Były dypłamat Śluńkin adkazaŭ Kaleśnikavaj — čamu ŭ Rasii jość pasły ES, a ŭ Biełarusi amal nikoha niama

Učora situacyju z pasłami znoŭ zakranuła Maryja Kaleśnikava, razmaŭlajučy ŭ Bierlinie z žurnalistami.

«Čamu z Pucinym niechta razmaŭlaje, čamu tam (u Rasii) jość pasły, a ŭ nas — niama? Bo heta ž niesupastaŭnyja rečy. Pucin hadami zabivaje Ukrainu, ukraincaŭ užo stolki hadoŭ, pralivajecca kroŭ, heta ŭsio robicca cynična, heta žudasny ŭzrovień prapahandy — heta niejkija rečy za miežami dabra i zła ciapier adbyvajucca. Ale ź im [Pucinym] mohuć razmaŭlać, u jaho mohuć być dypłamaty. A ŭ nas — niama», — zadałasia pytańniem jana (pryvodzić słovy «Lusterka»).

«Davajcie pahavorym pra dypłamatyju i dypłamatyčnyja adnosiny», — palemizuje Pavieł Śluńkin.

1. Pačniom z bazavych pytańniaŭ. Uzrovień dypłamatyčnych adnosin — heta indykatar miždziaržaŭnych adnosin. Kali hetyja adnosiny paharšajucca, krainy mohuć panižać uzrovień svaich i zamiežnych dyppradstaŭnictvaŭ. Naprykład, u kastryčniku 2020 hoda biełaruskija ŭłady adklikali svaich pasłoŭ ź Litvy i Polščy ŭ Minsk i «paprasili» pasłoŭ Polščy i Litvy pakinuć terytoryju Biełarusi.

2. Taksama krainy mohuć abmiažoŭvać kolkaść dypłamataŭ toj ci inšaj dziaržavy. Naprykład, Biełaruś niekalki razoŭ skaračała kolkaść dypłamataŭ ZŠA ŭ krainie da minimumu. Abo źmianšała kolkaść konsulskich supracoŭnikaŭ Polščy, jakija vydavali biełarusam vizy i karty palaka.

3. Kali adnosiny zusim drennyja, krainy mohuć razarvać dypłamatyčnyja adnosiny. Naprykład, ZŠA razarvali dypadnosiny z Kubaj i adnavili ich tolki praź dziesiacihodździ. A razarvanyja adnosiny ź Iranam paśla isłamskaj revalucyi nie adnoŭlenyja dahetul. Hruzija i Ukraina razarvali dypadnosiny z Rasijaj paśla napadu hetaj krainy na ich. Adnak navat u takich vypadkach, uličvajučy nieabchodnaść vyrašać pytańni adno z adnym, krainy časta pryznačajuć pasrednikaŭ, praź jakich viaduć kamunikacyju. Šviejcaryja, naprykład, vykonvaje takuju funkcyju dla Hruzii i Rasii.

4. Najaŭnaść abo adsutnaść pasłoŭ — vielmi važny indykatar. Pasły mohuć raźličvać na bolš vysoki ŭzrovień sustreč u zamiežnych stalicach i majuć bolšuju vahu ŭnutry ŭładnych ijerarchij svaich krain. Adnak pry najaŭnaści žadańnia damaŭlacca adsutnaść pasłoŭ redka stanovicca pieraškodaj.

Naprykład, u 2020 hodzie ŭ Biełarusi nie było pasła ZŠA, ale časovaja pavieranaja ŭ spravach ZŠA Dženifier Mur rehularna sustrakałasia z kiraŭnikom MZS i sakratarom Rady biaśpieki.

Pavialičyć

Jana navat zdoleła ŭpieršyniu pryvieźci ŭ Biełaruś Dziaržsakratara ZŠA Majka Pampiea ŭ lutym 2020 hoda.

Abo inšy prykład. Moj siabar i kaleha Pavieł Macukievič zdoleŭ stvaryć hrupu družby pamiž parłamientami Biełarusi i Šviejcaryi, arhanizavać vizit u Biern staršyni Pałaty pradstaŭnikoŭ Andrejčanki i navat atrymać aficyjnaje zaprašeńnie na ŭzroŭni prezidenta Biełarusi naviedać Čempijanat śvietu pa chakiei 2020 hoda. Choć Pavieł nie byŭ pasłom, jon byŭ časovym pavieranym u spravach.

A voś pasoł, jaki pryjechaŭ na źmienu Macukieviču, Alaksandr Hanievič, nie demanstruje značnych pośpiechaŭ. Nie tamu, što jon niekvalifikavany dypłamat, a tamu, što bolš vahomyja faktary ŭ dvuchbakovych adnosinach (vajna, palitviaźni, biesprecedentnyja dla Jeŭropy represii, sankcyi i h.d.) składvajucca tak, što sama prysutnaść pasła Biełarusi ŭ Biernie nie moža apryjory prynosić surjoznyja vyniki.

