Na minułym tydni adbylisia ŭciečki piersanalnych danych ź niekalkich biełaruskich kampanij
17 červienia ŭ Minsku padčas forumu Digital Expo dyrektar Nacyjanalnaha centra abarony piersanalnych danych Andrej Hajeŭ paviedamiŭ, što, niahledziačy na ahulnaje źnižeńnie kolkaści ŭciečak danych za apošnija hady, prablema ŭsio jašče zastajecca aktualnaj, piša BiełTA.
Na minułym tydni centr vyjaviŭ novyja ŭciečki asabistaj infarmacyi, pra jakija sami kampanii, vierahodna, navat nie viedali. Pavodle słoŭ Andreja Hajeva, heta adbyłosia praz supracoŭnikaŭ, upaŭnavažanych pracavać ź piersanalnymi danymi.
Incydenty byli zafiksavanyja ŭ arhanizacyjach, što zajmajucca videanazirańniem i dziejničajuć u budaŭničaj śfiery. U hetych kampanijach, jak vyśvietliłasia, nie byli naležnym čynam arhanizavanyja techničnyja i inšyja miery biaśpieki.
Hajeŭ adznačyŭ, što niedachopy ŭ arhanizacyi abarony danych mohuć nie tolki sapsavać reputacyju biznesu, ale i pryvieści da finansavych strat. Jon zaklikaŭ kampanii być bolš uvažlivymi da pracesaŭ, jakija adbyvajucca ŭ ich struktury, i svoječasova prymać miery.
Taksama Hajeŭ paviedamiŭ, što pravodzicca manitorynh vykanańnia zakona ab abaronie piersanalnych danych. Sistemnych parušeńniaŭ nie vyjaŭlena, ale pakolki zakonu ŭ nastupnym hodzie spaŭniajecca piać hadoŭ, padrychtavany prajekt źmienaŭ, jaki ŭličvaje ŭsie prapanovy i nazapašany vopyt.
Kamientary