ZŠA aficyjna zabaranili Vieniesuele mieć naftavyja spravy z Rasijaj
Ministerstva finansaŭ ZŠA ŭviało bolš žorstkija ŭmovy pracy ź vieniesuelskaj naftavaj kampanijaj PDVSA: ciapier lubyja jaje apieracyi pavinny adbyvacca biez udziełu Rasii, Irana, Paŭnočnaj Karei, Kuby i ich kantralavanych struktur, piša The Moscow Times.
Try novyja licenzii, vydadzienyja amierykanskim Upraŭleńniem pa kantroli za zamiežnymi aktyvami (OFAC), častkova zdymajuć peŭnyja abmiežavańni dla ŭzajemadziejańnia z uradam Vieniesueły i PDVSA.
Adna z hetych licenzij dazvalaje ekspart, pieravozku i pierapracoŭku vieniesuelskaj nafty amierykanskimi arhanizacyjami, druhaja — pastaŭku techniki i pasłuh dla raźviedki i zdabyčy nafty, a treciaja — apieracyi ŭ partach i aeraportach. Usie kantrakty pavinny kiravacca zakonami ZŠA, a vypłaty «zabłakavanym asobam» (akramia miascovych padatkaŭ) pieraličvacca na rachunki zamiežnaha ŭrada.
Hetaje abmiežavańnie mocna ŭdaryć pa rasijskich inviestycyjach u Vieniesuełu, jakija składajuć prykładna $17 miljardaŭ i ŭklučajuć doli ŭ naftapradpryjemstvach, stvoranych z PDVSA. «Rasnafta» ŭ siaredzinie 2010‑ch adkryła ź Vieniesuełaj piać sumiesnych pradpryjemstvaŭ, ale paśla sankcyj 2020 hoda aktyvy pierajšli ŭ «Raszamiežnaftu», jakaja naležyć rasijskaj dziaržavie.
U listapadzie 2025 hoda vieniesuelskaja Nacyjanalnaja asambleja praciahnuła hetyja prajekty da 2041 hoda z dadatkovymi inviestycyjami $616 miljonaŭ i płanam zdabyčy kala 91 miljona baralaŭ nafty na 15 hadoŭ. Paśla aryštu Madura ŭ studzieni 2026 hoda funkcyi prezidenta ŭziała na siabie vice-prezident Dełsi Radryhies, a prezident ZŠA Donald Tramp zajaviŭ, što vieniesuelskaja nafta ciapier «naležyć ZŠA» i što zamiežnyja kampanii pavinny pracavać praz administracyju ZŠA, a nie niepasredna z Karakasam.
Kamientary