Jašče prykład: ZŠA zaraz viaduć pieramovy ź Iranam na vysokim uzroŭni, choć farmalnych dypadnosin pamiž krainami niama ŭžo bolš za 45 hadoŭ. A ŭ 2015 hodzie pieramovy amierykancaŭ ź irancami pryviali da histaryčnaha pahadnieńnia pa iranskaj jadziernaj prahramie.

Uvohule, jak praviła, sprava nie ŭ pasłach, a ŭ žadańni. I kali jano jość z abodvuch bakoŭ, adnosiny mohuć raźvivacca i pry najaŭnaści časovaha pavieranaha na čale misii.

5. U Biełarusi ciapier jość pasły krain ES — Vienhryi i Słavakii. Inšyja krainy ES pradstaŭlenyja na ŭzroŭni časovych pavieranych u spravach. U Minsk rehularna pryjazdžaje ministr zamiežnych spraŭ Vienhryi Pieter Sijarta, a premjer-ministr Słavakii Fica mieŭ razmovy z Łukašenkam na palach mižnarodnych samitaŭ. Paśla 2020 hoda byłyja ministry zamiežnych spraŭ Biełarusi Makiej i Alejnik mieli niepubličnyja sustrečy sa svaimi jeŭrapiejskimi vizavi. Łukašenku telefanavali Mierkiel, Makron i Pampiea; Makieju — Barel i inš.

Kamunikacyja nikoli nie spyniałasia, ale jaje intensiŭnaść i rehularnaść istotna źnizilisia. Hałoŭnaj pieraškodaj źjaŭlajecca nie adsutnaść dypłamatyčnaj kamunikacyi, a pazicyi bakoŭ pa klučavych pytańniach dvuchbakovaha paradku dnia.

6. Jość jašče adna prablema. Krainy ES (za vyklučeńniem Vienhryi i Słavakii) ciapier nie pryznajuć Alaksandra Łukašenku prezidentam Biełarusi. Kab pryznačyć svajho pasła, dziaržava farmalna pavinna ŭručyć Łukašenku davierčuju hramatu (aficyjny dakumient), u jakoj čornym pa biełym napisana «Prezidentu Respubliki Biełaruś Alaksandru Łukašenku». Uručeńnie takoha dakumienta budzie farmalnym pryznańniem jaho prezidentam. Mienavita tamu amal usie krainy ES ustrymlivajucca ad hetaha kroku.

Pryznačanamu pasłu ZŠA ŭ Biełarusi Džuli Fišer z hetaj ža pryčyny biełaruskija ŭłady nie vydali vizu ŭ 2021 hodzie. Pazicyja ZŠA tady zaklučałasia ŭ tym, kab nakiravać Fišer u Biełaruś i pracavać tam, adnak paźbiehnuć uručeńnia vierčych hramat Łukašenku.

7. Z Uładzimiram Pucinym situacyja inšaja. Nivodnaja z krain ES nie admaŭlałasia pryznavać jaho. Jany pa-raniejšamu ličać jaho prezidentam Rasii, jaki, choć i falsifikavaŭ vybary i dušyŭ pratesty, nie prajhraŭ ich nastolki vidavočna, jak Alaksandr Łukašenka ŭ 2020 hodzie. Tamu ŭ Rasii spakojna pracujuć pasły krain ES, jakija ŭručajuć Pucinu davierčyja hramaty.

Da vybaraŭ 2020 hoda Łukašenka byŭ u padobnym stanoviščy: krainy ES ličyli vybary ŭ Biełarusi niedemakratyčnymi, a aficyjnyja vyniki — takimi, što nie adlustroŭvajuć volu biełaruskaha naroda. Ale zachodnija pasły ŭručali jamu vierčyja hramaty, a jeŭrapiejskija ŭrady pryznavali jaho prezidentam.

8. Nie zaŭsiody žadańnie adnoj krainy viarnuć pasła ŭ inšuju znachodzić uzajemnaść. Biełaruś niekalki razoŭ u historyi dypadnosin na zakrytych pieramovach kazała «što ciapier nie čas», kali zachodnija krainy vychodzili z takoj prapanovaj.

9. I naprykancy jašče adna historyja. U 2022 hodzie Časovuju pavieranuju ŭ spravach ES u Biełarusi Evielinu Šulc, u parušeńnie Vienskaj kanviencyi, zatrymali, dastavili ŭ milicejski ŭčastak i pratrymali tam kala dźviuch hadzin. Simvalična, što zatrymali jaje za toje, što jana pryjšła na sud nad palitviaźniami», — zaklučyŭ Pavieł Śluńkin.

• 40
• 0
• 2
• 5
• 0
• 0
• 0
• 0