Byłaja žonka Paŭła Charłančuka pryznałasia, što ŭ jaje ŭnutry «ŭsio jašče pustata»
Akciorka Hanna Južakova, papaŭšy ŭ špital, apublikavała poŭny bolu post.
Hanna raskazvaje, što piša hety post z balničnaj pałaty: uviečary skončyŭsia zdymačny dzień, a nočču jaje zabrała chutkaja.
U jaje ciažkaja aniemija — hiemahłabin 78, jana pačała zadychacca.
«I viedajecie, što śmiešna? Ja daŭno pavinna była apynucca tut. Tamu što apošnija šeść hadoŭ ja nie dychała. Ja prosta rabiła vyhlad.
17 hadoŭ ja była žonkaj. Ščaślivaj. Kachanaj. Maci piaciarych dziaciej. Heta byŭ moj dom, maja scena, maja rola, jakuju ja lubiła ŭsim sercam.
My rasstalisia praz 17 hadoŭ.
I ja pačała rabić usio «pravilna». Vyvučyłasia na psichołaha. Zdymajusia ŭ kino. Ihraju roli. Radujusia dzieciam. Zajmajusia sportam. Pju kapučyna ŭ lubimaj kaviarni. Stvaraju novaje žyćcio.
Ja rabiła ŭsio, kab «vybrać siabie».
Ale ŭnutry — pustata.
Ja nie viedaju, jak heta rastłumačyć. Heta jak być aktrysaj va ŭłasnym filmie. Ty hraješ ščaście, pośpiech, svabodu. A ŭnutry — ni huku. Ničoha. Cišynia», — piša Hanna.
Jana kaža, što sama doŭha nie razumieła, u čym sprava.
«Dumała: moža, ja jašče nie adpuściła muža? Ale nie. Ja nie chaču jaho nazad.
Ja sumuju pa im? Nie.
Ja sumuju pa statusie «žonki». Pa toj biaśpiecy, kali ty — častka kahości. Kali za taboj jość ściana. Kali ty nie adna adkazvaješ za ŭsio.
Ja sumuju pa tym časie, kali maja kroŭ ciakła dziela kahości.
Ciapier jana spyniłasia. Hiemahłabin 78 — heta nie prosta ličby. Heta admova majoj kryvi žyć dla siabie. Jana nie bačyć sensu. Jana kaža: «Navošta ciačy, kali ciabie nichto nie čakaje?»
Daktary kažuć: «Aniemija, picie žaleza». Ale žaleza nie zapoŭnić hetuju pustatu. Ja mahu prymać preparaty, mahu jeści miasa, mahu dychać kisłarodam. Ale kali ŭnutry niama žadańnia žyć — žaleza nie dapamoža», — razvažaje jana.
Hanna piša, što mienavita ŭ balnicy zrazumieła hałoŭnaje.
«Ja nie bajałasia stracić muža. Ja bajałasia zastacca sam-nasam z saboj.
Ja tak bajałasia hetaj pustaty, što zapoŭniła jaje spravami, rolami, dziećmi, sportam, vučobaj. Ale pustata nie źnikła. Jana prosta schavałasia pad pryhožaj karcinkaj «paśpiachovaj žančyny».
A ciapier majo cieła skazała: «Hodzie ŭciakać. Davaj sustreniemsia z hetaj pustatoj tvaram da tvaru».
Ja nie viedaju, kali ŭ mianie padymiecca hiemahłabin.
Ale ja viedaju adno: ja pierastaju ihrać. Ja pierastaju być «aktrysaj svajho žyćcia». Ja chaču być prosta žyvoj.
Ja chaču dazvolić sabie być nikim. Nie psichołaham, nie aktrysaj, nie mamaj, nie byłoj žonkaj. Prosta žančynaj, jakaja chvareje, jakaja stamiłasia, jakaja maje prava ničoha nie chacieć.
Ja dazvalaju sabie hetuju pustatu. Tamu što tolki prajšoŭšy praź jaje, možna naradzicca nanova», — piša jana.
Hanna zapeŭnivaje, što heta nie historyja pra razvod. «Heta historyja pra toje, jak my vučymsia žyć biez rolaŭ. Jak my viartajem sabie kroŭ, kali zdajecca, što jaje bolš niama».
Apublikavaŭšy taki ščyry post, Hanna tłumačyć, čamu jana heta zrabiła:
«Ja viedaju, što tut jość tyja, kamu važna heta pačuć».
Pavieł Charłančuk i Hanna Južakova na praciahu amal dvaccaci hadoŭ byli adnoj z najbolš jarkich par u biełaruskim teatralnym i kiniematahrafičnym asiarodździ. Charłančuk — byłaja zorka Kupałaŭskaha teatra, jaki pakinuŭ teatr na chvali padziej 2020 hoda i byŭ vymušany źjechać u Maskvu, dzie ŭładkavaŭsia ŭ Maskoŭski hubiernski teatr pad kiraŭnictvam Siarhieja Biazrukava.
Akciory hadavali piaciora dziaciej — troje svaich i dvoje pryjomnych.
Adnak u studzieni 2023 hoda para aficyjna raźviałasia, pra što Južakova publična paviedamiła praź niekalki miesiacaŭ. Paźniej eks-supruham daviałosia znoŭ ihrać siamju na zdymačnaj placoŭcy rasijskaha sieryjała «Apantanaść».
Kamientary