Apieracyja na sercy niečakana vylečyła mužčynu ad raku, ale vyklikała alerhiju na pčoł

Kali ŭ čałavieka vyjaŭlajuć miełanomu, zvyčajna havorka idzie pra całkam zrazumieły nabor mietadaŭ lačeńnia. Ale ŭ adnym niezvyčajnym vypadku, pra jaki raskazvaje IFL Science, rak źnik paśla pracedury, jakaja naohuł nie była pryznačana dla baraćby ź im.

U 65‑hadovaha pacyjenta była miełanoma, jakaja raspaŭsiudziłasia pa arhaniźmie. Pavodle spravazdačy ab kliničnym vypadku, prahnoz byŭ niespryjalny: čakałasia, što mužčyna moža nie pražyć i piaci hadoŭ.

Na hetym prablemy sa zdaroŭjem nie skončylisia. U jaho vyjavili ciažki aartalny stenoz — zvužeńnie aartalnaha kłapana, jakoje pieraškadžaje narmalnamu vychadu kryvi ź levaha žałudačka serca. Mužčynu spatrebilisia zamiena aartalnaha kłapana i karanarnaje šuntavańnie.

Paśla apieracyi ŭźnikła jašče adno ŭskładnieńnie — bakteryjalnaja infiekcyja. Takim čynam, arhanizm adnačasova sutyknuŭsia z ankałahičnym zachvorvańniem, surjoznaj patałohijaj serca i nastupstvami składanaha chirurhičnaha ŭmiašańnia.

A potym adbyłosia toje, čaho miedyki nie čakali. Prykładna praz dva miesiacy paśla apieracyi mužčynu zrabili płanavuju dyjahnostyku, kab prasačyć za raźvićciom raku. I daktary ničoha nie znajšli.

Miełanoma źnikła biez dalejšaha supraćpuchlinnaha lačeńnia. Bolš za toje, pavodle aŭtaraŭ apisańnia vypadku, pacyjent zastajecca ŭ poŭnaj remisii bolš za šeść hadoŭ, znachodziačysia tolki pad miedycynskim nahladam.

Ci mahła apieracyja «pierazapuścić» imunitet?

Nakolki b nievierahodna ni hučała hetaja historyja, jana nie zusim unikalnaja. U miedycynskaj litaratury apisanyja dziasiatki vypadkaŭ spantannaj rehresii miełanomy paśla chirurhičnych umiašańniaŭ. Časam hetamu papiaredničała bijapsija abo apieracyja, źviazanaja niepasredna z puchlinaj, a časam — umiašańnie ź inšaj nahody. Čamu heta adbyvajecca, navukoŭcy dakładna nie viedajuć.

Adno z mahčymych tłumačeńniaŭ źviazana ź imunnaj sistemaj. Chirurhičnaja traŭma zapuskaje mahutnuju reakcyju arhanizma, nieabchodnuju dla baraćby ź infiekcyjaj i adnaŭleńnia paškodžanych tkanak. Tearetyčna takaja aktyvacyja pry peŭnym źbiehu abstavin moža ŭzmacnić i supraćpuchlinny imunny adkaz, u tym liku dziejnaść T-kletak.

Heta, adnak, tolki hipoteza. Adzin kliničny vypadak nie aznačaje, što apieracyja na sercy moža vykarystoŭvacca jak mietad lačeńnia miełanomy. Zatoje dalejšaja historyja pacyjenta dała daśledčykam jašče adnu padkazku, što ź jaho imunitetam sapraŭdy adbylisia niezvyčajnyja źmieny.

Razam z rakam źnikła i pieranosnaść pčalinaha jadu

Da apieracyi mužčyna nie mieŭ alerhii na ŭkusy pčoł. Jon pracavaŭ fiermieram i za svajo žyćcio byŭ udžaleny šmat razoŭ bieź niebiaśpiečnych nastupstvaŭ.

Adnak praz dva hady paśla źniknieńnia raku čarhovy ŭkus miedanosnaj pčały vyklikaŭ u jaho anafiłaksiju — vostruju alerhičnuju reakcyju, jakaja moža pahražać žyćciu.

Raptoŭnaje źjaŭleńnie alerhii stała jašče adnoj prykmietaj taho, što imunitet mužčyny moh istotna pierabudavacca. Pryčym, miarkujučy pa ŭsim, hetyja źmieny zachavalisia nadoŭha.

Daśledčyki adznačajuć, što padobnyja zruchi časam adbyvajucca paśla mocnaha ŭździejańnia na arhanizm — naprykład, infiekcyi, vakcynacyi abo surjoznaha chirurhičnaha ŭmiašańnia. U redkich vypadkach jany mohuć paŭpłyvać i na zdolnaść arhanizma zmahacca z puchlinaj.

Ci źviazany takim čynam źniknieńnie miełanomy i novaja alerhija na pčaliny jad, dakładna nieviadoma. Ale abiedźvie padziei mohuć być prajavami adnoj niezvyčajnaj pierabudovy imunnaj sistemy.

• 5
• 0
• 1
• 0
• 0
• 0
• 0
• 0