Nahornym Karabachu, Abchazii, a taksama pa vyzvaleńni zakładnikaŭ u Suchumi ŭ 1990 hodzie (na toj momant Siarhieju Dziatko było ŭsiaho 20 hadoŭ).
Pry hetym Paŭličenka nie kazaŭ, što ŭ 1997 hodzie śpiecnazaviec Siarhiej Dziatko pryniaŭ isłam u Inhušecii, praz čatyry hady vyjechaŭ u Livan vučyć arabskuju movu, a pa viartańni na praciahu troch hadoŭ byŭ pamočnikam muftyja Biełarusi pa pytańniach adukacyi.
Paśla hetaha jon skončyŭ bakałaŭryjat šaryjackaha fakulteta ŭ Jeŭrapiejskim instytucie humanitarnych navuk va Uelsie, a z 2010 hoda — paśla raźmierkavańnia vypusknikoŭ — jon staŭ imamam miačeci ŭ Pietrazavodsku.
U ciapierašni vizit u Minsk jon pryjazdžaŭ z žonkaj, mahiloŭkaj Marjam Kavalovaj, jakaja taksama pryniała isłam. U Minsku i Homieli jana pieryjadyčna pravodzić relihijnyja zaniatki dla dziaciej siemjaŭ, jakija pryniali isłam, a taksama viadzie pracu supolnaści musulmanak Biełarusi.
U Karelii Abduł Aziz taksama pieryjadyčna nadziavaje vajskovuju formu i savieckija ordeny i ŭ takim vyhladzie pravodzić lekcyi dla sałdat avijapałka ŭ pasiołku Biesaviec. Muftyj sprabuje pryščapić rasijskim navabrancam asnovy isłamu i pravodzić hutarki duchoŭna-maralnaha źmiestu.
Musulmanie Rasii imknucca nie kranacca temy vajny Rasii suprać Ukrainy, ale aktyŭna dapamahajuć žycharam Hazy. Muftyj Karelii Šejch Abduł Aziz pieryjadyčna jeździć na kursy pavyšeńnia kvalifikacyi ŭ Ankaru.
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary