«Napisała CEO — praz dva dni vydalili z usich sistem». Biełaruska 3 hady navučałasia na kursach EPAM, ale tak i nie atrymała pracu

«Amal čatyry hady tamu ja pierajechała ź siamjoj ź Biełarusi ŭ Bałharyju. Pracavała anłajn — łahapiedam. Krychu paźniej vyrašyła «ŭvajści ŭ IT» i vybrała EPAM.

Ja metanakiravana navučałasia amal try hady, niahledziačy na vialikuju zaniataść na asnoŭnaj pracy i maleńkaje dzicia. Usiaho ja praviała 461 hadzinu na navučańni pa ŭnutranych prahramach EPAM, pavodle ich ułasnaj płatformy. Ale mała taho, što mnie tak i nie prapanavali pracu, tak jašče i navat vydalili zusim ź sistem.

«Patencyjał jość»

Kali ja zarehistravałasia na płatformie EPAM Campus, my ź siamjoj užo pierajechali ŭ Bałharyju. Ja vybrała kurs pa.NET i prajšła dva moduli. U niejki momant sa mnoj źviazałasia HR z EPAM i paviedamiła, što ŭ Bałharyi nabor studentaŭ nie viadziecca, bo kampanija nie płanuje pracaŭładkavańnie ŭ hetaj łakacyi. Heta było niečakana i niepryjemna, ale ja ŭsio roŭna vyrašyła nie zdavacca.

Praź niekatory čas kurs pa.NET znoŭ staŭ dastupny dla studentaŭ z Bałharyi. Ja vyrašyła pasprabavać šaniec. Vyvučyła jašče dva moduli, paśpiachova zdała sieryju testaŭ, prajšła techničnaje i anhielskaje intervju.

Paśla hetaha mianie dapuścili da ŭdziełu ŭ EPAM Lab — šaścimiesiačnaj intensiŭnaj prahramie ź mientaram. Dzieści ŭ hety pieryjad mnie prapanavali pazicyju Support Engineer. Ja paćvierdziła cikavaść, my źviazvalisia ź mieniedžaram, abmiarkoŭvali detali — i na hetym suviaź spyniłasia. Tolki praź niekalki miesiacaŭ pryjšoŭ adkaz, što pazicyja dastupnaja tolki na 3 miesiacy, a EPAM nie najmaje na taki termin. Mianie paprasili «čakać dalej».

Pavialičyć

Paśla zaviaršeńnia łabaratoryi mnie prapanavali prajści praktyčny kurs Global Education. Kab tudy patrapić, treba było prajści papiaredniuju prahramu pa AWS, choć jana raźličana na devopsaŭ i bekienderaŭ, a ja navučałasia na aŭtamatyzavanaha testavalnika.

Paralelna z hetaj prahramaj mnie prapanavali prajści techničnaje intervju, kab pravieryć viedy paśla zaviaršeńnia łabaratoryi i acanić, ci hatovaja ja pracavać na realnym prajekcie.

Času na padrychtoŭku było vielmi mała i ja mocna vyharała. Na sumoŭi ja dobra adkazała na tearetyčnyja pytańni, a voś z praktyčnym zadańniem nie spraviłasia.

Atrymała fidbek: «Patencyjał jość, padciahnicie słabyja miescy ŭ Global Education».

Ja prajšła kurs pa AWS, atrymała bedž i pačała vučobu na Global Education. Heta byŭ intensiŭny 4‑miesiačny kurs z štodzionnymi «stendapami» i kamandnaj pracaj. Prykładna ŭ siaredzinie kursa mnie znoŭ prapanavali intervju (ale detalej nie kazali, ja nie viedała na jakuju pazicyju zaprašajuć i što heta za intervju). Ja paprasiła prajści sumoŭi paśla vučoby, kab padrychtavacca lepiej. Moj zapyt pryniali.

Kali kurs skončyŭsia, ja adrazu napisała svajmu mieniedžaru — skazała, što ciapier hatovaja da intervju. A praz paru dzion mnie adkazali, što ŭ intervju ŭžo niama patreby i ŭvohule moj profil studenta vydalać.

Ja była ŭ šoku i vyrašyła napisać kiraŭniku ŭsioj kampanii. I praź jašče dva dni mianie vydalili z usich sistem: Teams, Outlook, ja straciła dostup da EPAM Campus.

Pavialičyć

«Nie chaču, kab takija situacyi zastavalisia ŭ cieni»

Uvieś hety čas ja była metanakiravanaj, matyvavanaj, rychtavałasia, vučyłasia, prachodziła ŭsie nieabchodnyja etapy na anhielskaj movie.

I tamu ja dahetul nie razumieju, čamu mianie tak raptoŭna vydalili ź sistem. Ja pisała svajmu mieniedžaru, ale atrymała adkaz ad inšaha čałavieka. Mnie skazali, što akaŭnt vydalili, bo ŭzrovień viedaŭ nie adpaviadaje čakańniam kampanii.

Pavialičyć

Ale mianie ździŭlaje, što pry hetym mianie zvali na novaje intervju, a kali ja skončyła čarhovy kurs, ja ŭžo nie padychodziła pa kryteram. Atrymlivajecca, što kampanija sama sabie supiarečyć.

Pavialičyć

Dobraja jakaść, ale šmat niavyznačanaści

Mnie spadabałasia vučycca, navučańnie sapraŭdy na vysokim uzroŭni. Praŭda, na lubyja pytańni davodziłasia doŭha čakać adkazu. Časam navat pa niekalki miesiacaŭ.

Pry hetym temp byŭ vielmi chutki, ad studentaŭ čakali, što jany ŭžo viedajuć praktyčna ŭsio. Abjom tem — vielizarny, ale pry hetym mała padtrymki studentaŭ i času na padrychtoŭku. Niahledziačy na hetuju situacyju, ja ŭsio roŭna chacieła b pracavać u EPAM. Mnie padabajecca, što heta kampanija ź biełaruskimi karaniami. Nu i ja stolki hadoŭ i sił ukłała ŭ vučobu. Tamu navat nie razhladała inšyja varyjanty.

Mahčyma, kali vy čytajecie hety tekst, niekatoryja momanty zdajucca vam niezrazumiełymi abo niajasnymi. Ale mienavita takoj była maja vučoba ŭ EPAM — pastajannaja niavyznačanaść, kali nikoli nie viedaješ, što ciabie čakaje dalej.

Siońnia tabie prapanujuć pazicyju, zaŭtra kažuć «pačakajcie», a paślazaŭtra vydalajuć z usich sistem biez tłumačeńniaŭ.

• 0
• 0
• 8
• 9
• 3
• 1
• 4
• 0