Pracavała z KDB praź inšaha biełarusa i ŭžo słužyła ŭ Minabarony Ukrainy. Novyja detali ŭ spravie Iny Kardaš
Na momant zatrymańnia Ina Kardaš pracavała ŭ Kaardynacyjnym štabie ŭ pytańniach abychodžańnia z vajennapałonnymi Hałoŭnaha ŭpraŭleńnia vyviedki Ministerstva abarony Ukrainy. «Svaboda» daviedałasia ab niekatorych novych detalach z materyjałaŭ spravy biełaruski Iny Kardaš va Ukrainie.
Zatrymlivali jak vajskovuju
Jak paviedamiła «Svabodzie» infarmavanaja krynica ŭ pravaachoŭnych orhanach, Inu Kardaš zatrymali 21 studzienia. Papiarednie rašeńniem sudu jaje aryštavali da 20 sakavika ŭklučna.
Kali da hetaha momantu dasudovaje rasśledavańnie nie zavieršać, to sud kožnyja dva miesiacy pavinien praciahvać jaje ŭtrymańnie pad vartaj. Anałahičnaje rašeńnie patrebnaje na čas sudovaha razhladu spravy.
U materyjałach spravy adznačajecca, što Ina Kardaš maje vyšejšuju adukacyju i žyła ŭ zarehistravanym šlubie. Na momant aryštu jana była vajskovaj u zvańni sałdata (va Ukrainie paśla vajskovaj reformy «sałdat» źjaŭlajecca adnym z zvańniaŭ u šarahovym składzie. — RS).
Jak vyśvietliłasia, u listapadzie 2025 hodu Inu Kardaš uziali na pracu ŭ Kaardynacyjny štab u pytańniach abychodžańnia z vajennapałonnymi Hałoŭnaha ŭpraŭleńnia vyviedki Ministerstva abarony Ukrainy.
Spravu suprać jaje zaviali jašče letaś
Spravu suprać Iny Kardaš zaviali 16 lipienia 2025 hodu. Da taho momantu śledčyja ŭžo ažyćciaŭlali za joj niehałosnaje nazirańnie, a padazreńnie ŭ špijanažy na karyść Kamitetu dziaržbiaśpieki Biełarusi ŭručyli tolki ŭ dzień zatrymańnia — sioleta 21 studzienia.
Na sudzie, kali razhladałasia chadajnictva prakurora ab aryšcie, zatrymanaja i jaje advakat zajavili ab nieabhruntavanaści padazreńniaŭ i adsutnaści ryzykaŭ, što jana budzie chavacca ad śledstva abo inšym šlacham pieraškadžać śledstvu. Ale sud padtrymaŭ pazicyju abvinavačańnia.
Spravu Iny Kardaš rasśleduje Hałoŭnaje śledčaje ŭpraŭleńnie Słužby biaśpieki Ukrainy.
Apošnija instrukcyi z KDB atrymlivała ŭ Vienhryi
Zhodna z materyjałami śledstva, Ina Kardaš supracoŭničała z KDB z 2019 hoda.
Śledčyja śćviardžajuć, što svaje kantakty z KDB jana ažyćciaŭlała praz hramadzianina Biełarusi, jaki «śviadoma dla jaje ažyćciaŭlaŭ kanfidencyjalnuju supracu sa śpiecsłužbami Biełarusi».
Hety biełarus, ź jakim jana razmaŭlała nie paźniej za 6 vieraśnia 2025 hodu, prapanavaŭ joj vyjechać u Budapiešt (Vienhryja), kab tam atrymać nieabchodnyja instrukcyi.
U Budapiešt jana pryjechała 16 vieraśnia, nabyła tam novy mabilny telefon i nibyta ŭstalavała «prykładańnie dla zašyfravanych kanfidencyjnych razmoŭ». Potym patelefanavała biełarusu, a toj padłučyŭ da ich razmovy supracoŭnika KDB Biełarusi.
U časie hetaj sustrečy Kardaš nibyta atrymała zadańnie ŭładkavacca na pracu ŭ Kaardynacyjny štab u pytańniach abychodžańnia z vajennapałonnymi.
Jakuju infarmacyju pieradavała ŭ KDB
Jak vynikaje z materyjałaŭ spravy, na pracu ŭ štab jaje ŭziali ŭžo ŭ listapadzie. U dakumientach adznačajecca, što sama mieniej z 21 listapada da 19 śniežnia jana «sistemna źbirała słužbovuju infarmacyju» — fatahrafavała dakumienty i zapisvała razmovy inšych supracoŭnikaŭ štabu, zapisy jakich potym pieradavała ŭ Biełaruś.
U SBU, kali paviedamili ab zatrymańni Iny Kardaš, śćviardžali, što joj naŭmysna padkidvali infarmacyju z hryfam «Tajemna», jakaja nasamreč była vyhadnaj i nie mieła statusu sakretnaj.
-
Niekatoryja biełaruski iduć u surahatnyja mamy. Kolki za heta płaciać i chto z žančyn na heta hatovy?
-
Łukašenka zajaviŭ, što biełarusy ź litoŭcami stahodździami mieli dobrazyčlivyja adnosiny, zasnavanyja na histaryčnych suviaziach
-
Valfovič prakamientavaŭ zajavy SVR i paprasiŭ Jeŭropu nie dyktavać Biełarusi, jak žyć
Kamientary